ലോകത്ത് എല്ലായിടത്തും എന്നപോലെ ഗൾഫ് നാടുകളെയും കോവിഡ് പിടിച്ചുലച്ചു..തൊഴിൽ രംഗത്താണ് ഒരുപക്ഷെ ഏറ്റവും കൂടുതൽ നഷ്ടം ഉണ്ടായത് എന്ന് പറയാം പുതിയ തൊഴിലവസരങ്ങൾ ഒന്നും തന്നെ ഉണ്ടായില്ലെന്ന് മാത്രമല്ല, അനേകം പേർക്ക് ജോലി നഷ്ടമാവുകയും ചെയ്തു.. .

എന്നാലിപ്പോൾ കൊവിഡ് നിയന്ത്രണ വിധേയമായതോടെ യുഎഇ വ്യോമയാന രംഗം ഏറെക്കുറെ സാധാരണ നിലയിലേക്ക് മടങ്ങി വരികയാണ്. ഇതിന്റെ സൂചനായായാണ് പുതിയ റിക്രൂട്ട്‌മെന്റ് ഡ്രൈവ് വിലയിരുത്തപ്പെടുന്നത്.

ദുബായിലെ എമിറേറ്റ്‌സ് എയര്‍ലൈന്‍സിലും കുവൈറ്റ് പെട്രോളിയം കോര്‍പറേഷനിലും ആയിരക്കണക്കിന് തൊഴിലവസരങ്ങള്‍ റിപ്പോർട്ട് ചെയ്തിട്ടുണ്ട് . എമിറേറ്റ്‌സില്‍ 3500ലേറെയും കുവൈറ്റ് എണ്ണക്കമ്പനി 1500ഓളവും ജീവനക്കാരെയാണ് നിയമിക്കുന്നത്.

അടുത്ത ആറു മാസത്തിനകം 3000 കാബിന്‍ ക്രൂ അംഗങ്ങളെയും 500 എയര്‍പോര്‍ട്ട് സര്‍വീസ് ജീവനക്കാരെയും നിയമിക്കാനാണ് എമിറേറ്റ്‌സ് എയര്‍ലൈന്‍സ് ഒരുങ്ങുന്നത്

ലോകത്തിന്റെ വിവിധ ഭാഗങ്ങളില്‍ നിന്ന് വിമാനകമ്പനിയുടെ ദുബായ് ഹബ്ബിലേക്കാണ് നിയമനം. www.emiratesgroupcareers.com എന്ന വെബ്‌സൈറ്റിലൂടെ ഉദ്യോഗാര്‍ഥികള്‍ക്ക് നേരിട്ട് അപേക്ഷ നല്‍കാം.

കൊവിഡിന് മുമ്പുള്ള എമിറേറ്റ്‌സിന്റെ 70 ശതമാനം സര്‍വീസുകളും ഈ വര്‍ഷാവസാനത്തോടെ പുനസ്ഥാപിക്കാനാവുമെന്ന പ്രതീക്ഷയിലാണ് കൂടുതല്‍ ജീവനക്കാരെ എയര്‍ലൈന്‍സ് നിയമിക്കുന്നത്.

യുഎഇ പല രാജ്യങ്ങളിലേക്കുമുള്ള യാത്രാ നിരോധനം നീക്കിയതോടെ കൊവിഡ് കാലത്ത് പിരിച്ചുവിടപ്പെട്ട പൈലറ്റുമാരെയും കാബിന്‍ ക്രൂ ജീവനക്കാരെയും എമിറേറ്റ്‌സ് തിരിച്ചുവിളിച്ചിരുന്നു. എക്‌സ്‌പോ 2020 പ്രമാണിച്ച് രാജ്യത്തേക്കുള്ള വിമാന സര്‍വീസുകളുടെ എണ്ണം കൂടുമെന്ന പ്രതീക്ഷയിലാണ് യുഎഇ വ്യോമയാന രംഗം.

കുവൈറ്റ് പെട്രോളിയം കോര്‍പറേഷനും വിവിധ സ്ഥാപനങ്ങളിലേക്കായി ആയിരത്തി അഞ്ഞൂറോളം ജീവനക്കാരെ അടുത്ത ഏതാനും മാസങ്ങള്‍ക്കകം നിയമിക്കുന്നത്തിനുള്ള തയ്യാറെടുപ്പുകൾ തുടങ്ങിക്കഴിഞ്ഞു . സ്വദേശികള്‍ക്കും വിദേശികള്‍ക്കും ഇതുവഴി തൊഴിലവസരങ്ങള്‍ ലഭിക്കും. കൊവിഡ് പ്രതിസന്ധിയെ തുടര്‍ന്നും കുവൈറ്റ് വല്‍ക്കരണത്തിന്റെ ഭാഗമായും പിരിച്ചുവിടപ്പെട്ട ജീവനക്കാര്‍ക്കു പകരമായാണ് പുതിയ റിക്രൂട്ട്‌മെന്റ് നടത്തുന്നത്.

കുവൈറ്റ് ഓയില്‍ കമ്പനി, കുവൈറ്റ് നാഷനല്‍ പെട്രോളിയം കമ്പനി, കുവൈറ്റ് ഓയില്‍ ടാങ്കേഴ്‌സ് കമ്പനി എന്നിവിടങ്ങളിലാണ് കൂടുതല്‍ നിയമനങ്ങളും നടക്കുക. കമ്പനികള്‍ ആരംഭിക്കാന്‍ പോകുന്ന പുതിയ പ്രൊജക്ടുകളിലേക്കായിരിക്കും നിയമനമെന്നും അധികൃതര്‍ വ്യക്തമാക്കിയിട്ടുണ്ട് .

കുവൈത്ത് ഓയില്‍ കമ്പനിയില്‍ മാത്രം 443 ടെക്നിക്കല്‍ തൊഴില്‍ ഒഴിവുകളുണ്ട്. നാഷണല്‍ പെട്രോളിയം കമ്പനിയില്‍ ഇത് 736 ഒഴിവുകൾ ആണ് റിപ്പോർട്ട് ചെയ്യപ്പെട്ടിട്ടുള്ളത് . കുവൈത്തി ഓയില്‍ ടാങ്കേഴ്സില്‍ 57 ഒഴിവുകളാണ് ഉള്ളത്.

ഭാവിയിലെ പദ്ധതികളുടെയും എണ്ണമേഖലയിലെ മൊത്തത്തിലുള്ള പ്രവർത്തനത്തിന്റെയും അടിസ്ഥാനത്തിൽ തൊഴിൽ പ്രത്യേക തൊഴിൽ ഗ്രൂപ്പുകളുടെ ആവശ്യങ്ങൾക്കനുസൃതമായി എണ്ണ മേഖലയിൽ ലഭ്യമായ തൊഴിൽ ഒഴിവുകൾ കണക്കാക്കുന്നുവെന്നും അതിനുശേഷം നിയമനം നടത്തുന്നുവെന്നും കമ്പനികൾ അറിയിച്ചു