കേരളത്തിലെ വ്യത്യസ്തമായ ഒരു വന്യജീവി സംരക്ഷണകേന്ദ്രമാണ് പാലക്കാട് ജില്ലയില്‍ സ്ഥിതി ചെയ്യുന്ന പറമ്പിക്കുളം വന്യജീവി സംരക്ഷണ കേന്ദ്രം. ഈ വന്യജീവി സംരക്ഷണകേന്ദ്രം 285 ചതുരശ്ര കിലോമീറ്റര്‍ വിസ്തീര്‍ണ്ണത്തില്‍ വ്യാപിച്ചു കിടക്കുന്നു. പാലക്കാട് പട്ടണത്തില്‍ നിന്നും 90 കിലോമീറ്റര്‍ ദൂരെയാണ് ഇത്. തമിഴ്‌നാട്ടിലെ സേത്തുമട എന്ന സ്ഥലത്തുകൂടിയാണ് പറമ്പിക്കുളത്തേക്കുള്ള പ്രധാനപാത കടന്നുപോകുന്നത്. ആനമല വന്യജീവി സംരക്ഷണകേന്ദ്രവുമായി ഇത് ചേര്‍ന്നുകിടക്കുന്നു. പ്രസിദ്ധമായ ടോപ്പ്സ്ലീപ്പ് പറമ്പികുളത്തിനടുത്താണ്. തുണക്കടവ് അണക്കെട്ട് പറമ്പിക്കുളത്തെ പ്രധാന ആകര്‍ഷണമാണ്.

ആനകളുടെ താവളം എന്നതിനുപരി കാട്ടുപോത്ത്, മ്ലാവ്, വരയാട്, മുതല എന്നിവയും ചുരുക്കം കടുവകള്‍, പുള്ളിപ്പുലികള്‍ എന്നിവയും ഈ വന്യജീവി സംരക്ഷണകേന്ദ്രത്തില്‍ ഉണ്ട്. വിവിധയിനത്തിലുള്ള സസ്യജാലങ്ങളുടെ ആവാസവ്യവസ്ഥയാണ് ഇവിടം. മുന്‍കൂര്‍ അനുവാദം വാങ്ങിയാല്‍ വനത്തില്‍ സാഹസികയാത്രയ്ക്ക് പോവാം. ഇവിടത്തെ തടാകത്തില്‍ ബോട്ട് യാത്രയ്ക്കും സൗകര്യമുണ്ട്. ഏഷ്യയിലെ ഏറ്റവും വലിയ തേക്ക് മരമായ കന്നിമാര തേക്ക് ഇവിടെയുള്ള തുണക്കടവ് എന്ന സ്ഥലത്താണ്.2010 ഫെബ്രുവരി 19-നാണ് ഈ വന്യജീവികേന്ദ്രം, കേരളത്തിലെ രണ്ടാമത്തെ കടുവാസംരക്ഷണപ്രദേശമായി പ്രഖ്യാപിക്കപ്പെട്ടത്.

തമിഴ്‌നാട്ടിലെ പൊള്ളാച്ചി വഴി വേണം ഇവിടേക്ക് എത്തിച്ചേരാന്‍്.തൃശൂരില്‍ നിന്നാണെങ്കില്‍ നെന്മാറ, കൊല്ലങ്കോട്, ഗോവിന്ദപുരം, ആനമല, സേതുമട വഴിയും. സേതുമടയില്‍ തമിഴ്‌നാടിന്റെ ആദ്യ ചെക്ക്‌പോസ്റ്റുണ്ട്. ആ ചെക്ക്‌പോസ്റ്റില്‍ വിവരങ്ങള്‍ നല്‍കി പതുക്കെ മുന്നോട്ട് പോയാല്‍ തമിഴ്‌നാടിെന്റ വനപ്രദേശം ആരംഭിക്കുകയായി. ഇവിടെ താമസിക്കാനായി കാട്ടിനുള്ളില്‍ കോട്ടേജുകള്‍ ലഭ്യമാണ്. പല ട്രെക്കിങ് പാക്കേജുകളും നടത്തുന്നുണ്ട്. രാവിലെ 7 മണി മുതല്‍ 4 മണി വരെയാണ് ചെക്‌പോസ്റ്റ് പ്രവേശനം. സഞ്ചാരികള്‍ക്കു പറമ്പിക്കുളം കാടുകളിലേക്കു താമസത്തിനു മുന്‍ കൂട്ടി ബുക്ക് ചെയ്യാം.ടെന്റ് ഹൗസ്, ഏറുമാടം, കോപ്ലക്‌സ് റൂം, ഐലന്റ് ഹൗസ് എല്ലാം ലഭ്യമാകും. ഫോണ്‍: 9442201690 , 9442201691. ഓരോ പാക്കേജുകളായിട്ടാണ് കിട്ടുക. താമസം മാത്രമല്ല ഭക്ഷണവും സഫാരിയും ട്രെക്കിങും ഉള്‍പ്പെടെ പാക്കേജുകള്‍ ഉണ്ടിവിടെ. താമസസൗകര്യം നേരത്തേ ബുക്ക് ചെയ്യുന്നവര്‍ക്ക് സ്വന്തം വണ്ടിയില്‍ തന്നെ കാട് ചുറ്റി കാണാം .വനയാത്രക്ക് ഗൈഡിനെയും മറ്റും ഇക്കോ ടൂറിസം തന്നെ ഏര്‍പ്പാടാക്കി തരും.

താമസസൗകര്യം ബുക്ക് ചെയ്യുന്നവര്‍ ഉച്ചക്ക് 12 മണിക്കും ജംഗിള്‍ സഫാരിക്കു പോകേണ്ടവര്‍ രണ്ടു മണിക്ക് മുമ്പും എത്തിച്ചേരണം. കൂടുതല്‍ വിവരങ്ങള്‍ക്ക് താഴെ കൊടുത്തിരിക്കുന്ന വിലാസത്തില്‍ ബന്ധപ്പെടുക.

ഡെപ്യൂട്ടി ഡയറക്ടര്‍, പറമ്പിക്കുളം ടൈഗര്‍ റിസര്‍വ്വ്, ആനപ്പാടി, തുണക്കടവ്, പാലക്കാട്-678661, ഇമെയില്‍: parambikulamsanctuary@gmail.com, ടെലിഫോണ്‍ നമ്പര്‍: 09442201690, 09442201691.