യൂണിയൻ പബ്ലിക് സർവീസ് കമ്മീഷൻ നടത്തുന്ന ഇ.പി.എഫ്.ഒ പരീക്ഷ സെപ്റ്റംബർ 5ന്. എംപ്ലോയീസ് പ്രോവിഡന്റ് ഫണ്ട് ഓർഗനൈസേഷനിൽ എൻഫോഴ്സ്മെന്റ് ഓഫീസർ/ അക്കൗണ്ട്സ് ഓഫീസർ തസ്തികയിലെ നിയമനത്തിനായാണ് പരീക്ഷ നടക്കുന്നത്.

ആകെ 421 ഒഴിവുകളാണുള്ളത്. നേരത്തെ 2020 ഒക്ടോബർ 4നാണ് പരീക്ഷ നടത്താൻ തീരുമാനിച്ചിരുന്നത്. എന്നാൽ യു.പി.എസ്.സി സിവിൽ സർവീസ് പരീക്ഷ ഇതേ തീയതിയിലേക്ക് ഷെഡ്യൂൾ ചെയ്തതിനാൽ ഇത് നീട്ടിവെക്കുകയായിരുന്നു.

യു.പി.എസ്.സി ഇ.പി.എഫ്.ഒ പരീക്ഷയുടെ അഡ്മിറ്റ് കാർഡ് ഔദ്യോഗിക വെബ്സൈറ്റിൽ നിന്ന് ഇപ്പോൾ ഡൗൺലോഡ് ചെയ്യാനാകും. പരീക്ഷയ്ക്കെത്തുന്നവർ നിർബന്ധമായും അഡ്മിറ്റ് കാർഡ് കൈയിൽ കരുതണം. പാസ്പോർട്ട് സൈസ് ഫോട്ടോയും കൈവശമുണ്ടായിരിക്കണം. ഇതിന് പുറമെ ആധാർ കാർഡ്, ഡ്രൈവിംഗ് ലൈസൻസ്, പാസ്പോർട്ട്, വോട്ടർ ഐ.ഡി എന്നിവയിലേതെങ്കിലും കൈയിലുണ്ടാവണം.

രാവിലെ 10 മുതൽ ഉച്ചയ്ക്ക് 12 വരെയാണ് പരീക്ഷ. റിപ്പോർട്ടിംഗ് ടൈം പിന്നീട് അറിയിക്കും. ഉദ്യോഗാർത്ഥികൾക്കുള്ള സീറ്റിംഗ് പ്ലൻ പരീക്ഷാ കേന്ദ്രത്തിൽ പ്രദർശിപ്പിച്ചിട്ടുണ്ടാകും. എല്ലാ ഉദ്യോഗാർത്ഥികളും നിർബന്ധമായും മാസ്ക് ധരിച്ചിരിക്കണം.

മാസ്കില്ലാതെ എത്തുന്നവരെ പരീക്ഷയെഴുതാൻ അനുവദിക്കില്ല. കൊവിഡ് സുരക്ഷാ മാനദണ്ഡങ്ങൾ കർശനമായി പാലിച്ചിരിക്കണം. സാമൂഹിക അകലവും വ്യക്തി ശുചിത്വവും ഉറപ്പു വരുത്തുക. പരീക്ഷാ ഹാളിൽ മൊബൈൽ ഫോൺ, മറ്റ് ഇലക്ട്രോണിക് ഉപകരണങ്ങൾ എന്നിവ നിരോധിച്ചിട്ടുണ്ട്.