ഓണത്തിന്റെ പ്രധാനാകര്‍ഷണം ഓണസദ്യയാണ്. 'ഉണ്ടറിയണം ഓണം' എന്നൊരു ചൊല്ല് തന്നെ ഉണ്ടല്ലോ. പണ്ടൊക്കെ പപ്പടവും ഉപ്പേരിയും പായസവും കൂട്ടി വയറു നിരസിച്ചു ഉണ്ണാനുള്ള അവസരമായിരുന്നു സാധാരണക്കാരന് ഓണം. എന്നാല്‍ ഇന്ന് അതല്ല സ്ഥിതി.എന്നാലും മലയാളിക്ക് ഇപ്പോഴും ഓണം ഗൃഹാതുരസ്മരണ ഉണര്‍ത്തുന്ന ഒന്നുതന്നെയാണ്. ഓണത്തിന് സദ്യ ഒരുക്കാത്ത മലയാളിയുണ്ടോ? അതില്‍ പ്രധാനം പായസം തന്നെ. പാലട, പഴ പ്രഥമന്‍, ഗോതമ്പു പായസം ..
ഇക്കുറി വ്യത്യസ്തമായ ഒരു പായസം പരീക്ഷിക്കാം .

ചേരുവകള്‍:
മുളയരി 100 ഗ്രാം
പാല്‍ നാല് കപ്പ്
പഞ്ചസാര അര കപ്പ്
അണ്ടിപരിപ്പ്, മുന്തിരി, കിസ്മിസ്, ഏലക്കാപ്പൊടി(ആവശ്യത്തിന്)
പാചകം ചെയ്യുന്ന വിധം: രണ്ട് കപ്പ് പാലില്‍ മുളയരി വേവിച്ചെടുക്കു. മുക്കാല്‍ വേവാക്കുമ്പോള്‍ ബാക്കിയുള്ള രണ്ട് കപ്പ് ചേര്‍ത്തിള്ളക്കുക. പാല്‍ കുറുകി വരുമ്പോള്‍ പഞ്ചസാരയിട്ട് വീണ്ടും തിളപ്പിക്കുക. പിന്നീട് നെയ്യില്‍ അണ്ടി പരിപ്പും മുന്തിരിയും വറുത്തിടുക. ഏലക്കായ പൊടിച്ചത് ചേര്‍ത്തിളക്കുക.
പായസം തേങ്ങാ പാലിലും ഉണ്ടാകാം. മുളയരി വേവിക്കുമ്പോള്‍ രണ്ടാം പാല്‍ ഉപയോഗിച്ച് വേവിക്കുക. പിന്നീട് വെന്ത് കഴിയുമ്പോള്‍ ഒന്നാം പാല്‍ ഒഴിക്കുക.