പുത്തന്‍ നിറഭേദങ്ങളുമായി ഡോമിനാറിന്റെ പുതിയ 400 സ്‌പോര്‍ട്‌സ് ക്രൂയിസര്‍ മോട്ടോര്‍സൈക്കിളുകള്‍ ഇന്ത്യയില്‍ പുറത്തിറങ്ങി. മൂന്ന് പുതിയ നിറങ്ങളിലാണ് പുത്തന്‍ ഡോമിനാറിന്റെ വരവ്.

റോക്ക് മാറ്റ് ബ്ലാക്, കാന്യോണ്‍ റെഡ്, ഗ്ലേസിയര്‍ ബ്ലൂ എന്നീ പുതിയ മൂന്ന് നിറഭേദങ്ങളാണ് 2018 ഡോമിനാര്‍ 400 നെ മികവുറ്റതാക്കുന്നത്.

ബോഡി നിറത്തിനൊപ്പം സ്റ്റാന്റേര്‍ഡായി ഗോള്‍ഡ് ഡസ്റ്റ് അലോയി വീലുകളും പുതുതായി ഉള്‍പ്പെടുത്തിയിട്ടുണ്ട്.

ഈ രണ്ട് മാറ്റങ്ങള്‍ ഒഴികെ മെക്കാനിക്കല്‍ ഫീച്ചേഴ്സിലും മറ്റും യാതൊരു മാറ്റങ്ങളും കമ്പനി വരുത്തിയിട്ടില്ല. 1.42 ലക്ഷം രൂപ എക്‌സ്‌ ഷോറൂം പ്രൈസ്ടാഗിലാണ് എ.ബി.എസ് ഇല്ലാത്ത ഡോമിനാര്‍ 400 ന്റെ വരവ്. അതേസമയം 1.56 ലക്ഷം രൂപയാണ് എ.ബി.എസോട് കൂടിയ ഡോമിനാര്‍ 400 ന്റെ ഡല്‍ഹി എക്‌സ്‌ഷോറൂം വില.

373.3 സിസി സിംഗിള്‍-സിലിണ്ടര്‍, ഫ്യൂവല്‍ ഇഞ്ചക്ടഡ്, ലിക്വിഡ്-കൂള്‍ഡ് എഞ്ചിനിലാണ് 2018 ബാജാജ് ഡോമിനാര്‍ 400 ന്റെ വരവ്.34.5 ബി.എച്ച്.പി കരുത്തും 35 എന്‍.എം ടോര്‍ക്കും ഉത്പാദിപ്പിക്കുന്ന എഞ്ചിനില്‍ 6 സ്പീഡ് ഗിയര്‍ബോക്‌സാണ് ഇടംപിടിക്കുന്നത്.

175 കിലോമീറ്ററാണ് പരമാവധി വേഗത, ഇരട്ട ചാനല്‍ എബിഎസിനൊപ്പം ടെലിസ്കോപിക് ഫ്രണ്ട് ഫോര്‍ക്സ്, പൂര്‍ണ ഡിജിറ്റല്‍ ഇന്‍സ്ട്രമെന്റ് ക്ലസ്റ്റര്‍, സെക്കന്ററി ഫ്യൂവല്‍ ടാങ്ക് ഡിസ്‌പ്ലെ, എല്‍.ഇ.ഡി ലൈറ്റുകളോടുള്ള ആകര്‍ഷകമായ ഹെഡ്‌ലാമ്പ്, എല്‍.ഇ.ഡി ടെയില്‍, സ്ലിപ്പര്‍ ക്ലച്ച്‌, മോണോഷോക്ക് സസ്പെന്‍ഷന്‍, മുന്നിലും പിന്നിലും ഡിസ്ക് ബ്രേക്ക് തുടങ്ങിയ സവിശേഷതകള്‍ വാഹനത്തിനുണ്ട്.

13 ലിറ്ററാണ് ഡോമിനാര്‍ 400 ന്റെ ഇന്ധനശേഷിയും 182 കിലോഗ്രാമുമാണ് ബജാജ് ഡോമിനാര്‍ 400 നുള്ളത്. 8.23 സെക്കന്‍ഡില്‍ പൂജ്യത്തില്‍ നിന്ന് നൂറ് കിലോമീറ്റര്‍ വേഗത കൈവരിക്കാന്‍ ഡോമിനാറിന് സാധിക്കും.

കെടിഎം ഡ്യൂക്ക് 200, ഹോണ്ട സിബിആര്‍ 250, റോയല്‍ എന്‍ഫീല്‍ഡ് ക്ലാസിക് 350, മഹീന്ദ്ര മോജോ എന്നിവരാണ് നിരത്തില്‍ ഡോമിനാറിന്റെ മുഖ്യ എതിരാളികള്‍. രാജ്യത്തെ എല്ലാ ബജാജ് ഡീലര്‍ഷിപ്പുകളിലും 2018 നിര ഡോമിനാര്‍ 400 ലഭ്യമാകും.