സംസ്ഥാനത്ത് ശക്തമായ മഴയ്ക്ക് ഇന്ന് മുതൽ അടുത്ത നാലു ദിവസത്തേക്ക് ശമനം. ഒരു ജില്ലയിലും പ്രത്യേക മഴ മുന്നറിയിപ്പ് നൽകിയിട്ടില്ല. തെക്കു പടിഞ്ഞാറൻ ബംഗാൾ ഉൾക്കടലിൻറെ മുകളിലായി ന്യുനമർദം സ്ഥിതിചെയ്യുന്നതിനാൽ ഒറ്റപ്പെട്ട ഇടങ്ങളിൽ നേരിയ മഴയ്ക്ക് സാധ്യതയുണ്ട്. മത്സ്യത്തൊഴിലാളികൾക്ക് പ്രത്യേക ജാഗ്രത നിർദേശം നൽകിയിട്ടുണ്ട്. തെക്കുപടിഞ്ഞാറൻ ബംഗാൾ ഉൾക്കടലിൽ സ്ഥിതി ചെയ്യുന്ന ന്യൂനമർദ്ദം തമിഴ്നാട് തീരത്തേക്ക് അടുക്കുകയാണ്. നാളെയോടെ ഈ ന്യൂനമർദം തീരത്തോട് കൂടുതൽ അടുക്കും.

ന്യൂനമർദ്ദത്തിന്റെ ഭാഗമായ മഴ മേഘങ്ങൾ തമിഴ്നാട്ടിൽ ഇന്നും നാളെയും മഴ നൽകും. വടക്കൻ തമിഴ്നാട്ടിലാണ് മഴ സാധ്യത. ഒറ്റപ്പെട്ട മഴ പുതുച്ചേരിയിലും മധ്യ തമിഴ്നാട്ടിലെ തീരദേശത്തും ലഭിക്കും. ന്യൂനമർദ്ദം ആന്ധ്രപ്രദേശ്, ഒഡീഷ മേഖലയിലേക്കാണ് ലക്ഷ്യം വെക്കുന്നത്. അതിനാൽ കേരളത്തിൽ കനത്ത മഴ ലഭിക്കാനുള്ള സാഹചര്യം ഇല്ല എന്നാണ് പുതിയ നിരീക്ഷണം. ഇന്നുമുതൽ ഈ മാസം അവസാനം വരെ കേരളത്തിൽ വരണ്ട കാലാവസ്ഥയോ ഒറ്റപ്പെട്ട മഴയോ ഉണ്ടാകും.

ഒറ്റപ്പെട്ട ചാറ്റൽ മഴ രാത്രി പെയ്തേക്കാം. പൊതുവേ കേരളത്തിൽ വരണ്ട കാലാവസ്ഥയാണ് പകൽ അനുഭവപ്പെടുക. എന്നാൽ രാത്രിയിൽ തണുപ്പുണ്ടാകും. തെക്കൻ കേരളത്തെ അപേക്ഷിച്ച് വടക്കൻ ജില്ലകളിലാണ് കൂടുതൽ തണുപ്പ് അനുഭവപ്പെട്ടിരുന്നത്. തുടർന്നുള്ള ദിവസങ്ങളിലും അങ്ങനെയാകും.

അതേസമയം ഉത്തരേന്ത്യയിലെ ശൈത്യം തുടരും. ദക്ഷിണ ഇന്ത്യയിൽ മാത്രമാണ് കുറച്ചുദിവസത്തേക്ക് തണുപ്പ് മാറിനിൽക്കുക. പശ്ചിമവാതം ശക്തിപ്പെടുന്നതിന്റെ തുടർന്നാണ് ഉത്തരേന്ത്യയിൽ കടുത്ത ശൈത്യവും മഞ്ഞുവീഴ്ചയും ഉണ്ടാവുക. ഉത്തരേന്ത്യയിൽ കേന്ദ്ര കാലാവസ്ഥാ വകുപ്പ് ശൈത്യ തരംഗം മുന്നറിയിപ്പും പുറപ്പെടുവിച്ചിട്ടുണ്ട്.

അതേ സമയം ഇന്ന് തെക്കൻ അറബിക്കടൽ അതിനോട് ചേർന്ന ഭൂമധ്യരേഖയോടുചേർന്ന ഇന്ത്യൻ മഹാസമുദ്രം എന്നിവിടങ്ങളിൽ മണിക്കൂറിൽ 35 മുതൽ 45 കിലോമീറ്റർ വരെയും ചില അവസരങ്ങളിൽ മണിക്കൂറിൽ 55 കിലോമീറ്റർ വരെയും വേഗതയിൽ ശക്തമായ കാറ്റിനും മോശം കാലാവസ്ഥയ്ക്കും സാധ്യത.

ഇന്നും നാളെയും : തെക്കൻ ആന്ധ്രാപ്രദേശ് തീരം, തെക്ക് പടിഞ്ഞാറൻ ബംഗാൾ ഉൾക്കടൽ, മധ്യ പടിഞ്ഞാറൻ ബംഗാൾ ഉൾക്കടൽ, തമിഴ്‌നാട് തീരം, അതിനോട് ചേർന്ന കന്യാകുമാരി പ്രദേശം, ഗൾഫ് ഓഫ് മന്നാർ എന്നിവിടങ്ങളിൽ മണിക്കൂറിൽ 35 മുതൽ 45 കിലോമീറ്റർ വരെയും ചില അവസരങ്ങളിൽ മണിക്കൂറിൽ 55 കിലോമീറ്റർ വരെയും വേഗതയിൽ ശക്തമായ കാറ്റിനും മോശം കാലാവസ്ഥയ്ക്കും സാധ്യത ഉണ്ട്.