മധ്യകേരളത്തിലെ പ്രമുഖ മലയോര വിനോദസഞ്ചാര കേന്ദ്രമാണ് പീച്ചി ഡാം. കേരളത്തിലെ തൃശ്ശൂര്‍ ജില്ലയിലാണ് പീച്ചി അണക്കെട്ട്. ജലസേചനം, ശുദ്ധജലവിതരണം എന്നിവ മുന്‍നിര്‍ത്തിയാണ് ഈ അണക്കെട്ട് നിര്‍മ്മിച്ചിരിക്കുന്നത്. പീച്ചി വാഴാനി വന്യജീവി സങ്കേതവും ഇവിടെയാണുള്ളത്. കേരള വന ഗവേഷണ ഇന്‍സ്റ്റിറ്റിയൂട്ട് (കെ.എഫ്.ആര്‍.ഐ) പീച്ചിക്കടുത്തുള്ള കണ്ണാറയില്‍ സ്ഥിതിചെയ്യുന്നു.

കേരളത്തിലെ ഒരു മേജര്‍ ഇറിഗേഷന്‍ പ്രോജക്ട് എന്ന നിലയിലാണ് 1957 ഒക്ടോബര്‍ നാലിന് കേരള ഗവര്‍ണര്‍ ബി. രാമകൃഷ്ണറാവു രാജ്യത്തിന് സമര്‍പ്പിച്ചത്. കരുവന്നൂര്‍ പുഴയുടെ പോഷകനദിയായ മണലിപ്പുഴയുടെ കുറുകെയാണ് പീച്ചി അണക്കെട്ട് നിര്‍മിച്ചിട്ടുള്ളത്. ഈ ജലസേചനപദ്ധതിയുപയോഗിച്ച് ഏകദേശം 17,555 ഹെക്ടര്‍ പ്രദേശത്ത് ജലസേചനം സാധ്യമാക്കുന്നു. പ്രധാനമായും മുകുന്ദപുരം, തലപ്പിള്ളി, തൃശ്ശൂര്‍, ചാവക്കാട് താലൂക്കുകളിലെ പ്രദേശങ്ങളിലേക്ക് വിവിധ കനാലുകള്‍വഴി ജലമെത്തിക്കുന്നു.

അണക്കെട്ടിലെ ജലം ഉപയോഗിച്ച് വൈദ്യുതി ഉത്പാദിപ്പിക്കുന്നതിനായി കെ.എസ്.ഇ.ബി. യുടെ ചെറുകിട ജലവൈദ്യുതി പദ്ധതി ഇവിടെ സ്ഥാപിച്ചിരിക്കുന്നു. പ്രതിവര്‍ഷം 33 ലക്ഷം യൂണിറ്റ് വൈദ്യുതി ഉത്പാദനമാണ് ഈ പദ്ധതിയിലൂടെ ലക്ഷ്യമിടുന്നത്. 12 കോടി രൂപയാണ് നിര്‍മ്മാണച്ചിലവ്. അണക്കെട്ടിന്റെ വലതുകര കനാലിലൂടെ വേനല്‍ക്കാലത്ത് ജലസേചനത്തിനായി തുറന്നുവിടുന്ന ജലം ഉപയോഗിച്ചാണ് വൈദ്യുതി ഉല്‍പാദിപ്പിക്കുന്നത്. ഉല്പാദനത്തിനുശേഷം വെള്ളം കനാലിലേക്കുതന്നെ വിടും. അണക്കെട്ടിലെ ജലം രണ്ടു ശാഖകളായാണ് തുറന്നുവിടുന്നത്. ഒന്ന് മുടക്കം വരാതെയുള്ള ജനസേചനത്തിനും മറ്റൊന്ന് വൈദ്യുതി ഉല്പാദിപ്പിക്കാനും ഉപയോഗിക്കുന്നു. വൈദ്യുതി ഉല്പാദനത്തില്‍ എന്തെങ്കിലും തകരാര്‍ ഉണ്ടായാല്‍ ജലസേചനത്തില്‍ മുടക്കം വരാതിരിക്കാനാണ് രണ്ടു ശാഖകളായി ജലം തിരിച്ചുവിടുന്നത്.

രാവിലെ 8 മുതല്‍ വൈകിട്ട് 6 വരെയാണ് പ്രവേശനസമയം. 20 രൂപയാണ് പ്രവേശന നിരക്ക്. കുട്ടികള്‍ക്ക് 10 രൂപ.

തൃശ്ശൂരില്‍നിന്ന് പാലക്കാട് ദേശീയപാതയിലൂടെ 13 കി.മീ. സഞ്ചരിച്ചാല്‍ പീച്ചിറോഡ് ജങ്ഷനിലെത്തും. അവിടെനിന്ന് 8 കി.മീറ്റര്‍ തെക്കോട്ടു പോയാല്‍ ഇവിടെയെത്താം. തൃശ്ശൂര്‍ ശക്തന്‍ ബസ്സ്റ്റാന്‍ഡില്‍നിന്ന് പീച്ചി ഡാമിലേക്ക് നേരിട്ട് ബസ് സര്‍വീസുണ്ട്. രാവിലെ 7 മുതല്‍ രാത്രി 9 മണിവരെ പത്തുമിനിറ്റ് ഇടവേളകളില്‍ ബസുകളുണ്ട്. പാലക്കാട് നിന്നും വരുന്ന സഞ്ചാരികള്‍ക്ക് പട്ടിക്കാട് നിന്ന് പീച്ചിയിലേക്ക് ബസ് കിട്ടും. സഞ്ചാരികള്‍ക്കുള്ള ഭക്ഷണസൗകര്യം പീച്ചി ഗസ്റ്റ് ഹൗസില്‍ ഒരുക്കിയിട്ടുണ്ട്. പകല്‍സമയം തങ്ങുന്നതിനുള്ള സൗകര്യവും ഗസ്റ്റ് ഹൗസിലുണ്ട്. 300 രൂപയാണ് പ്രതിദിനവാടക. രാത്രിയില്‍ താമസസൗകര്യം ലഭ്യമല്ല.