ആരോഗ്യ മേഖലയിലെ വികസനത്തിന്റെ സൂചികയായ കുറഞ്ഞ മാതൃമരണ നിരക്കില്‍ കേരളം വീണ്ടും ഒന്നാമത്‌. 2010-12 കാലയളവില്‍ ഇന്ത്യയിലെ സംസ്ഥാനങ്ങളിലായി നടന്ന സാമ്പിള്‍ രജിസ്‌ട്രേഷന്‍ സര്‍വേയുടെ അടിസ്ഥാനത്തിലാണ്‌ ഈ അംഗീകാരമെന്ന്‌ ആരോഗ്യവകുപ്പ്‌ മന്ത്രി വി. എസ്‌. ശിവകുമാര്‍ വ്യക്തമാക്കി.
മാതൃമരണനിരക്കില്‍ 2010-12 കാലയളവില്‍ 19 ശതമാനം കുറവാണ്‌ കേരളത്തില്‍ രേഖപ്പെടുത്തിയത്‌. 2007-09 കാലയളവില്‍ ഒരു ലക്ഷത്തില്‍ 81 എന്ന നിരക്ക്‌ ഇപ്പോള്‍ ഒരു ലക്ഷത്തില്‍ 66 ആയി കുറഞ്ഞിട്ടുണ്ട്‌. കുറഞ്ഞ മാതൃമരണനിരക്കില്‍ മഹാരാഷ്‌ട്ര(87) രണ്ടാം സ്ഥാനത്തും തമിഴ്‌നാട്‌(90) മൂന്നാം സ്ഥാനത്തുമാണ്‌. കൂടുതല്‍ മരണനിരക്ക്‌ രേഖപ്പെടുത്തിയിരിക്കുന്നത്‌ അസ്സാമി(328)ലാണ്‌. ഇന്ത്യയിലെ നിരക്ക്‌ 178 ആണ്‌.
വിവിധ പദ്ധതികളുടെ ഫലപ്രദമായ നിര്‍വഹണത്തിലൂടെയാണ്‌ കേരളം ഈ മേഖലയില്‍ മികച്ച പുരോഗതി നേടിയത്‌. അമ്മയും കുഞ്ഞും പദ്ധതിയിലൂടെ സര്‍ക്കാര്‍ ആശുപത്രികളില്‍ പ്രസവത്തിനെത്തുന്ന എല്ലാ അമ്മമാര്‍ക്കും ചികിത്സ, മരുന്നുകള്‍, ഭക്ഷണം, യാത്രാസൗകര്യം എന്നിവ പൂര്‍ണമായും സൗജന്യമാണ്‌. കൂടാതെ ജനനിസുരക്ഷ പോലെയുള്ള പദ്ധതികളിലൂടെ സാമ്പത്തിക സഹായവും ലഭ്യമാക്കുന്നുണ്ട്‌. മാത്യമരണനിരക്ക്‌ കുറയുന്നതിനായി കൂടുതല്‍ പദ്ധതികള്‍ നടപ്പിലാക്കുമെന്നും ആരോഗ്യ മന്ത്രി വ്യക്തമാക്കി.