നിക്ഷിപ്തവനവും തേയിലത്തോട്ടവും ഇടകലര്‍ന്ന് നില്‍ക്കുന്ന കുന്ന്. അതിനു മുകളില്‍ നിന്ന് ചിരപുരാതന കാലത്തെ ചരിത്ര ശേഷിപ്പുകളിലേക്ക് ഒരു കാല്‍നട ദൂരം മാത്രം.

താഴ്‌വാരത്ത് അതിസുന്ദരമായ കാഴ്ചകളും. സ്വഛമായ ഈ അനുഭൂതി അനുഭവിച്ചറിയാന്‍ തൊവരിമലയിലേക്ക് പോകണം.

ബത്തേരിയില്‍ നിന്ന് അമ്പുകുത്തി റോഡിലൂടെ നാലു കിലോമീറ്ററോളം പോയാല്‍ കുന്താണി എന്ന സ്ഥലത്ത് എത്തും.

അവിടെ നിന്ന് യാത്ര എസ്‌റ്റേറ്റിലേക്ക് വഴിമാറും. ബ്രിട്ടിഷ് കാലഘട്ടത്തിന്റെ ഓര്‍മ്മകള്‍ പേറുന്ന എസ്‌റ്റേറ്റാണ്. വളഞ്ഞു പുളഞ്ഞ് കുന്നിന്‍ മുകളിലേക്ക് പടര്‍ന്ന് കയറുന്നു വഴി.

വഴിക്കിരുപുറവും നല്ല കാര്‍ഷിക സംസ്‌കാരത്തിന്റെ കാഴ്ചകള്‍. തേയില എസ്‌റ്റേറ്റിനു പുറമെ, നാട്ടുകാരുടെ നല്ല നിലയില്‍ പരിപാലിക്കുന്ന കൃഷിയിടങ്ങളും കാണാം.

കൊളോണിയല്‍ ശൈലി വിളിച്ചോതുന്ന എസ്‌റ്റേറ്റ് ബംഗ്ലാവും ഓഫിസ് കെട്ടിടവുമെല്ലാം ഇന്നും നല്ല രീതിയില്‍ സംരക്ഷിച്ച് പോരുന്നു.

തോട്ടത്തിനൊപ്പം ഇടകലര്‍ന്ന് നിക്ഷിപ്ത വനവും ഉണ്ട്. അടിക്കാടുകള്‍ പടര്‍ന്ന് നിബിഢത നിറഞ്ഞ വനം. പുലി ഉള്‍പ്പെടെയുള്ള മൃഗങ്ങള്‍ ഉണ്ടത്രേ. ബംഗ്ലാവും കഴിഞ്ഞ് മുന്നോട്ട് നീങ്ങിയാല്‍ എഴുത്തുപാറയില്‍ എത്തും.

എടക്കല്‍ ഗുഹാചിത്രങ്ങളോളം തന്നെ പ്രാധാന്യമുള്ള പുരാതന ശിലാ ചിത്രങ്ങള്‍ ഉണ്ട്. എഴുത്ത് പാറയില്‍. ഒരു പ്രാചീന ജനത ഇവിടെ അധിവസിച്ചിരുന്നു എന്നതിന്റെ ഇന്നും അവശേഷിക്കുന്ന തെളിവാണ് എഴുത്തുപാറ. ചരിത്രം ഘനീഭവിച്ച് നില്‍പ്പാണിവിടെ എന്ന് തോന്നും.

തൊവരിമലയുടെ മുകളില്‍ നിന്ന് നോക്കുമ്പോള്‍ താഴ്‌വരയുടെ മനോഹര ദൃശ്യങ്ങള്‍ കാണാം. തണുത്ത കാറ്റും, മികച്ച പ്രകൃതി സൗന്ദര്യവും, കൊളോണിയല്‍ ഭംഗിയും ഒപ്പം പുരാതന സംസ്‌കാരത്തിന്റെ അടയാളശിലയുമാണ് തൊവരിമല.