പുതുക്കിയ കീം റാങ്ക് പട്ടിക പ്രസിദ്ധീകരിച്ചു. പുതിയ പട്ടികയില്‍ ഒന്നാം റാങ്കിലടക്കം വലിയ മാറ്റമാണ് . കേരള സിലബസിലുള്ള കുട്ടികള്‍ പിന്നിലായി. സിബിഎസ്ഇ സിലബസില്‍ നിന്നുള്ള കുട്ടികളാണ് 

ആദ്യ നൂറില്‍. റാങ്ക് പട്ടിക   https://cee.kerala.gov.in/cee/സൈറ്റില്‍ പ്രസിദ്ധീകരിച്ചിട്ടുണ്ട് .

തിരുവനന്തപുരം കവടിയാര്‍ സ്വദേശി ജോഷ്വാ ജേക്കബ് തോമസിനാണ് ഒന്നാം റാങ്ക്. പഴയ പട്ടികയില്‍ ജോഷ്വാ ജേക്കബ് അഞ്ചാം റാങ്കിലായിരുന്നു. പഴയ പട്ടികയില്‍ കേരള സിലബസിലെ വിദ്യാര്‍ഥി ജോണ്‍ ഷിനോജായിരുന്നു ഒന്നാം റാങ്ക്. പുതിയ പട്ടികയില്‍ ജോണ്‍ ഷിനോജ് ഏഴാം റാങ്കിലാണ്. എറണാകുളം സ്വദേശി ഹരികിഷന്‍ ബൈജുവിനാണ് രണ്ടാം റാങ്ക്. തിരുവനന്തപുരം സ്വദേശി എമില്‍ ഐപ് സക്കറിയക്കാണ് മൂന്നാം റാങ്ക്. നാലാം റാങ്ക് ഫറോക്ക് സ്വദേശി ആദില്‍ സയാനാണ്. പഴയ പട്ടികയിലും ആദില്‍ നാലില്‍ തന്നെയായിരുന്നു. ബംഗളൂരു സ്വദേശികളായ അദ്വൈത് അയിനിപ്പള്ളി, അനന്യ രാജീവ് എന്നിവരാണ് അഞ്ച് ആറ് റാങ്കുകളില്‍.

എറണാകുളം സ്വദേശി ജോണ്‍ ഷിനോജിനാണ് ഏഴാം റാങ്ക്. കോഴിക്കോട് സ്വദേശികളായ അക്ഷയ് ബിജു, അച്യുത് വിനോദ്, അന്‍മോല്‍ ബൈജു എന്നിവരാണ് ആദ്യ പത്തിലെ മറ്റുള്ളവര്‍. കീം പ്രവേശന പരീക്ഷയുമായി ബന്ധപ്പെട്ട് സര്‍ക്കാര്‍ നല്‍കിയ അപ്പീല്‍ ജസ്റ്റിസ് അനില്‍ കെ നരേന്ദ്രന്‍ അദ്ധ്യക്ഷനായ ബെഞ്ചാണ് പരിഗണിച്ചത്.

2011 മുതല്‍ തുടരുന്ന പ്രോസ്പെക്ടസ് പ്രകാരമാണ് അപേക്ഷ ക്ഷണിച്ചത്. ഇതനുസരിച്ച് പുതിയ റാങ്ക് ലിസ്റ്റ് തയ്യാറാക്കണമെന്നും നേരത്തേ കോടതി ഉത്തരവിട്ടിരുന്നു. ജൂലായ് ഒന്നിനായിരുന്നു ഫലപ്രഖ്യാപനം.

പതിനാലു കൊല്ലമായി തുടരുന്ന രീതി അവസാന നിമിഷം മാറ്റിയത് എന്ത് ബോധോദയത്തിന്റെ അടിസ്ഥാനത്തിലാണെന്ന് കോടതി ചോദിച്ചിരുന്നു. നടപടി നീതീകരിക്കാനാകില്ലെന്നും കോടതി വ്യക്തമാക്കിയിട്ടുണ്ടായിരുന്നു.