വിഴിഞ്ഞത്തേക്ക് സഞ്ചാരികളുമായി എത്തുന്നത് രണ്ട് ആഡംബര കപ്പലുകള്
രണ്ട് ആഡംബര കപ്പലുകളാണ് ഈ സീസണില് വിഴിഞ്ഞം തുറമുഖത്തേക്ക് അടുക്കുന്നത്.തുടര്ച്ചയായ വരവിലൂടെ തുറമുഖത്തിന്റെ സ്വന്തം കപ്പലെന്ന പ്രതീതിയുണര്ത്തിയ ഐലന്ഡ് സ്കൈ ഇക്കുറി വിഴിഞ്ഞത്തേക്കില്ല. ഭീമന് കപ്പലായ അമേഡിയയും അത്ര വലുപ്പമില്ലാത്ത സില്വര് ഡിസ്ക്കവറുമാണ് ഇത്തവണ വിഴിഞ്ഞത്തേക്കു സഞ്ചാരികളുമായി എത്തുന്നത്.
സില്വര് ഡിസ്ക്കവറര് വരുന്ന ഫെബ്രുവരി രണ്ടിനു രാവിലെ തുറമുഖത്തു നങ്കൂരമിടും. ലോക സഞ്ചാരത്തിനിടെ കൊച്ചി വഴിയെത്തുന്ന സില്വര് ഡിസ്ക്കവര് നൂറിലേറെ സഞ്ചാരികളുമായിട്ടാണു വിഴിഞ്ഞത്തേക്കു വരുന്നത്. നഗരക്കാഴ്ചകള് കണ്ട് മടങ്ങുന്ന സഞ്ചാരികളുമായി കപ്പല് അന്നു വൈകിട്ട് കൊളംബോക്കു നീങ്ങും.
മാര്ച്ച് 29-നാണ് വലുപ്പത്തില് മുന്പനായ അമേഡിയ എത്തുന്നത്. വലിപ്പം കാരണം തുറമുഖത്തിനു പുറത്തായിരിക്കും കപ്പല് നങ്കൂരമിടുക. ഏതാണ്ട് 600 സഞ്ചാരികളുമായി കൊളംബോയില് നിന്നാണ് അമേഡിയയുടെ വരവ്. കപ്പല് അന്നു രാത്രി കൊച്ചിക്കു പോകും. അമേഡിയ 2015-ലും സില്വര് ഡിസ്ക്കവര് കഴിഞ്ഞ വര്ഷവും വിഴിഞ്ഞത്തെത്തിയിരുന്നു. എല്ലാ വര്ഷവും എത്തിയിരുന്ന ഐലന്ഡ് സ്കൈ ഇത്തവണ വിഴിഞ്ഞം ഒഴിവാക്കി. കൊച്ചിയിലും ഈ കപ്പല് ഇത്തവണ വരുന്നില്ല.
https://www.facebook.com/Malayalivartha
