ഡ്രൈവറില്ലാ കാറുകളുടെ പരീക്ഷണയോട്ടത്തിലാണ് ഗൂഗിൾ ഉൾപ്പടെയുള്ള വമ്പൻ കാർ കമ്പനികൾ. എന്നാൽ അത്തരത്തിലുള്ളൊരു കണ്ടുപിടിത്തം വിജയം കൈവരിച്ചുവെന്ന വാദവുമായാണ് ജനറൽ മോട്ടോഴ്‌സ് രംഗത്തെത്തിയിരിക്കുന്നത്. സ്റ്റിയറിങ്ങും പെഡലുകളും ഇല്ലാതെ പുതിയ വാഹനം നിരത്തിലിറക്കാന്‍ തങ്ങള്‍ സന്നദ്ധരാണെന്നും തങ്ങളുടെ പരീക്ഷണങ്ങള്‍ക്ക് നൂറില്‍ നൂറു മാര്‍ക്കും ലഭിച്ചിരിക്കുന്നുവെന്നുമാണ് അവരുടെ അവകാശവാദം.

പുതിയ തലമുറയില്‍പ്പെട്ട വാഹനവിപണിയിലേക്ക് ഫുള്‍ ഓട്ടോമേഷന്‍ ടെക്നോളജിയുമായാണ് ജനറല്‍ മോട്ടോഴ്സ് എത്തുന്നത്. പുതിയ ക്രൂസ് എവി വിഭാഗത്തില്‍പ്പെട്ട ഷെവര്‍ലെ ബോള്‍ട്ട് ഇവി എന്ന വാഹനത്തില്‍ വെറുതെ കയറി ഇരുന്നാല്‍ മതി. ബ്രേക്ക് ഇല്ല, ആക്സിലേറ്റര്‍ ഇല്ല, സ്റ്റിയറിങ്ങ് ഇല്ല.

നിർദ്ദേശങ്ങൾ നൽകുന്നതനുസരിച്ച് വാഹനം തനിയെ നീങ്ങിത്തുടങ്ങും. എവിടേക്ക് പോകണം എന്നതു സംബന്ധിച്ച്‌ വാഹനത്തിനുള്ളിലെ മാപ്പില്‍ രേഖപ്പെടുത്തിയാല്‍ മതി. എത്ര വേഗത്തില്‍ പോകണമെന്നും എത്ര സമയം കൊണ്ട് എത്തണമെന്നും അറിയിച്ചാല്‍ കൃത്യമായി വാഹനം അപകടമേതും കൂടാതെ ലക്ഷ്യസ്ഥാനത്ത് വാഹനത്തിലുള്ളവരെ എത്തിക്കും.

ലേസര്‍ സെന്‍സര്‍, ക്യാമറ, റഡാര്‍ എന്നിവയെ വാഹനത്തിനുള്ളിലെ സാങ്കേതിക വിദ്യകളുടെ സഹായത്തോടെയാണ് കാറിന്റെ പ്രവര്‍ത്തനം. ഇതിനായി പ്രത്യേകമായി രൂപകല്‍പ്പന ചെയ്ത മാപ്പിങ് ടെക്നോളജിയുടെ സഹായത്തോടെയാണ് കാറിന്റെ സഞ്ചാരം. ഫീനിക്സിലെയും സാന്‍ഫ്രാന്‍സിസ്‌കോയിലെയും തിരക്കേറിയ നഗരത്തില്‍ കാറിന്റെ പരീക്ഷണ ഓട്ടം അവസാനിച്ചതിനു പിന്നാലെയാണ് വാണിജ്യാടിസ്ഥാനത്തില്‍ വാഹനം വില്‍ക്കാന്‍ തയാറാണെന്ന് ജനറല്‍ മോട്ടോഴ്സ് അറിയിച്ചത്.

ഇത്തരത്തിൽ ലോകത്തിൽ ആദ്യത്തെ പ്രൊഡക്ഷൻ വാഹനങ്ങളാണ് ജനറൽ മോട്ടോഴ്സ് ഇപ്പോൾ പ്രഖ്യാപിച്ചിരിക്കുന്നത്. ഇതു സംബന്ധിച്ച സുരക്ഷ മാനദണ്ഡങ്ങളുമായി മുന്നോട്ടു പോകാനായി യുഎസ് ഡിപാർട്മെന്റ് ഓഫ് ട്രാൻസ്പോർട്ടേഴ്സിനു ജിഎം കത്തു നൽകി. അടുത്ത വർഷം വാഹനം വിപണിയിലെത്തിക്കാൻ സാധിക്കുമെന്നാണ് ജിഎം പ്രതീക്ഷിക്കുന്നത്.

വീഡിയോ കാണുക...