ജനപ്രീതിയാര്‍ജിച്ച ടെലിവിഷന്‍ ക്വിസ് പരിപാടി \'കോന്‍ ബനേഗ ക്രോര്‍പതി\' (കെബിസി) യുടെ പേരില്‍ വന്‍ തട്ടിപ്പ് നടത്തിയതായി കണ്ടെത്തി . ഗുജറാത്തിലെ ബറൂച്ചില്‍ നിന്നുളള രത്‌നസിംഗ് രാജ് എന്ന കര്‍ഷകനില്‍ നിന്നാണ് പണം തട്ടിയെടുത്തത്. ശംഭുനാഥ് ഗോരഖ്‌നാഥ് മാജി എന്ന ബീഹാര്‍ സ്വദേശിയാണ് 1.7 കോടി രൂപയുടെ തട്ടിപ്പ് നടത്തിയത് .

രത്‌നസിംഗ് രാജ് നല്‍കിയ പരാതിയുടെ അടിസ്ഥാനത്തില്‍ കഴിഞ്ഞ ദിവസം ശംഭുനാഥ് ഗോരഖ്‌നാഥ് മാജിയെ അറസ്റ്റ് ചെയ്തു.
കോടതിയില്‍ ഹാജരാക്കിയ ഇയാളെ 10 ദിവസത്തേക്ക് റിമാന്‍ഡു ചെയ്തിരിക്കയാണ്.

രത്‌നസിംഗിന് 35 കോടിയുടെ ലോട്ടറി ലഭിച്ചിട്ടുണ്ടെന്ന് അറിയിക്കാനായി കെബിസിയില്‍ നിന്ന് വിളിക്കുകയാണെന്നു പറഞ്ഞുകൊണ്ടുള്ള മാജിയുടെ കോള്‍ കഴിഞ്ഞവര്‍ഷം നവംബറിലാണ് രത്‌നസിംഗിന് ആദ്യമായി ലഭിച്ചത്. എന്നാല്‍ ഈ പണം ലഭിക്കണമെങ്കില്‍ ബാങ്കില്‍ നികുതി അടയ്ക്കണമെന്നും അറിയിച്ചു.

കെബിസിയുടെ കോളില്‍ സംശയമൊന്നും തോന്നാതിരുന്ന സിംഗ്, അവര്‍ ആവശ്യപ്പെട്ട 1.7 കോടി രൂപ തന്റെ കൃഷിയിടം വിറ്റും മറ്റും സ്വരൂപിച്ച് അക്കൗണ്ടില്‍ നിക്ഷേപിക്കുകയും ചെയ്തു. എന്നാല്‍, അതോടെ മാജി തന്റെ മൊബൈല്‍ സ്വിച്ചോഫാക്കി മുങ്ങി.

പിന്നീട് പലതവണ ബന്ധപ്പെടാന്‍ ശ്രമിച്ചിട്ടും കഴിയാതെ വന്നതിനെ തുടര്‍ന്നാണ് സിംഗ് പോലീസില്‍ പരാതി നല്‍കിയത്. ഒടുവില്‍ അയാള്‍ ബാങ്കില്‍ നിന്ന് പണമെടുക്കാന്‍ വന്നപ്പോഴാണ് പോലീസ് കുടുക്കിയത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha