ഇന്ത്യയിലെ പുതുതലമുറ നിക്ഷേപകര്‍ക്കൊപ്പം അമിതാഭ് ബച്ചന്‍, സല്‍മാന്‍ ഖാന്‍ തുടങ്ങിയ മെഗാ സ്റ്റാറുകള്‍ കൂടി ക്രിപ്റ്റോകറന്‍സിയിലേയ്ക്ക് കടന്നതോടെ ഇന്ത്യയില്‍ കൂടുതല്‍ പ്രചാരം നേടിയിരിക്കുകയാണ്. ക്രിപ്റ്റോകറന്‍സികളിലെ 'പൊന്നെന്ന്' അറിയപ്പെടുന്ന ബിറ്റ്കോയിന്‍ 50 ലക്ഷം രൂപയ്ക്ക് അരികിലാണ് ചുവടുവെയ്ക്കുന്നത്. അതായത്, ഒരു ബിറ്റ്കോയിന്‍ വാങ്ങണമെങ്കില്‍ 50 ലക്ഷം രൂപ മുടക്കേണ്ട സാഹചര്യമാണ് ഇപ്പോള്‍.

ബിറ്റ്കോയിനൊപ്പം മറ്റു ക്രിപ്റ്റോകറന്‍സികളും ഉയര്‍ച്ചയുടെ പാതയിലാണ്. ഈ അവസരത്തില്‍ ഉത്സവകാലത്ത് വാങ്ങാന്‍ പറ്റിയ ചില ക്രിപ്റ്റോ കോയിനുകളെ ചുവടെ പരിചയപ്പെടാം.

കോസ്മോസ്

പരസ്പരപ്രവര്‍ത്തനക്ഷമത, സ്വതന്ത്ര ബ്ലോക്ക്ചെയിന്‍ ആശയങ്ങള്‍ മുറുക്കെപ്പിടിച്ചാണ് കോസ്മോസ് നിലകൊള്ളുന്നത്. എല്ലാ ബ്ലോക്ക്ചെയിനുകള്‍ക്കും പരസ്പരം ആശയവിനിമയം നടത്താന്‍ കഴിയണമെന്ന് കോസ്മോസ് വാദിക്കുന്നു. അടിക്കടിയുള്ള പരിണാമങ്ങള്‍ കോസ്മോസിന്റെ ആവാസവ്യവസ്ഥയില്‍ സംഭവിക്കുന്നുണ്ട്. അടുത്തിടെ കോര്‍ ടീമിലുണ്ടായ മാറ്റം കോസ്മോസിന്റെ പ്രവര്‍ത്തനക്ഷമത കൂടുതല്‍ വര്‍ധിപ്പിച്ചു. ക്രിപ്റ്റോ ഡോട്ട് കോം പോലുള്ള പ്രമുഖ പദ്ധതികളും ടെറ ലൂണ പോലുള്ള കോയിനുകളും കോസ്മോസിന്റെ ആവാസവ്യവസ്ഥയിലുണ്ട്.

വ്യാഴാഴ്ച്ച 3,084.98 രൂപയിലാണ് കോസ്മോസ് വ്യാപാരം നടത്തുന്നത്. കഴിഞ്ഞ 24 മണിക്കൂറിനിടെ 3,110 രൂപ വരെയുള്ള ഉയര്‍ച്ചയ്ക്കും 2,804.33 രൂപ വരെയുള്ള താഴ്ച്ചയ്ക്കും ഡിജിറ്റല്‍ ടോക്കണ്‍ സാക്ഷിയായിട്ടുണ്ട്. 2016 -ല്‍ അവതരിച്ച കോസ്മോസിന്റെ ഇപ്പോഴത്തെ വിപണി മൂല്യം 7.5 ബില്യണ്‍ ഡോളറാണ്. പാരഡൈം, ബെയിന്‍ കാപിറ്റല്‍, വണ്‍കണ്‍ഫര്‍മേഷന്‍ തുടങ്ങിയ പ്രമുഖ സ്ഥാപനങ്ങള്‍ കോസ്മോസില്‍ നിക്ഷേപം നടത്തിയിട്ടുണ്ട്.

ബിറ്റ്കോയിന്‍

ലോകത്തെ ആദ്യത്തെ വികേന്ദ്രീകൃത ഡിജിറ്റല്‍ കറന്‍സിയാണ് ബിറ്റ്കോയിന്‍. അതായത്, ഒരു കേന്ദ്ര സംവിധാനത്തിനും സാമ്ബത്തിക സ്ഥാപനങ്ങള്‍ക്കും കീഴിലല്ല ബിറ്റ്കോയിന്‍. ഉപയോക്താക്കള്‍ക്കാണ് ബിറ്റ്കോയിന്റെ പൂര്‍ണ നിയന്ത്രണം. ബ്ലോക്ക്ചെയിന്‍ ടെക്നോളജിയും ക്രിപ്റ്റോഗ്രഫിയും ഉപയോഗിച്ചാണ് ബിറ്റ്കോയിന്‍ ഇടപാടുകള്‍ നടത്തുന്നത്. ബ്ലോക്ക്ചെയിന്‍ ടെക്നോളജിയിലൂടെ ബിറ്റ്കോയിനും മറ്റു ക്രിപ്റ്റോകറന്‍സികളും വികേന്ദ്രീകൃത പെയ്മെന്റ് സാധ്യമാക്കുന്നു. ഇന്ന് 18 മില്യണില്‍പ്പരം ബിറ്റ്കോയിനുകള്‍ വിപണിയിലുണ്ട്. മൈക്രോസോഫ്റ്റ്, ഓവര്‍സ്റ്റോക്ക്, എടി ആന്‍ഡ് ടി പോലുള്ള പ്രമുഖ കമ്ബനികള്‍ ബിറ്റ്കോയിന്‍ പെയ്മെന്റ് മാര്‍ഗമായി സ്വീകരിക്കുന്നുണ്ട്.

എഫ്ടിഎക്സ് ടോക്കണ്‍

സാം ബാങ്ക്മാന്‍-ഫ്രിയഡും അലമേഡ റിസര്‍ച്ചും സ്ഥാപിച്ച എഫ്ടിഎക്സ് എക്സ്ചേഞ്ചിലെ കോയിനാണിത്. ക്രിപ്റ്റോ നിക്ഷേപങ്ങളിലൂടെ വന്‍നേട്ടം കയ്യടക്കിയ ബാങ്ക്മാന്‍-ഫ്രിയഡ്, അമേരിക്കന്‍ പ്രസിഡന്റ് ജോ ബൈഡന്റെ തിരഞ്ഞെടുപ്പ് ക്യാംപയിന് ഏറ്റവും ഉയര്‍ന്ന സംഭാവന നല്‍കിയ രണ്ടാമത്തെ വ്യക്തിയാണ്. ട്രേഡര്‍മാര്‍ക്ക് വേണ്ടി ട്രേഡര്‍മാര്‍ സ്ഥാപിച്ച എക്സ്ചേഞ്ചെന്നാണ് എഫ്ടിഎക്സ് അറിയപ്പെടുന്നത്. ദീര്‍ഘകാല നിക്ഷേപത്തിനാണ് എഫ്ടിഎക്സ് ടോക്കണ്‍ കൂടുതല്‍ അനുയോജ്യം.

അടുത്തകാലത്തായി വെഞ്ച്വര്‍ കാപ്പിറ്റലിസ്റ്റുകളില്‍ നിന്നും ഉയര്‍ന്ന തുക സമാഹരിക്കാന്‍ ടോക്കണിന് സാധിച്ചിട്ടുണ്ട്. ടോം ബ്രാഡി പോലുള്ള സെലിബ്രിറ്റികളുടെ പിന്തുണയും എഫ്ടിഎക്സിന്റെ താരത്തിളക്കത്തിന് കാരണമാവുന്നുണ്ട്. വ്യാഴാഴ്ച്ച 4,872 രൂപയിലാണ് എഫ്ടിടി വ്യാപാരം നടത്തുന്നത്. കഴിഞ്ഞ 24 മണിക്കൂറിനിടെ 5,000 രൂപ വരെയുള്ള ഉയര്‍ച്ചയ്ക്കും 4,750 രൂപ വരെയുള്ള താഴ്ച്ചയ്ക്കും ഡിജിറ്റല്‍ ടോക്കണ്‍ സാക്ഷിയായിട്ടുണ്ട്.