തൊഴിലിനായി മറ്റ് രാജ്യങ്ങളെ ആശ്രയിക്കുന്ന മലയാളികളുടെ സാധ്യതകള് ഇല്ലാതാകുന്നു
കേരളത്തില് നിന്നും തൊഴിലിനായി മറ്റ് രാജ്യങ്ങളിലേക്ക് പോകാനുള്ള മലയാളികളുടെ സാധ്യത ഇല്ലാതായിക്കൊണ്ടിരിക്കുകയാണ്. ഇനി വിദേശങ്ങളില് വലിയ തൊഴില് സാധ്യത കാണുന്നില്ല. ഗള്ഫ് രാജ്യങ്ങളും അമേരിക്കയും ഓസ്ട്രേലിയയുമൊന്നും കുടിയേറ്റക്കാരായ ജോലിക്കാരെ ഇപ്പോള് പ്രോത്സാഹിപ്പിക്കുന്നില്ല. ഗള്ഫ് രാജ്യങ്ങളില് പണിയെടുക്കുന്ന മലയാളികളുടെ പണമില്ലെങ്കില് കേരളവും ബംഗാളും തമ്മില് വലിയ വ്യത്യാസമില്ല.
അതുകൊണ്ട് ഇവിടെത്തന്നെ തൊഴിലവസരങ്ങള് സൃഷ്ടിക്കേണ്ടിയിരിക്കുന്നു. അതിന് വ്യവസായം വളരണം. സര്ക്കാരിന് വ്യവസായം നിലനിന്ന് പോകണമെന്ന് ആഗ്രഹമില്ലെങ്കില് കേരളം മറ്റൊരു ബംഗാളായി മാറും. ഗള്ഫ് മാത്രമാണ് ബംഗാളില് നിന്ന് ഇപ്പോള് കേരളത്തെ വേര്തിരിച്ച് നിര്ത്തുന്ന പ്രധാന ഘടകം.
വ്യവസായം കേരളത്തിന് ആവശ്യമാണ് എന്ന സന്ദേശം പ്രചരിപ്പിക്കേണ്ടതുണ്ട്. സര്ക്കാര് മികച്ച വ്യവസായികളെ പ്രോത്സാഹിപ്പിക്കാന് തയ്യാറാകണം. ഭരണകര്ത്താക്കളും മേലേതട്ടിലുള്ള ഉദ്യോഗസ്ഥരും വ്യവസായ സൗഹൃദ നിലപാട് സ്വീകരിക്കുമ്പോള്, നിയമം അറിയാത്ത പഞ്ചായത്ത് സെക്രട്ടറി മുതലുള്ളവര് വ്യവസായികളെ ബുദ്ധിമുട്ടിലാക്കാനാണ് മുന്നില് നില്ക്കുന്നത്. ഫയലുകള് എളുപ്പത്തില് നീങ്ങുന്നുണ്ടെന്ന് ഉറപ്പു വരുത്താന് സര്ക്കാര് തയ്യാറാകണം.
കേവലം പത്തു ശതമാനം തൊഴിലാളികളുടെ സമരം മൂലം, നല്ലരീതിയില് പ്രവര്ത്തിക്കുന്ന സിന്തൈറ്റ് എന്ന കമ്പനി ഇവിടെ പ്രവര്ത്തനം അവസാനിപ്പിച്ച് തമിഴ്നാട്ടിലേക്ക് ചേക്കേറാനുള്ള ശ്രമത്തിലാണ്. അതോടെ ഇല്ലാതാകുന്നത് 90 ശതമാനം തൊഴിലാളികളുടെ ജോലിയാണ്.
സര്ക്കാരിനെ കുറിച്ച് നല്ല പ്രതീക്ഷയും അഭിപ്രായവുമാണ് ഇതുവരെ ഉണ്ടായരുന്നത്് എന്നാല് സിന്തൈറ്റിലെ പ്രശ്നം കാര്യങ്ങളാകെ തകിടം മറിച്ചു. കേരളത്തെ മാത്രം ആശ്രയിച്ച് മുന്നോട്ട് പോകുന്നത് തിരിച്ചടിയാകുമോ എന്ന ഭയം പൊതുവേയുണ്ട്. വിദഗ്ധരായ തൊഴിലാളികളെ സൃഷ്ടിക്കുന്നതിനുള്ള നടപടിയാണ് സര്ക്കാരില്നിന്ന് സ്വീകരിക്കേണ്ടത്. തൊഴിലധിഷ്ഠിത കോഴ്സുകള്ക്ക് പ്രാധാന്യം നല്കി കേരളത്തിനകത്തെ വ്യവസായ ശാലകളില് അവര്ക്ക് പ്രായോഗിക പരിശീലനം നല്കുകയും ചെയ്താല് ഒരു പരിധി വരെ പരിഹാരമാകും.
https://www.facebook.com/Malayalivartha
