ടാറ്റാ ഗ്രൂപ്പിന് കീഴിലുള്ള ഒരു ഇന്ത്യൻ വാഹന നിർമ്മാണ കമ്പനിയാണ് ടാറ്റാ മോട്ടോർസ്. ലോകത്തിലെ പതിനെട്ടാമത്തെ വലിയ വാഹന നിർമ്മാതാവും,നാലാമത്തെ വലിയ ട്രക്ക് നിർമ്മാണ കമ്പനിയും,രണ്ടാമത്തെ വലിയ ബസ്‌ നിർമ്മാതാക്കളുമാണ് ടാറ്റാ മോട്ടോർസ്. ടാറ്റ മോട്ടോര്‍സിന്‍റെ സബ് ബ്രാന്‍ഡ് ടാമോ ശ്രേണിയിലെ ആദ്യ വാഹനം 'റെയ്‌സ്മോ' ഇന്ത്യയിലെത്തുകയാണ്.

ജനീവ മോട്ടോര്‍ ഷോയില്‍ കാര്‍പ്രേമികളെ ഞെട്ടിച്ച് ടാറ്റ മോട്ടോര്‍സ് അഥവാ ടാറ്റ മൊബിലിറ്റി (ടാമോ) അവതരിപ്പിച്ച ആദ്യ ടൂ-ഡോര്‍ സ്‌പോര്‍ട്‌സ് കൂപ്പെയാണ് റെയ്‍സ്‍മോ. വമ്പൻമാരായ സൂപ്പര്‍ കാറുകളെ വെല്ലുന്ന രൂപത്തിനൊപ്പം അത്യാഡംബരവും ചേര്‍ത്ത് അണിയിച്ചൊരുക്കുന്ന റെയ്‌സ്മോ ദില്ലി ഓട്ടോ എക്സ്പോയില്‍ അവതരിപ്പിക്കുമെന്നാണ് റിപ്പോർട്ടുകൾ. ടാറ്റയുടെ മോഫ്‌ളെക്‌സ് പ്ലാറ്റ്‌ഫോമിലൊരുങ്ങുന്ന വാഹനം റെയ്‌സ്മോ, റെയ്‌സ്മോ പ്ലസ് എന്നീ രണ്ട് പതിപ്പുകളിലാണെത്തുന്നത്.

മൈക്രോസോഫ്റ്റുമായി ഒന്നിച്ച് പുതിയ കണക്റ്റഡ് ടെക്‌നോളജി വഴിയാണ് ടാറ്റയുടെ സ്‌പോര്‍ട്‌സ് കാര്‍ അരങ്ങേറ്റം. രണ്ടു വശങ്ങളിലേക്കും ചിറകുവിരിച്ച് തുറക്കാവുന്ന ഡബിള്‍ ഡോറാണ് ഇതിന്റെ പ്രധാന ആകര്‍ഷണം.പിറകിൽ ടെയില്‍ ലാമ്പിന് നടുവിലായാണ് എക്‌സ്‌ഹോസ്റ്റിന്റെ സ്ഥാനം. മൂര്‍ച്ചയേറിയ എല്‍ഇഡി ഹെഡ്‌ലാമ്പുകള്‍ റെയ്‌സ്‌മോയുടെ അഗ്രസീവ് മുഖഭാവത്തെ കാര്യമായി സ്വാധീനിച്ചിട്ടുണ്ട്. ബട്ടര്‍ഫ്‌ളൈ ഡോറുകള്‍ക്കൊപ്പം കുറഞ്ഞ ഗ്രൗണ്ട് ക്ലിയറന്‍സുമൊക്കെ റേസ് ട്രാക്ക് പാരമ്പര്യത്തെ ഉയര്‍ത്തിപ്പിടിക്കുന്നു.

1.2 ലിറ്റര്‍ ടര്‍ബ്ബോചാര്‍ജ്ഡ് ത്രീ-സിലിണ്ടര്‍ പെട്രോള്‍ എഞ്ചിനാണ് റെയ്‌സ്‌മോയുടെ പവര്‍ഹൗസ്. പരമാവധി 6500 ആര്‍പിഎമ്മില്‍ 190 പിഎസ് കരുത്തും 2500 ആര്‍പിഎമ്മില്‍ 210 എന്‍എം ടോര്‍ക്കും സൃഷ്‍ടിക്കും ഈ എഞ്ചിന്‍. 6 സ്പീഡ് ഓട്ടോമാറ്റിക് ഗിയര്‍ബോക്‌സാണ് ട്രാന്‍സ്‍മിഷന്‍. വെറും ആറ് സെക്കന്‍ഡിനുള്ളില്‍ പൂജ്യത്തില്‍ നിന്ന് 100 കിലോമീറ്റര്‍ വേഗത കൈവരിക്കാന്‍ റെയ്‌സ്മോയ്ക്ക് കഴിയും. 800 കിലോഗ്രാമാണ് റെയ്‌സ്‌മോയുടെ ഭാരം.