പ്രകൃതി രമണീയമായ കാഴ്ചയൊരുക്കി വിനോദസഞ്ചാരികളെ മാടിവിളിക്കുകയാണ് വാഴമല.പാനൂര്‍ തൃപ്രങ്ങോട്ടൂര്‍ പഞ്ചായത്തിലെ കിഴക്കന്‍ മലയോരത്ത് സ്ഥിതിചെയ്യുന്ന വാഴമല മണ്‍സൂണ്‍ ടൂറിസത്തിന് അനുയോജ്യമായ രീതിയില്‍ കോടമഞ്ഞും ഇളംകാറ്റും പാറക്കെട്ടുകളും വെള്ളച്ചാലുകള്‍കൊണ്ടും സമൃദ്ധമാണ്.മലമുകളിലൂടെ 12 കിലോമീറ്റര്‍ മഴയുടെ സൗന്ദര്യം പകരുന്ന യാത്രയാണ് വാഴമലയിലൂടെ സഞ്ചാരികള്‍ക്ക് ലഭിക്കുന്നത്.

മലബാറില്‍ മഴ കനത്തതോടെ മണ്‍സൂണ്‍ ടൂറിസത്തിന് പ്രിയമേറുകയാണ്. ദിവസേന നൂറുകണക്കിനാളുകളാണ് കോഴിക്കോട്,കണ്ണൂര്‍ ജില്ലകളില്‍നിന്ന് വാഴമലയുടെ സൗന്ദര്യം ആസ്വദിക്കാനെത്തുന്നത്.പാനൂര്‍ ചെറുപറമ്പിലെ പാത്തിക്കല്‍ താഴ്‌വാരത്തുനിന്ന് അഞ്ഞൂറേക്കറോളം വരുന്ന മലമുകളിലേക്ക് കയറുംതോറും കണ്ണിന് കുളിര്‍മയേകുന്ന കാഴ്ചയാണ് ലഭിക്കുന്നത്.

ഒട്ടേറെ വിലപിടിപ്പുള്ള ഔഷധ സസ്യങ്ങള്‍ മൂടി കിടക്കുന്ന സ്ഥലമായതിനാല്‍ ശുദ്ധവായു ഇവിടുത്ത പ്രധാനഘടകമാണ്. വാഴമലയിലുടെ 9 കിലോമീറ്റര്‍ സഞ്ചരിച്ചാല്‍ കണ്ണവം കാട്ടിലെത്താം.കോളയാട് എരഞ്ഞോട് കാര്‍ഷിക മേഖല, അരീക്കര മിലിട്ടറി ക്യാമ്പ്, പുഞ്ചഫാം, വിലങ്ങാട് വെള്ളച്ചാട്ടം എന്നിവ സമീപപ്രദേശങ്ങളാണ്.ഞായറാഴ്ചകളില്‍ സഞ്ചാരികളുടെ അത്യപൂര്‍വ്വമായ തിരക്കാണ് ഇവിടെ അനുഭവപെടുന്നത്.

കോടമഞ്ഞിനെ വകഞ്ഞുമാറ്റിയുള്ള കുത്തനെയുള്ള അല്പം സാഹസികമായ മലകയറ്റമാണ് ബുള്ളറ്റും ബൈക്കിലുമായി എത്തുന്ന യുവാക്കളെ ഹരം കൊള്ളിക്കുന്നത്..അതുകൊണ്ടു തന്നെ സഞ്ചാരികളായി എത്തുന്നവരില്‍ ഏറെയും യുവാക്കള്‍തന്നെ.

കോളയാടുനിന്ന് 8 കിലോമീറ്ററും പൊയിലൂരില്‍നിന്ന് 12 കിലോമീറ്ററും ചെറുവാഞ്ചേരിയില്‍നിന്ന് 15 കിലോമീറ്ററും സഞ്ചരിച്ചാല്‍ വാഴമലയിലെത്താം. മലബാറിലെ ഇത്തരം പ്രദേശങ്ങളെ ടൂറിസം പദ്ധതിയില്‍നിന്ന് സര്‍ക്കാര്‍ അവഗണിക്കുകയാണെന്ന് പരിസ്ഥിതി സ്‌നേഹികള്‍ പറയുന്നു. വാഴമലയെ മണ്‍സൂണ്‍ ടൂറിസത്തില്‍ ഉള്‍പെടുത്തിയാല്‍ വിദേശികള്‍ ഉള്‍പെടെയുള്ള സഞ്ചാരികളെ ഇവിടേക്ക് ആകര്‍ഷിക്കാന്‍ കഴിയുമെന്നാണ് വിദഗ്ദ്ധരുടെ അഭിപ്രായം.നമ്മുടെ നാട്ടിലെ ഇതുപോലുള്ള, ഭൂമിയിലെ സ്വര്‍ഗ്ഗത്തെ കാണാതെ പോവരുതാരും!