ആദായനികുതി കണക്ക് സമര്‍പ്പിക്കാത്തവര്‍ക്ക് തടവുശിക്ഷ കിട്ടുമെന്ന് കാണിച്ച് ആദായനികുതി വകുപ്പ് സര്‍ക്കുലര്‍ പുറപ്പെടുവിച്ചു. ശമ്പളക്കാര്‍ ആദായ നികുതി റിട്ടേണ്‍ സമര്‍പ്പിക്കേണ്ട തീയതിയായ ജൂലായ് 31 അടുത്തതോടെയാണ് സര്‍ക്കുലര്‍ ഇറങ്ങിയത്. റിട്ടേണ്‍ സമര്‍പ്പിച്ചില്ലെങ്കില്‍ പിഴയും ഏഴുവര്‍ഷം വരെ തടവും കിട്ടുമെന്നാണ് മുന്നറിയിപ്പ്. കാലതാമസത്തിന് 10,000 രൂപയും അതിന് പുറമേ 5,000 രൂപയും പിഴയീടാക്കും. റിട്ടേണ്‍ സമര്‍പ്പിക്കാത്തതായി കണക്കാക്കി മൂന്നു മുതല്‍ ഏഴുവര്‍ഷം വരെ തടവ് ശിക്ഷ കിട്ടുമെന്നും സര്‍ക്കുലറില്‍ പറയുന്നു.
ആദായ നികുതി വകുപ്പ് ചെന്നൈ മേഖലാ കേന്ദ്രം പ്രിന്‍സിപ്പല്‍ കമ്മിഷണറുടേതാണ് സര്‍ക്കുലര്‍. ചെന്നൈ നഗരത്തിലെ 50 ശതമാനം സര്‍ക്കാര്‍ ഉദ്യോഗസ്ഥരും നികുതി റിട്ടേണ്‍ നല്കുന്നില്ലെന്ന് കണ്ടെത്തിയ സാഹചര്യത്തിലാണ് സര്‍ക്കുലര്‍ ഇറക്കിയത്.
റിട്ടേണില്‍ ശമ്പളത്തിനുപുറമേ മറ്റ് വരുമാനമുണ്ടെങ്കില്‍ അത് കാണിക്കണമെന്നും നിര്‍ദേശിക്കുന്നു. ഇത് മറച്ചുവെച്ചാലും പിഴയും തടവും ലഭിക്കും. സഹകരണസ്ഥാപനങ്ങളില്‍നിന്ന് കിട്ടുന്ന വരുമാനം കാണിക്കണമെന്നും പ്രത്യേകം പറയുന്നു. ആദ്യമായാണ് നികുതിറിട്ടേണ്‍ വൈകുന്നതിന് പിഴയീടാക്കുന്നത്. ഈ സാമ്പത്തികവര്‍ഷമാണ് ഇതിനായി പ്രത്യേക നിയമം പാസാക്കിയത്.

ജൂലായ് 31ന് റിട്ടേണ്‍ സമര്‍പ്പിച്ചില്ലെങ്കില്‍ പിഴ മാത്രമല്ല മാര്‍ച്ച് 31ന് ശേഷം റിട്ടേണ്‍ സമര്‍പ്പിക്കാനാകുകയുമില്ല.