പ്രധാന മന്ത്രിയുടെ വസതിക്ക് മുന്നില്‍ പ്രതിഷേധിച്ച വിദ്യാര്‍ത്ഥികളെ പിന്തുണച്ച് ആര്‍.എസ്.എസ് സര്‍സംഘചാലക് മോഹന്‍ ഭാഗവത്. ഇന്നത്തെ യുവതലമുറ സമരത്തിനിറങ്ങിയാല്‍ അവരെ രാജ്യവിരുദ്ധരായി കാണരുതെന്ന് ആര്‍.എസ്.എസ് മേധാവി പറഞ്ഞു. മുംബയില്‍ നടന്ന യുവജന സമ്മേളനത്തില്‍ സംസാരിക്കുകയായിരുന്നു അദ്ദേഹം. അവര്‍ നമ്മുടെ സ്വന്തം ആളുകളും അടുത്ത തലമുറയുമാണെന്നും അദ്ദേഹം ഓര്‍മ്മിപ്പിച്ചു.'ലോകത്തെ ഒന്നിപ്പിക്കുന്നതില്‍ യുവജനങ്ങളുടെ പങ്ക്: ഭാരതീയ രീതി' എന്ന വിഷയത്തില്‍ നടന്ന സമ്മേളനത്തിലാണ് ഭാഗവതിന്റെ പരാമര്‍ശം.

ജൂലായ് 20ന് ഡല്‍ഹി ജന്തര്‍മന്ദറില്‍ നടന്ന വിദ്യാര്‍ത്ഥി സമരത്തിന്റെ പശ്ചാത്തലത്തിലാണ് പ്രസ്താവന. ചോദ്യപേപ്പര്‍ ചോര്‍ച്ചയുമായി ബന്ധപ്പെട്ട് കേന്ദ്ര വിദ്യാഭ്യാസ മന്ത്രി ധര്‍മേന്ദ്ര പ്രധാന്റെ രാജി ആവശ്യപ്പെട്ട് നടത്തിയ മാര്‍ച്ചില്‍ പ്രതിഷേധക്കാര്‍ക്ക് നേരെ പൊലീസ് ലാത്തിച്ചാര്‍ജും കണ്ണീര്‍വാതകവും പ്രയോഗിച്ചിരുന്നു. എന്നാല്‍ പ്രതിഷേധം ജനാധിപത്യപരമായമാര്‍ഗമാണെന്ന് വിശേഷിപ്പിച്ച ഭാഗവത്, മറ്റ് വഴികള്‍ അടയുമ്പോഴാണ് ആളുകള്‍ പ്രതിഷേധവുമായി മുന്നോട്ടു വരുന്നതെന്നും പറഞ്ഞു.

'ജെന്‍ സി തലമുറ രാജ്യവിരുദ്ധരല്ല, മറിച്ച് അവര്‍ നമ്മുടെ സ്വന്തം ആളുകളാണ്.അടുത്ത തലമുറയാണ്. അവരുമായി തുറന്ന ചര്‍ച്ചകള്‍ ആവശ്യമാണ്. നമ്മുടെ ആളുകളെന്ന തിരിച്ചറിവ് ഉണ്ടാകണം. ജെന്‍ സെയും ജെന്‍ ആല്‍ഫയും നമ്മുടെയൊക്കെ തലമുറയെക്കാള്‍ സത്യസന്ധരാണ്. ദേശസ്‌നേഹം,? സേവനം എന്നിവയെ കുറിച്ച് അവര്‍ ആത്മാര്‍ത്ഥമായാണ് പ്രതികരിക്കുന്നത്. ചര്‍ച്ചയുടെ മറ്റൊരു രൂപമാണ് പ്രതിഷേധം. ഞങ്ങളുടെ ചെറുപ്രായത്തില്‍ മുതിര്‍ന്നവര്‍ പറയുന്നത് ചോദ്യം ചെയ്യാതെ അംഗീകരിക്കുന്ന സ്വഭാവമായിരുന്നു. എന്നാല്‍ ഇന്നത്തെ ജെന്‍ സിയും ജെന്‍ ആല്‍ഫയും കാര്യങ്ങള്‍ ചോദിച്ചറിയുന്നുണ്ട്, അവര്‍ക്ക് ഉത്തരങ്ങള്‍ വേണം. ചോദ്യങ്ങള്‍ക്ക് കൃത്യമായ യുക്തിസഹമായ ഉത്തരങ്ങള്‍ ആഗ്രഹിക്കുന്നവരാണ് അവര്‍'. മോഹന്‍ ഭാഗവത് പറയുന്നു.

പെല്ലറ്റ് ഗണ്‍ പ്രയോഗത്തെക്കുറിച്ചുള്ള ചോദ്യത്തിന്, തനിക്ക് അതിനെക്കുറിച്ച് കൃത്യമായ വിവരങ്ങള്‍ ലഭ്യമല്ലെന്നും കാര്യങ്ങള്‍ പരിശോധിച്ച ശേഷം മാത്രമേ പ്രതികരിക്കാനാകൂ എന്നും ആര്‍എസ്എസ് അദ്ധ്യക്ഷന്‍ വ്യക്തമാക്കി. 2029ലെ പൊതുതിരഞ്ഞെടുപ്പില്‍ നിര്‍ണായക വോട്ടുബാങ്കായി മാറാന്‍ തയ്യാറെടുക്കുന്ന ജെന്‍ സി തലമുറയ്ക്ക് പൂര്‍ണപിന്തുണ പ്രഖ്യാപിക്കുന്നതാണ് മോഹന്‍ ഭാഗവതിന്റെ വാക്കുകള്‍.