തിരുവനന്തപുരം ജില്ലയിലെ പ്രധാന ടൂറിസ്റ്റ് കേന്ദ്രമായ പൊന്മുടിയില്‍ നിന്നും ആരംഭിച്ച് കല്ലാറില്‍ അവസാനിക്കുന്ന മനോഹരമായ ഒരു ട്രെക്കിംഗ് പാതയാണ് വരയാട് മുടി അല്ലെങ്കില്‍ വരായടുമോട്ട. കേള്‍ക്കുമ്പോള്‍ നിസ്സാരമെന്നു തോന്നുമെങ്കിലും ഏറ്റവും കഠിനമായ ഒരു ട്രെക്കിംഗ് ആണ് അത്. പൊന്മുടിയില്‍ നിന്നും കല്ലാര്‍ വരെയും പിന്നീട് കല്ലാറില്‍ നിന്നും പൊന്മുടിയിലേക്കും വളരെ അധികം അപകടം പതിയിരിക്കുന്ന ഒരു ട്രെക്കിംഗ് പാത കൂടിയാണത്. വളരെ അപൂര്‍വ്വമായി വരയാടുകളെ കാണാന്‍ സാധിക്കുന്നതുകൊണ്ടാണ് ഈ മലകള്‍ക്ക് വരയാട് മുടി എന്ന പേര് വന്നത് വരായടുമോട്ട എന്നും ഈ മലനിരകള്‍ അറിയപ്പെടുന്നുണ്ട്.

സാധാരണഗതിയില്‍ പൊന്മുടിയില്‍ ആണ് ട്രക്കിംഗ് ആരംഭിക്കുന്നത്. പൊന്മുടിയില്‍ നിന്നും വളരെ വ്യക്തമായി കാണാന്‍ പറ്റുന്ന മലനിരകളാണ് വരയാട് മുടി മലനിരകള്‍. കേരള ഫോറസ്റ്റ് ഡിപ്പാര്‍ട്ട്‌മെന്റിന്റെ ഇക്കോ ടൂറിസത്തിന്റെ ഭാഗമായി വരയാടുമൊട്ട ട്രെക്കിങ്ങിന്റെ പെര്‍മിഷന്‍ തരുന്നത് ഏകദേശം 1100 മീറ്റര്‍ ഉയരത്തിലാണ്.14 കിലോമീറ്റര്‍ ദൈര്‍ഘ്യം ഉണ്ട് ഈ പാതക്ക. ഈ മലയുടെ വടക്കുഭാഗത്ത് അഗാധമായ കൊക്കയാണ്.

പാലോട് ഫോറസ്റ്റ് വകുപ്പിന്റെ കീഴിലാണ് ഈ സ്ഥലം സ്ഥിതി ചെയ്യുന്നത.് പൊന്മുടിയില്‍ ഉള്ള ഇക്കോട്ടൂറിസം ഓഫീസില്‍ നിന്നും ഒരു നിശ്ചിത ഫീസ് നല്‍കി ഒരു ടീമിന് ഈ വഴിയില്‍ ട്രെക്ക് ചെയ്യാന്‍ പറ്റുന്നതാണ്. ഒരു ഫോറസ്റ്റ് ഗാര്‍ഡിനെയും ട്രക്കിങ് ടീമിന്റെ കൂടെ അയക്കും. വരയാട് മുടിയില്‍ ഉള്ള മലകള്‍ കയറിയിറങ്ങിയ ശേഷം കുത്തനെ താഴേക്കിറങ്ങി കല്ലാറിലാണ് പാത അവസാനിക്കുന്നത്. പൊന്മുടിയില്‍ തുടങ്ങി മങ്കയത്ത് അവസാനിക്കുന്ന ഒരു ട്രെക്കിംഗ് പാത കൂടി ഉണ്ട് അവിടെ.

രാവിലെ ആറ് മണിക്ക് ആരംഭിച്ച വൈകുന്നേരം ഏഴ് മണിയോടെ അവസാനിക്കുന്ന രീതിയിലാണ് ട്രെക്കിങ്ങ് നടത്തുന്നത്. വരായടുമുടി മലയിലേക്ക് പ്രവേശിച്ചാല്‍ വെള്ളം ഒരു പ്രധാന പ്രശ്‌നമാണ് ആവശ്യത്തിനുള്ള വെള്ളവും ഭക്ഷണവും കൈയില്‍ കരുതേണ്ടത് അത്യാവശ്യമാണ്. വെള്ളത്തിനു യാതൊരു സ്രോതസ്സും അവിടെ ഇല്ല. കൂടാതെ ഒരുപാട് വെയ്റ്റ് കയ്യില്‍ കരുതിയാല്‍ ട്രെക്കിങ് ആസ്വദിക്കാന്‍ സാധിക്കില്ല. ഒപ്പം വളരെ പാടുപെടേണ്ടിയും വരും.

പൊന്മുടിയില്‍ നിന്നും ട്രക്കിങ് ആരംഭിക്കുമ്പോള്‍ ആദ്യം അല്‍പ്പം താഴേക്കിറങ്ങിയ ശേഷം ഒരു അയ്യപ്പന്റെ അമ്പലം ഉണ്ട്. ശേഷം ഇല്ലി കൂട്ടത്തിന്‍ ഇടയിലൂടെ കുത്തനെ മല കയറി വരയാടുമൊട്ട മലയുടെ മുകളിലെത്തും. പിന്നീട് മുകളിലേക്കും താഴേക്കും കയറി ഇറങ്ങി മലയുടെ അങ്ങേ തലക്കല്‍ എത്താം. മൊട്ടകുന്ന് ആയതുകൊണ്ട് നല്ല ചൂടാണ.് തൊപ്പിയും മറ്റും കയ്യില്‍ കരുത്തണ്ടത് അത്യാവശ്യമാണ്. ശേഷം മല ഇറക്കമാണ്. വളരെ അപകടം പിടിച്ച ഒരു സ്ഥലമാണ്. പിന്നീട് ഒരു മൂന്നു കിലോമീറ്റര്‍ ചോല വനത്തിലൂടെയും പുല്‍മേട്ടിലുടെയും നടന്ന് കല്ലാറില്‍ ട്രെക്കിങ്ങ് അവസാനിക്കും.

ആന ശല്യം ഉള്ള പ്രദേശമാണ്. മറ്റു വന്യ മൃഗങ്ങളും ഉണ്ട്.വളരെ കരുതല്‍ വേണ്ട പ്രദേശമാണ് വരായടു മുടി .മലനിരകളുടെ രണ്ടു വശവും അഗാധമായ കൊക്കയാണ്. ഗൈഡിന്റെ നിര്‍ദേശങ്ങള്‍ കര്‍ശനമായി പാലിക്കണം. ഒരേപോലെ കഠിനമായ ഇറക്കങ്ങളും കയറ്റങ്ങളും നിറഞ്ഞ വഴി ആണ് കടുത്ത അട്ട ശല്യവും ഉണ്ട്.