വാട്സാപ്പിനെ ഫേസ്ബുക്ക് ഏറ്റെടുത്തതോടെയാണ് നിരവധി സവിശേഷതകൾ അവതരിപ്പിച്ചത്. ഇതിൽ പ്രധാനപ്പെട്ട ഒന്നായിരുന്നു " ഡിലീറ്റ് ഫോർ എവെരിവൺ " ഓപ്ഷൻ. വാട്ട്സാപ്പ് സന്ദേശങ്ങള്‍ ഒരു നിശ്ചിത സമയത്തിനുള്ളിൽ ഡിലീറ്റ് ചെയ്യുന്നതിനുള്ള സംവിധാനമാണ് ഈ ഓപ്ഷനിൽ ഉള്ളത്.

ആദ്യം ഈ ഓപ്ഷൻന്റെ സമയ പരിധി ഒരു മിനിറ്റ് വരെയായിരുന്നു. എന്നാൽ പിന്നീട് ഉപഭോക്താക്കളുടെ അഭ്യര്‍ത്ഥന പ്രകാരം സന്ദേശങ്ങള്‍ ഡിലീറ്റ് ചെയ്യുന്നതിനുള്ള സമയ പരിധി ഏഴു മിനിറ്റായി ഉയര്‍ത്തുകയായിരുന്നു.

നിലവിലെ ഏഴു മിനിറ്റില്‍നിന്ന് ഒരു മണിക്കൂര്‍ എട്ട് മിനിറ്റ് 16 സെക്കന്റ് സമയമാക്കി വര്‍ധിപ്പിക്കാനാണ് വാട്ട്സാപ്പ് ലക്ഷ്യമിടുന്നത്. പുതിയ പദ്ധതിയുമായി സംബന്ധിച്ച വിവരം വഫീറ്റാ ഇന്‍ഫോയാണ് പുറത്ത് വിട്ടിരിക്കുന്നത്.

വാട്ട്സാപ്പിന്റെ ആന്‍ഡ്രോയിഡ് ബീറ്റാ പതിപ്പ് 2.18.69 ല്‍ പുതിയ സൗകര്യം ഉപഭോക്താക്കള്‍ക്ക് ലഭിച്ചു തുടങ്ങി. ഉടന്‍തന്നെ ആന്‍ഡ്രോയിഡ്, ഐഒഎസ് സ്റ്റേബിള്‍ പതിപ്പുകളിലേക്ക് പുതിയ അപ്ഡേറ്റ് എത്തുമെന്നാണ് വിവരം.

2016 നവംബറിലാണ് സന്ദേശങ്ങള്‍ നീക്കം ചെയ്യുന്നതിനുള്ള സംവിധാനം വാട്ട്സാപ്പ് അവതരിപ്പിച്ചത്. ചിത്രങ്ങളും വീഡിയോകളും ഡിലീറ്റ് ഓപ്ഷനിലൂടെ നീക്കം ചെയ്യാന്‍ സാധിക്കും. എന്നാൽ സന്ദേശങ്ങള്‍ ഡിലീറ്റ് ചെയ്യുന്ന വിവരം അയച്ച വ്യക്തിക്കും സ്വീകര്‍ത്താവിനും ലഭിക്കും.