കഠിനാദ്ധ്വാനം കൊണ്ടാണ് ലോകഫുട്‌ബോളില്‍ ക്രിസ്റ്റിയാനോ റൊണാള്‍ഡോ തന്റെ നാമം ഇതിഹാസങ്ങളോടൊപ്പം എഴുതിച്ചേര്‍ത്തത്. ലോകത്ത് ഏതെല്ലാം ലീഗുകളില്‍ ക്രിസ്റ്റിയാനോ കളിച്ചോ അവിടെയെല്ലാം തന്റേതായ സിംഹസാനം ഈ കളിക്കാരന്‍ ഊട്ടിയുറപ്പിച്ചിട്ടുണ്ട്. എന്നാല്‍ ഇപ്പോള്‍ ഇറ്റാലിയന്‍ ലീഗില്‍ മികച്ച താരത്തിനുള്ള പുരസ്‌കാരം നേടിയ ശേഷം തന്റെ നേട്ടങ്ങളെല്ലാം സ്വന്തം അമ്മയ്ക്ക് സമര്‍പ്പിക്കുകയാണ് താരം.

എവിടെയും എപ്പോഴും എനിക്കെന്റെ അമ്മ കൂടെ തന്നെ വേണം...അതിനു ശേഷമേ എനിക്ക് എന്റെ കരിയര്‍ ഉള്ളൂ. തന്റെ ജീവന്‍ ബലിയര്‍പ്പിച്ചു കൊണ്ടാണ് അമ്മ എന്നെ വളര്‍ത്തിയത്. വിശക്കുന്ന വയറുമായിട്ടായിരിക്കും അന്നത്തെ രാത്രികളില്‍ അമ്മ ഉറങ്ങാന്‍ കിടക്കുന്നത്. പക്ഷെ, എനിക്ക് എന്തെങ്കിലും കഴിക്കാനുണ്ടെന്ന് ഉറപ്പുവരുത്തിയതിനുശേഷമേ അമ്മ ഉറങ്ങാറുള്ളൂ.

അന്ന് ജീവിക്കാന്‍ പണം ഇല്ലായിരുന്നു. എന്നെ ഒരു ഫുട്‌ബോള്‍ താരമാക്കാന്‍ വേണ്ടി എന്നെ കളിക്കാന്‍ പറഞ്ഞു വിടുകയും ആഴ്ചയിലെ ഏഴു ദിവസവും അമ്മ ജോലിക്കും പോകും. അത്രത്തോളം എനിക്ക് വേണ്ടി കഷ്ട്ടപെട്ടിട്ടുണ്ട് എന്റെ അമ്മ. ഞാന്‍ നേടുന്ന എല്ലാ വിജയങ്ങളും ഞാന്‍ എന്റെ അമ്മക്ക് സമര്‍പ്പിക്കുന്നു-ക്രിസ്റ്റിയാനോ കൂട്ടിച്ചേര്‍ത്തു. റിയല്‍ മാഡ്രിഡില്‍ നിന്ന് ഇറ്റാലിയന്‍ ലീഗിലെ യുവന്റസിലാണ് താരം ഇപ്പോള്‍ കളിക്കുന്നത്.