പുതിയ തലമുറ ചക്ക പോലുള്ള തനത് ഭക്ഷ്യവസ്തുക്കളെ അവഗണിക്കുകയും ഫാസ്റ്റ് ഫുഡിലേക്കും വിഷലിപ്തമായ ആധുനിക ഭക്ഷണരീതിയിലേക്കും മാറിയതിന്റെ ദുരന്തഫലങ്ങള്‍ ഇന്ന് നാം അനുഭവിക്കുന്നുണ്ട്. കേരളത്തില്‍ പ്രമേഹവും ക്യാന്‍സര്‍ കോലുള്ള മാരക രോഗങ്ങളും അനുദിനം വര്‍ദ്ധിക്കുകയാണ്. ഇതിന് പ്രധാന കാരണം ഭക്ഷ്യസംസ്‌കാരത്തില്‍ വന്ന മാറ്റങ്ങളാണെന്ന് വൈദ്യശാസ്ത്രം മുന്നറിയിപ്പുനല്‍കുന്നു. ഈ സാഹചര്യത്തില്‍ നമ്മുടെ തീന്‍മേശയിലേക്ക് നാടന്‍ വിഭവങ്ങളെ തിരികെ കൊണ്ടുവരേണ്ട സമയം അതിക്രമിച്ചിരിക്കുകയാണ്. പ്രമേഹ രോഗത്തിന് പ്രതിവിധിയാണ് ചക്ക എന്ന് പഠനങ്ങള്‍ പറയുന്നു. കുട്ടികളില്‍ രോഗങ്ങള്‍ ഉണ്ടാകുന്നതിനുള്ള പ്രധാന കാരണമാണ് ജങ്ക് ഫുഡുകളും പാക്കറ്റ് ഫുഡുകളും ബേക്കറി പലഹാരങ്ങളും. കുട്ടികള്‍ ഇഷ്ടപ്പെടുന്ന ഒരു 4 മണി പലഹാരമാണ് ചക്ക കിണ്ണത്തപ്പം. പുതുമയും സ്വാദും ഈ പലഹാരം കുട്ടികള്‍ക്ക് ഇഷ്ടപ്പെടും.

ആവശ്യമായ സാധനങ്ങള്‍
പച്ചരി                        2ഗ്ലാസ്സ്
തേങ്ങ                      1 വലിയ മുറി
ശര്‍ക്കര                    50ഗ്രാം
ചക്കചുള                   20എണ്ണം
ചെറിയജീരകം          1ടീസ്
ചെറിയ ഉള്ളി           6എണ്ണം
ഏലക്ക                   3എണ്ണം
ഉപ്പ്                       ഒരു നുള്ള്
അണ്ടിപരിപ്പ്           10എണ്ണം
മുന്തിരി                   15എണ്ണം
നെയ്                   2ടീസ്
തയ്യാറാക്കുന്നവിധം
*********************
ശര്‍ക്കര കുറച്ച് വെള്ളത്തില്‍ ഉരുക്കി വെക്കുക.ചക്ക ചുളകള്‍ ആവിയില്‍ വേവിച്ചതിന് ശേഷം,ചൂടാറിയാല്‍ വെള്ളം ചേര്‍ക്കാതെ അരച്ചു വെക്കുക.പച്ചരിയും,തേങ്ങയും,ചെറിയ ഉള്ളിയും,ഏലക്കയും ശര്‍ക്കര നീര് ചേര്‍ത്ത് മിക്‌സിയില്‍ നല്ലതു പോലെ അരച്ചെടുക്കുക.ഇതിലേക്ക് ചക്ക അരച്ചതും,ചെറിയ ജീരകവും ഉപ്പ് പൊടിയും ചേര്‍ത്ത് നല്ലതു പോലെ ഇളക്കി ഒരു മണിക്കൂര്‍ വെക്കുക.നെയ്യില്‍ മൂപ്പിച്ച അണ്ടിപരിപ്പും,മുന്തിരിയുംചേര്‍ത്തിളക്കി,ഇഡ്ഡലി ചെമ്പില്‍ കിണ്ണം വെച്ച്,മാവ് ഒഴിച്ച് ആവിയില്‍ വേവിച്ചെടുക്കാം…
സ്വാദുള്ള ചക്ക കിണ്ണത്തപ്പം റെഡി.