മലബാറില്‍ പ്ലസ് വണ്‍ താത്കാലിക ബാച്ചുകള്‍ അനുവദിക്കുന്നതു സംബന്ധിച്ച് ഇന്നു നിയമസഭയില്‍ പ്രഖ്യാപനമുണ്ടാകും. ശൂന്യവേളയ്ക്കു ശേഷം പൊതുവിദ്യാഭ്യാസമന്ത്രി വി. ശിവന്‍കുട്ടി ചട്ടം 300 പ്രകാരം പ്രത്യേക പ്രസ്താവന നടത്തും.

മലബാറില്‍ പ്രത്യേകിച്ചു മലപ്പുറം ജില്ലയില്‍ പ്ലസ് വണ്ണിനു വിദ്യാര്‍ഥികള്‍ക്കു പ്രവേശനം ലഭിക്കാതെ കടുത്ത പ്രതിസന്ധി നിലനില്‍ക്കുന്നതായി വ്യാപകപരാതി ഉയര്‍ന്നിട്ടുണ്ടായിരുന്നു.

പ്രതിപക്ഷ വിദ്യാര്‍ഥി സംഘടനകള്‍ ഇതിന്റെ പേരില്‍ പ്രക്ഷോഭവും ആരംഭിച്ചിട്ടുണ്ടായിരുന്നു. ഇതേത്തുടര്‍ന്ന് ഇക്കാര്യം പഠിക്കാനായി രണ്ടംഗ കമ്മിറ്റിയെ നിയോഗിക്കുകയും ചെയ്തു. 135 താത്കാലിക ബാച്ചുകള്‍ അനുവദിക്കാനാണ് ഇവരുടെ ശുപാര്‍ശയുള്ളത്.