ടെലികോം രംഗത്ത് വൻ വിപ്ലവത്തിനു തുടക്കമിട്ട മുകേഷ് അംബാനിയുടെ റിലയൻസ് ജിയോ ഇപ്പോൾ ഡി.ടി.എച്ച്‌​ വ്യവസായത്തിലേക്കും ചുവടുവയ്ക്കുന്നതായി റിപ്പോർട്ടുകൾ. ജിയോ ഹോം ടി.വി എന്ന പേരില്‍ ഡി.ടി.എച്ച്‌​ സേവനം ആരംഭിക്കാനുള്ള നീക്കത്തിലാണ്​ റിലയന്‍സ്.

കമ്പനിയുടെ ആദ്യപടി പരീക്ഷണങ്ങള്‍ പൂര്‍ത്തിയാക്കി കഴിഞ്ഞു. വൈകാതെ തന്നെ ഒൗദ്യോഗികമായി സേവനം ആരംഭിക്കുമെന്നാണ്​ സൂചന. ജിയോ ഡി.ടി.എച്ച്‌​ സേവനങ്ങള്‍ 200, 400 എന്നിങ്ങനെ രണ്ട്​ പ്ലാനുകളിലായിരിക്കും ആരംഭിക്കുക.

200 രൂപയുടെ പ്ലാനില്‍ എസ്​.ഡി ചാനലുകളും 400 രൂപക്ക്​ എച്ച്‌​.ഡി ചാനലുകളുമാവും ജിയോ നല്‍കുക. ജിയോയുടെ ടി.വി ആപ്​ ഉപയോഗിച്ച്‌​ ഡി.ടി.എച്ച്‌​ സേവനങ്ങളുടെ പരീക്ഷണം കമ്പനി നടത്തിയെന്നാണ്​ അറിയുന്നത്.

അതേസമയം, ജിയോ ചൈനീസ്​ നിര്‍മാതാക്കളായ ഷവോമിയുമായി ചേര്‍ന്ന്​ മൊബൈല്‍ റീടെയില്‍ വിപണിയിലും ചില പരീക്ഷണങ്ങള്‍ക്ക്​ ഒരുങ്ങുന്നതായും റിപ്പോർട്ടുകളുണ്ട്. ഷവോമിയുടെ ഫോണുകള്‍ റിലയന്‍സ്​ ഡിജിറ്റല്‍ സ്​റ്റോറുകള്‍ വഴി വില്‍ക്കാനാണ്​ പദ്ധതി. ഇതുസംബന്ധിച്ച ചര്‍ച്ചകളും കമ്പനി നടത്തുന്നതായാണ്​ റിപ്പോര്‍ട്ട്.