പുതിയ മാരുതി സിയാസ് ഫെയ്‌സ്‌ലിഫ്റ്റ് ഒക്ടോബര്‍ മാസം വിപണിയില്‍ എത്തുമെന്ന് റിപ്പോര്‍ട്ട്. 2014 ല്‍ വിപണിയില്‍ എത്തിയ സിയാസില്‍ ഇതുവരെയും കാര്യമായ മാറ്റങ്ങളൊന്നും മാരുതി വരുത്തിയിട്ടില്ല. ഈ ആക്ഷേപം മാരുതി കുറേനാളായി കേള്‍ക്കുന്നു. പുതിയ ഫെയ്‌സ്‌ലിഫ്റ്റ് പതിപ്പ് മാരുതിയുടെ മുഖം രക്ഷിക്കുമെന്നാണ് റിപ്പോര്‍ട്ട്

പുതിയ ബമ്പറും പുതിയ ഗ്രില്ലുമാണ് സിയാസ് ഫെയ്‌സ്‌ലിഫ്റ്റിന് ലഭിക്കുന്നത്. പുത്തന്‍ ഡിസൈനിലുള്ള 16 ഇഞ്ച് അലോയ് വീലുകളില്‍ സിയാസ് ഫെയ്‌സ്‌ലിഫ്റ്റിനെ പ്രതീക്ഷിക്കാം. ഏറ്റവും പുതിയ K15B 1.5 ലിറ്റര്‍ പെട്രോള്‍ എഞ്ചിന്‍ സിയാസ് ഫെയ്‌സ്‌ലിഫ്റ്റില്‍ ലഭ്യമാവും. 

പുതിയ പെട്രോള്‍ എഞ്ചിന്‍ 103.2 bhp കരുത്തും 138.4 Nm ടോര്‍ക്കും സൃഷ്ടിക്കുന്നതാണ്. നിലവില്‍ 91.2 Nmകരുത്തും 130 Nmടോര്‍ക്കുമാണ് 1.4 ലിറ്റര്‍ സിയാസ് ഉത്പാദിപ്പിക്കുന്നത്. അഞ്ചു സ്പീഡാണ് മാനുവല്‍ ഗിയര്‍ബോക്‌സ്. 

പെട്രോള്‍ പതിപ്പിന് പുറമെ 1.3 ലിറ്റര്‍ ഡീസല്‍ ഹൈബ്രിഡ് പതിപ്പും സിയാസില്‍ ലഭ്യമാണ്. ഡീസല്‍ എഞ്ചിന് 88.5 bhp കരുത്തും 200 Nm ടോര്‍ക്കും പരമാവധി സൃഷ്ടിക്കാനാവും. ഡീസല്‍ ഹൈബ്രിഡില്‍ അഞ്ചു സ്പീഡ് മാനുവല്‍ ഗിയര്‍ബോക്‌സ് മാത്രമാണ്. നിലവില്‍ എട്ടു ലക്ഷം രൂപ മുതല്‍ 12 ലക്ഷം രൂപ വരെയാണ് മാരുതി സിയാസുകളുടെ എക്‌സ്‌ഷോറൂം വില. സിയാസിന്റെ ഉയര്‍ന്ന വകഭേദങ്ങളില്‍ സണ്‍റൂഫും ഉണ്ടാകുമെന്നാണ് റിപ്പോര്‍ട്ട്.