ദീര്ഘായുസ്സിന്റെ രഹസ്യം ,ബുദ്ധന് പറഞ്ഞ കഥ
ധര്മം പ്രചരിപ്പിച്ചുകൊണ്ടു ബുദ്ധന് ലോകത്തിന്റെ വിവിധ ഭാഗങ്ങളിലൂടെ സഞ്ചരിച്ചു. അങ്ങനെ ഒരു സ്ഥലത്ത് എത്തിയപ്പോള് ധനികനായ ഒരാള് ബുദ്ധനെ കാണാനെത്തി. കുതിരകളെ പൂട്ടിയ രഥത്തില് പരിചാരകന്മാരോടൊപ്പമാണ് അയാള് വന്നത്. തടിച്ചു കൊഴുത്ത ശരീരം കൊണ്ട് അയാള് നടക്കാന് നന്നേ പ്രയാസപ്പെട്ടിരുന്നു. പരിചാരകര് താങ്ങി എടുത്തു ധനവാനെ ബുദ്ധന്റെ മുമ്പില് എത്തിച്ചു.
വളരെയധികം സങ്കടത്തോടെ ധനികന് ബുദ്ധനോടു പറഞ്ഞു:
യഥാവിധി അങ്ങയെ വണങ്ങാന്പോലും എനിക്കു വയ്യ. അമിതമായ ശരീരകഭാരം കൊണ്ടും മറ്റ് അസുഖങ്ങള്കൊണ്ടും ഞാന് വല്ലാതെ വിഷമിക്കുന്നു. ശരീരം ആസകലം വേദന. ഒന്നനങ്ങിയാല് മതി വേദന കഠിനമാകുന്നു.
വളരെ നിസ്സംഗനായി ബുദ്ധന് ചോദിച്ചു: നിങ്ങളുടെ രോഗത്തിന്റെ കാരണം എന്തെന്നറിയാന് താത്പര്യമുണ്ടോ?
ആകാംക്ഷയോടെ ബുദ്ധന്റെ മുഖത്തേക്കു ധനികന് നോക്കി.
ബുദ്ധന് പറഞ്ഞു:
നിങ്ങള്ക്ക് ഈ രോഗം ഉണ്ടാകാന് അഞ്ചു കാരണങ്ങള് ഉണ്ട്. അമിത ഭക്ഷണം, നിദ്രാസക്തി, അവിവേകം, ഭോഗലാലസ, കര്ത്തവ്യാഭാവം.
ഇമവെട്ടാതെ ധനികന് ബുദ്ധനെ ശ്രദ്ധിച്ചിരുന്നു. ബുദ്ധന് തുടര്ന്നു:
ആഹാരം നിയന്ത്രിക്കുക. തന്റെ കഴിവുകള് ഉപയോഗിക്കാന് പറ്റിയ എന്തെങ്കിലും കര്ത്തവ്യങ്ങള് ഏറ്റെടുക്കുക. തന്നെക്കൊണ്ടു മറ്റുള്ളവര്ക്ക് എന്തെങ്കിലും പ്രയോജനമുണ്ടാക്കുക. ഇതനുസരിച്ചാല് തന്റെ ആയുസ്സു നീട്ടിക്കിട്ടും.
അണുകിട മാറ്റമില്ലാതെ ധനികന് ബുദ്ധന്റെ ഉപദേശം ജീവിതത്തില് പകര്ത്തി. കുറെ നാള് കഴിഞ്ഞപ്പോള് വീണ്ടും ധനികന് ബുദ്ധന്റെ അടുത്തെത്തി. ശരീരത്തിന്റെ ഭാരം നന്നേ കുറഞ്ഞു. ഇത്തവണ രഥമോ പരിചാരകരോ ഇല്ലാതെയാണു ബുദ്ധന്റെ അടുത്തേക്ക് അയാള് എത്തിയത്. കാല് നടയായി വന്നു ബുദ്ധന്റെ മുമ്പില് കൈകൂപ്പി നിന്നുകൊണ്ട് അറിയിച്ചു:
പ്രഭോ, എന്റെ രോഗങ്ങള് ഒക്കെ ഭേദമായി. ശരീരത്തിനു വളരെ ഉന്മേഷം തോന്നുന്നു. ഞാനിപ്പോള് എന്റെ മനസ്സിനു പ്രകാശം തേടി വന്നതാണ്.
ബുദ്ധന് ഉപദേശിച്ചു:
ലൗകിക മനുഷ്യന് തന്റെ ശരീരത്തെ പോഷിപ്പിക്കുന്നു. എന്നാല്, വിവേകിയാവട്ടെ തന്റെ മനസ്സിനെയും പോഷിപ്പിക്കുന്നു. ഭോഗത്തില് മുഴുകുന്നവര് സ്വന്തം നാശം വരുത്തിവയ്ക്കുന്നു. അതേ സമയം ധര്മം അനുസരിക്കുന്നവനു പാപമോചനവും ദീര്ഘായുസ്സും ലഭിക്കുന്നു.
https://www.facebook.com/Malayalivartha
