ഹയര്‍ സെക്കന്‍ഡറി, വൊക്കേഷനല്‍ ഹയര്‍ സെക്കന്‍ഡറി സ്‌കൂളുകളിലേക്കുള്ള പ്ലസ് വണ്‍ രണ്ടാം സപ്ലിമെന്ററി അലോട്‌മെന്റ് പ്രസിദ്ധീകരിച്ചു. ജൂലൈ 25 ന് വൈകിട്ട് 4 വരെയാണ് പ്രവേശനമുള്ളത്.

പൊതുവിദ്യാഭ്യാസ വകുപ്പിന്റെ വെബ്‌സൈറ്റില്‍ അലോട്‌മെന്റ് ഫലം ലഭ്യമാണ്. ശേഷിച്ചിരുന്ന 19,340 സീറ്റുകളിലേക്ക് 24,218 അപേക്ഷകളാണ് രണ്ടാം സപ്ലിമെന്ററി അലോട്ട്‌മെന്റില്‍ പരിഗണിച്ചത്. ഇതില്‍ 6791 പേര്‍ക്കാണ് പ്രവേശനം ലഭിച്ചിരിക്കുന്നത്.

സംസ്ഥാനത്ത് 12549 പ്ലസ് വണ്‍ സീറ്റുകള്‍ ഇനിയും അവശേഷിക്കുന്നു. സീറ്റ് ഒഴിവുള്ള സ്‌കൂളുകളിലേക്ക് അപേക്ഷകര്‍ കുറവായതാണ് ഇത്രയും സീറ്റുകള്‍ ഒഴിഞ്ഞു കിടക്കുന്നതിന് കാരണം. മലപ്പുറം ജില്ലയിലെ 1392 സീറ്റുകളിലേക്ക് 9707 അപേക്ഷകളാണ് ലഭിച്ചത്.

ഇതില്‍ 1369 പേര്‍ക്കു പ്രവേശനം ലഭ്യമായി. 23 സീറ്റുകള്‍ മാത്രമാണ് ഇവിടെ ശേഷിക്കുന്നത്. കോഴിക്കോട് 3206 അപേക്ഷകരില്‍ 989 പേര്‍ക്കും പാലക്കാട് 3908 അപേക്ഷകരില്‍ 820 പേര്‍ക്കും മാത്രമാണ് പ്രവേശനം ലഭിച്ചത്.

ഇനിയും പ്രവേശനം ലഭിച്ചിട്ടില്ലാത്തവര്‍ക്കായി താല്‍ക്കാലിക ബാച്ചുകളും അധിക സീറ്റും അനുവദിക്കുന്നതുമായി ബന്ധപ്പെട്ട് പ്രാഥമിക ചര്‍ച്ചകള്‍ കഴിഞ്ഞ ദിവസം നടത്തിയിരുന്നു. ബുധനാഴ്ചത്തെ മന്ത്രിസഭാ യോഗത്തിന്റെ അനുമതിയോടെ പ്രഖ്യാപനം ഉണ്ടാകാനാണ് സാധ്യതയുള്ളത്.