ഇന്ത്യക്കാർക്ക് ,പ്രത്യേകിച്ച് മലയാളികൾക്ക് അന്യ നാടുകളിൽ പോയി ജോലി നോക്കുക എന്നത് ഒരു പുതിയ സംഭവമല്ല, വളരെ നാളുകൾക്ക് മുൻപ് തന്നെ ഗൾഫിലെ മരുപ്പച്ചകൾ തേടി മലയാളികൾ പോയിട്ടുണ്ട്. ഇന്നും ധാരാളം ആളുകൾ ഗൾഫ് മേഖലയിൽ ജോലി ചെയ്യുന്നുമുണ്ട്. കേരളത്തിന്റെ വരുമാനത്തിന്റെ ഒരു പ്രധാനഭാഗം  ഗൾഫ്   മലയാളികളുടെ അധ്വാനത്തിന്റെ ഫലമാണ്

അടുത്തകാലത്തായി US ,UK എന്നിവിടങ്ങളിലേക്കും തൊഴിൽതേടി പോകുന്നവരുടെ എണ്ണത്തിൽ വൻ വർധന ഉണ്ടായിട്ടുണ്ട്. കോവിഡ് കാലത്തു ഒന്ന് പിന്നാക്കം വെച്ചിരുന്നെങ്കിലും കൊവിഡ് നിയന്ത്രണങ്ങളിൽ ഇളവ് വന്നതോടെ വിദേശത്തു ഉന്നതപഠനത്തിനും  ജോലിക്കായും പോകുന്ന മലയാളി യുവാക്കളുടെ തിരക്കായി തുടങ്ങിയിട്ടുണ്ട്

വിദേശ രാജ്യങ്ങളിൽ മലയാളിയ്ക്ക് ഏറ്റവും പ്രിയം കാനഡയോടാണ്‌. കൂടുതൽ കാലം വിസയും ഉയർന്ന ശമ്പളത്തിൽ ജോലിയും തന്നെയാണ് മുഖ്യ ആകർഷണം .

പഠനം കഴിഞ്ഞാലും എട്ടുവർഷം കൂടി താമസിക്കാൻ വിസ ലഭിക്കുന്നതും ഉയർന്ന ശമ്പളത്തോടെയുള്ള തൊഴിൽ സാദ്ധ്യതയുമാണ് മറ്റ് വിദേശ രാജ്യങ്ങളിൽ നിന്ന് കാനഡയെ വ്യത്യസ്തമാക്കുന്നത് .. അതിനാൽ ഇവിടെ ഉന്നത പഠനത്തിന് പ്രവേശനം നേടുന്നവരുടെ എണ്ണം കൂടുതലാണ്.

കാനഡയിലെ വിവിധ സ്ഥാപനങ്ങളും സർവകലാശാലകളും ഇപ്പോൾ പ്രവേശനനടപടി ആരംഭിച്ചിട്ടുണ്ട്. സ്കോളർഷിപ്പോടെ പഠിക്കാൻ സൗകര്യമുണ്ട്. ഡിപ്ളോമ, ബിരുദം, ബിരുദാനന്തര ബിരുദം കോഴ്സുകൾക്കാണ് അവസരമുള്ളത്. കൊവിഡിൽ രാജ്യങ്ങൾ അടച്ചിട്ടതുകാരണം കഴിഞ്ഞ വർഷം വിദേശപഠനത്തിന് പ്രവേശനം നേടിയവർ കുറവായിരുന്നു. ഈ വർഷം സ്ഥിതി മാറുന്നുണ്ടെന്ന് വിദേശ വിദ്യാഭ്യാസ കൺസൾട്ടൻസി സ്ഥാപന നടത്തിപ്പുകാർ പറയുന്നു.

പഠനാവശ്യത്തിന് അനുമതി നൽകുന്നതിനൊപ്പം ‌ടെമ്പററി റസിഡന്റ് വിസ കാനഡ നൽകുന്നുണ്ട് എന്നതും തൊഴിലന്വേഷകർക്ക് ആശ്വാസം പകരുന്നതാണ് . കോഴ്സ് പൂർത്തിയാക്കി നാട്ടിൽ പോയി തിരികെവന്നാൽ എട്ടു വർഷം താമസിക്കാൻ താത്കാലിക വിസയും നൽകും. അതിനിടെ സ്പോൺസറെ കണ്ടെത്തി സ്ഥിരം തൊഴിൽ നേടാനാകും. തുടർന്ന് സ്ഥിരം വിസയും ലഭിക്കും.

കാനഡയിൽ പഠിക്കാൻ 30-40 ലക്ഷം രൂപ ചെലവിടണം. പക്ഷെ പഠനം പൂർത്തിയാക്കുന്ന 90 ശതമാനത്തിനും ജോലി കിട്ടും എന്നത് ഉറപ്പാണ് . പ്രതിവർഷം കുറഞ്ഞത് പത്തുലക്ഷം രൂപയെങ്കിലും ശമ്പളമായി കിട്ടും. മാനേജ്മെന്റ്, അക്കൗണ്ടിംഗ്, സർവീസ് മേഖലകളിലാണ് തൊഴിൽ സാദ്ധ്യതകൾ കൂടുതലുള്ളത് .

മികച്ച സർവകലാശാലകളും സ്ഥാപനങ്ങളും തിരഞ്ഞെടുക്കുക പ്രധാനമാണ്. സ്കോളർഷിപ്പുകൾ പ്രയോജനപ്പെടുത്തണം. വിദ്യാഭ്യാസ കൺസൾട്ടൻസി സ്ഥാപനങ്ങൾ വഴി പ്രവേശനം നേടുമ്പോൾ തട്ടിപ്പിനിരയാകാതിരിക്കാൻ ശ്രദ്ധിക്കണം.

മാനേജ്മെന്റ്, നഴ്സിംഗ്- മിഡ്‌വൈഫറി, ആർക്കിടെക്ചർ, ഹ്യൂമൻ റിസോഴ്സ് മാനേജ്മെന്റ്, ഡെന്റൽ സ്റ്റഡീസ്, മെഡിസിൻ, കമ്പ്യൂട്ടർ സയൻസ്, ആർട്ടിഫിഷ്യൽ ഇന്റലിജൻസ് തുടങ്ങിയ കോസ്‌സുകളിലേക്കാണ് കൂടുതൽ ഇന്ത്യക്കാർ പ്രവേശനം നേടുന്നത്