സൈനിക സേവനത്തിനുശേഷമുള്ള ധോണിയുടെ 'പുത്തന്‍ ലുക്ക്' വൈറല്‍
രണ്ടാഴ്ചയോളം സൈനിക സേവനം നടത്തിയതിനു ശേഷം തിരിച്ചെത്തിയ ഇന്ത്യന്‍ ക്രിക്കറ്റ് താരം മഹേന്ദ്രസിങ് ധോണിയുടെ 'പുതിയ ലുക്ക്' വൈറല്‍ ആകുന്നു.
ജയ്പുര്‍ വിമാനത്താവളത്തില്‍വച്ച് അപ്രതീക്ഷിതമായി മുന്നിലെത്തിയ മുന്‍ ക്യാപ്റ്റനെ ആരാധകരില്‍ ചിലര്‍ ക്യാമറയില്‍ പകര്‍ത്തുകയായിരുന്നു.
സാള്‍ട്ട് ആന്‍ഡ് പെപ്പര്‍ ശൈലിയിലുള്ള കുറ്റിത്താടിയും തലയില്‍ക്കെട്ടും സഹിതമുള്ള ധോണിയുടെ ചിത്രങ്ങളും വിഡിയോയും സമൂഹമാധ്യമങ്ങളില്‍ വൈറലായിക്കഴിഞ്ഞു.
106 ടെറിട്ടോറിയല്‍ ആര്‍മി പാരഷൂട്ട് റെജിമെന്റില്‍ ഓണററി ലഫ്റ്റനന്റ് കേണലായ ധോണി വിക്ടര്‍ ഫോഴ്‌സിനൊപ്പമാണ് 15 ദിവസം സൈനിക സേവനത്തില്‍ ഏര്‍പ്പെട്ടത്. കശ്മീരില്‍ സൈനികര്‍ക്കൊപ്പമായിരുന്നു ധോണിയുടെ താമസം. പട്രോളിങ്, സൈനിക പോസ്റ്റ് ഡ്യൂട്ടി, കാവല്‍ തുടങ്ങിയ ദൗത്യങ്ങളാണ് ഇക്കാലയളവില്‍ ധോണി നിര്‍വഹിച്ചത്.
ധോണി സൈനിക സേവനം നടത്തിയതോടെ രാജ്യത്തെ യുവതലമുറയില്‍ കൂടുതല്‍ പേര്‍ സൈനികസേവനത്തിനു തയാറായി മുന്നോട്ടുവരുമെന്നാണു പ്രതിരോധ മന്ത്രാലയം പ്രതീക്ഷിക്കുന്നത്. സൈനിക സേവനത്തിന്റെ ഭാഗമായി വെസ്റ്റിന്‍ഡീസ് പര്യടനത്തിനുള്ള ഇന്ത്യന്‍ ടീമില്‍നിന്നു ധോണി പിന്‍മാറിയിരുന്നു.
https://www.facebook.com/Malayalivartha
