വയനാട് ജില്ലയുടെ പ്രവേശനകവാടമായ ലക്കിടിയില്‍ നിന്ന് 10 കിലോമീറ്റര്‍ അകലെ ചുണ്ടേല്‍ ടൗണിന് തൊട്ടുമുന്‍പ് ദേശീയപാതയുടെ അരിക് പറ്റിയുള്ള ചോലോട് തേയില എസ്‌റ്റേറ്റിലാണ് കാറ്റാടിക്കുന്ന് എന്ന വ്യൂ പോയിന്റ്. മൂടല്‍മഞ്ഞ് കുടമാറ്റം നടത്തുന്ന ചെമ്പ്രയുടെ ചോല വനങ്ങളിലേയ്ക്കും താഴ്‌വാരങ്ങളിലേയ്ക്കും കാഴ്ച നല്‍കുന്ന പ്രകൃതിയുടെ കിളിവാതിലാണ് ഈ കാറ്റാടിക്കുന്ന്.

രാത്രികാലങ്ങളില്‍ സ്വദേശികളും വിദേശികളും ടെന്റുകളില്‍ തങ്ങി രാപ്പാടികളുടെ സംഗീതവും മിന്നാമിനുങ്ങുകളുടെ ദീപക്കാഴ്ചയും കോടമഞ്ഞിന്റെ കുളിരും ആസ്വദിക്കാന്‍ ഇവിടെ എത്താറുണ്ട്. ചെമ്പ്ര മലയിടുക്കുകളിലെ ചോലവനങ്ങളില്‍ നിന്ന് ഒഴുകിയെത്തുന്ന പളുങ്കു സമാനമായ ജലസമൃദ്ധിയാല്‍ ഒരുക്കിയിരിക്കുന്ന ചെക്ക് ഡാം സന്ദര്‍ശകര്‍ക്ക് പ്രകൃതിയുടെ തന്നെ ഒരു സ്വിമ്മിങ് പൂളാണ്. മാത്രവുമല്ല ഏറ്റവും വരണ്ട സമയത്തു പോലും ജലസമൃദ്ധിയില്‍ സമ്പന്നവും ശരീരത്തിനും മനസ്സിനും ഒരുപോലെ ഉണര്‍വേകുന്നതുമാണ് ഈ ചെക്ക് ഡാം.

കാറ്റാടിക്കുന്ന് സ്ഥിതി ചെയ്യുന്ന തേയിലനിരകള്‍ പ്രൗഢഭംഗിയേറിയതും പ്രകൃതിയുടെ പച്ചവിരിപ്പിനാല്‍ സമൃദ്ധവുമാണ്. കോടമഞ്ഞ് മൂടുന്ന പ്രഭാതങ്ങളും കുളിര്‍ക്കാറ്റ് വീശുന്ന സായാഹ്നങ്ങളും ഒക്കെയായി കാറ്റാടിക്കുന്ന് നമ്മുടെ മനംകവരും. ഈ ദൃശ്യവിസ്മയം അറിയുന്ന സന്ദര്‍ശകര്‍ വാരാന്ത്യങ്ങളിലും അവധി ദിനങ്ങളിലും തങ്ങളുടെ തിരക്കുകള്‍ക്ക് അവധി നല്‍കി കാറ്റാടിക്കുന്നു സവാരിയും സന്ദര്‍ശനവും നടത്താറുണ്ട്

ചായ കുടിക്കുന്നവര്‍ക്കറിയില്ല ചായയുണ്ടാവുന്ന വഴികള്‍. തോട്ടം മേഖലയുടെ പ്രതിസന്ധിയുടെ കാലത്ത് പ്ലാന്റേഷന്‍ ടൂറിസത്തിന്റെ വഴികള്‍ തേടുകയാണ് പല തോട്ടമുടമകളും. ചുണ്ടേലിലെ ചേലോട് എസ്‌റ്റേറ്റിലെ പ്ലാന്റേഷന്‍ ടൂറിസത്തിന്റെ സൗന്ദര്യം നുകരാന്‍ നിരവധി പേരാണ് എത്തുന്നത്. തോട്ടത്തിലൂടെയുള്ള പ്ലാന്റേഷന്‍ വാക്ക്, സൈക്കിള്‍ സവാരി, ജീപ്പിലൂടെയുള്ള സഫാരി എന്നിവ ഒരുക്കിയിട്ടുണ്ട്.

വര്‍ഷങ്ങള്‍ പഴക്കമുള്ള ടീ ഫാക്ടറിയില്‍ കൊളുന്തുവരുന്നതു മുതല്‍ പൊടിയാകുന്നവരെയുള്ള കാഴ്ചകള്‍ കാണാനുള്ള സൗകര്യം മാത്രമല്ല വിവിധ ഇനം ചായകള്‍ രുചിക്കാനുള്ള ഏര്‍പ്പാടുകളും ഉണ്ട്. തേയിലത്തോട്ടങ്ങളില്‍ ടെന്റ് അടിച്ച് താമസിക്കാനുള്ള സൗകര്യത്തിനു പുറമേ തോട്ടത്തിനു മുകളിലെ പഴയ ബംഗ്ലാവിനെ നവീകരിച്ച് താമസിക്കാനുള്ള സൗകര്യവും ഒരുക്കിയിട്ടുണ്ട്.