രാജ്യത്തെ മുൻനിര ഓൺലൈൻ ഷോപ്പിംഗ് കമ്പനിയായ ആമസോണ്‍ ഇന്ത്യയില്‍ പുതിയ പദ്ധതികൾ ആവിഷ്കരിക്കാനൊരുങ്ങുന്നതായി റിപ്പോർട്ടുകൾ. ഒരു അടുക്കളയിലേക്ക് വേണ്ട പലചരക്ക്​, പച്ചക്കറി, ഇറച്ചി തുടങ്ങിയ ഉല്‍പന്നങ്ങള്‍ രണ്ടു മണിക്കുറിനകം വീട്ടിലെത്തിക്കുന്ന പദ്ധതി നടപ്പാക്കാനാണ്​ കമ്പനിയുടെ തീരുമാനം.

ഇന്ത്യയില്‍ എവിടേക്കും ഓണ്‍ലൈന്‍ ഓര്‍ഡറുകള്‍ വഴി ഗ്രോസറി ഉല്‍പന്നങ്ങള്‍ എത്തിച്ചു നല്‍കുന്ന പദ്ധതിയായ 'ആമസോണ്‍ ഫ്രഷ്' അഞ്ച് വര്‍ഷം കൊണ്ട് സാക്ഷാത്കരിക്കും. പലചരക്കു ഉത്പന്നങ്ങള്‍, പച്ചക്കറി, ഇറച്ചി, പഴങ്ങള്‍ തുടങ്ങി ഏത് സാധനങ്ങളും രണ്ട് മണിക്കൂര്‍ കൊണ്ട് വീടുകളിലെത്തിക്കുന്ന പദ്ധതിയാണ് ആമസോണ്‍ ഫ്രഷ് കൊണ്ട് ഉദ്ദേശിക്കുന്നത്.

അതേസമയം സോപ്പ്​, ക്രീമുകള്‍, ബേക്കിങ്​ ഉത്​പന്നങ്ങള്‍, സുഗന്ധവ്യജ്ഞനങ്ങള്‍, ​ ക്ലീനിംഗ് പ്രൊഡക്ടുകള്‍ തുടങ്ങി ഇപ്പോള്‍ തന്നെ ഒരു വലിയ വിഭാഗം ഉത്പന്നങ്ങള്‍ ആമസോണ്‍ വഴി ലഭ്യമാണ്. ഇത് മറ്റ് ഗ്രോസറി, വെജിറ്റബിള്‍ വിഭാഗങ്ങളിലേക്ക് കൂടി വ്യാപിപ്പിക്കാനാണ് കമ്പനിയുടെ തീരുമാനം.

'ആമസോണ്‍ ഫ്രഷ് എപ്പോള്‍ സാക്ഷാത്കരിക്കുമെന്ന് എനിക്കിപ്പോ പറയാനാവില്ല. പക്ഷേ അടുത്ത അഞ്ച് വര്‍ഷത്തിനുള്ളില്‍ അത് യാഥാര്‍ത്ഥ്യമാവും. ഉരുളക്കിഴങ്ങോ, ഐസ്‌ക്രീമോ, ഇറച്ചിയോ എന്തും ഞങ്ങള്‍ രണ്ട് മണിക്കൂറിനുള്ളില്‍ നിങ്ങളുടെ വീടുകളിലെത്തിക്കും.' - ആമസോണ്‍ ഇന്ത്യ തലവന്‍ അമിത് അഗര്‍വാള്‍ പറഞ്ഞു.

യു.എസില്‍ മുൻപേ തന്നെ പരീക്ഷിച്ച്‌ വിജയിച്ച പദ്ധതിയാണ് ആമസോണ്‍ ഫ്രഷ്. നിലവില്‍ ഇന്ത്യയില്‍ പാന്‍ട്രി എന്ന പേരില്‍ ആമസോണ്‍ ചെറിയ തോതില്‍ ഗ്രോസറി ഡെലിവറി സേവനങ്ങള്‍ നടത്തുന്നുണ്ട്. ഇത് വിപുലീകരിച്ച്‌ പ്രാദേശിക കച്ചവടക്കാരുമായി ചേര്‍ന്ന് ആമസോണ്‍ ഫ്രഷ് ആക്കിമാറ്റാനാണ് തീരുമാനം. ഇതോടെ അടുത്ത അഞ്ച് വര്‍ഷം കൊണ്ട് ആമസോണിന്റെ ഇന്ത്യയിലെ കച്ചവടത്തില്‍ പകുതിയിലധികവും ഗ്രോസറി വിഭാഗമായിരിക്കുമെന്നാണ് കമ്പനി കണക്കുകൂട്ടുന്നത്.