ഇന്ത്യയിലെ മികച്ച 50 റസ്‌റ്റോറന്റുകളുടെ പട്ടികയില്‍ ഇടം പിടിച്ച് കൊച്ചിയിലെ പാരഗണ്‍ ഹോട്ടല്‍ ശ്രദ്ധേയമായി. കോണ്ടെ നാസ്റ്റ് ട്രാവലറും ഹിമാലയാ സ്പാര്‍ക്ക്‌ലിംഗും ചേര്‍ന്നാണ് രാജ്യത്തെ മികച്ച 50 റസ്‌റ്റോറന്റുകളെ തെരഞ്ഞെടുത്തിരിക്കുന്നത്. ഇതില്‍ 24-ാം സ്ഥാനമാണ് കൊച്ചിയിലെ പാരഗണ്‍ ഹോട്ടലിന് ലഭിച്ചത്.

ദില്ലിയിലെ ഇന്ത്യാ ആക്‌സന്റ് ആണ് ഇത്തവണത്തെ ഏറ്റവും നല്ല റെസ്‌റ്റോറന്റിനുള്ള അവാര്‍ഡ് നേടിയിരിക്കുന്നത്. മുംബൈയിലെ ബോംബെ കാന്റീന്‍, ദ ടേബിള്‍ എന്നിവയാണ് രണ്ടും മൂന്നും സ്ഥാനങ്ങള്‍ നേടിയിരിക്കുന്നത്.

മട്ടന്‍ ബിരിയാണിയും കോഴിപൊരിച്ചതുമാണ് കൊച്ചി പാരഗണിലെ പ്രധാന വിഭവങ്ങള്‍. ഭക്ഷണത്തിന്റെ രുചിയോടൊപ്പം തൊഴിലാളികളുടെ നല്ല പെരുമാറ്റവും നല്ല സേവനങ്ങളുമാണ് പാരഗണിനെ 24-ാം സ്ഥാനം നേടാന്‍ സഹായിച്ചത്.

1936-ല്‍ കോഴിക്കോടാണ് ആദ്യമായി പാരഗണ്‍ റെസ്‌റ്റോറന്റ് ആരംഭിക്കുന്നത്. കേരളത്തിലെ നാടന്‍ ശൈലിയിലുള്ള ഭക്ഷ്യവിഭവങ്ങളായിരുന്നു പാരഗണിന്റെ ഏറ്റവും വലിയ പ്രത്യേകത. കൂടാതെ ഇതോടൊപ്പം വിദേശ വിഭവങ്ങളും പാരഗണില്‍ എത്തിച്ചേരുന്ന ഭക്ഷണപ്രിയര്‍ക്ക് ലഭിക്കും.