നിയാണ്ടര്‍താല്‍ മനുഷ്യര്‍ ജീവിച്ചിരുന്ന കാലഘട്ടത്തില്‍ മനുഷ്യന്റെ ആദിമരൂപമായ ഹോമോസാപ്പിയന്‍സുമായി ബന്ധമുണ്ടായിരുന്നു . രണ്ടു മനുഷ്യവര്‍ഗങ്ങളും തമ്മില്‍ ലൈംഗീക ബന്ധത്തില്‍ ഏര്‍പ്പെട്ടിട്ടുണ്ടെന്നും ഇതില്‍ സങ്കരവിഭാഗം മനുഷ്യര്‍ ജീവിച്ചിരുന്നതായും പഠനത്തില്‍ പറയുന്നു.ബ്രിട്ടന്‍ മുതല്‍ ജപ്പാനും കൊളംബിയയും വരെ, വിവിധ വന്‍കരകളില്‍ നിന്നുള്ള ആളുകളില്‍ ഒരു ശതമാനം മുതല്‍ നാല് ശതമാനം വരെ നിയാണ്ടര്‍താല്‍ ജീനുകള്‍ കണ്ടെത്തിയിട്ടുണ്ട്.അതേസമയം മറ്റൊരു മനുഷ്യ വര്‍ഗത്തിന്റെ ജീനുകളും ആധുനിക മനുഷ്യരില്‍ കണ്ടെത്തിയിരിക്കുകയാണ് ശാസ്ത്രലോകം.

പരിണാമചരിത്രത്തില്‍ മനുഷ്യനോട്‌ ഏറ്റവും അടുത്തുനില്‍ക്കുന്ന കണ്ണികളായ നിയാണ്ടര്‍താല്‍ മനുഷ്യര്‍ ഏകദേശം മുപ്പതിനായിരം വര്‍ഷംമുമ്പ്‌ നമ്മെ വിട്ടുപിരിഞ്ഞവരാണ്‌ . മധ്യപൗരസ്‌ത്യ ദേശത്തും ഏഷ്യയിലും യൂറോപ്പിലുമെല്ലാം അവ നമ്മോടൊപ്പം ഉണ്ടായിരുന്നെന്നാണ്‌ പറയുന്നത്‌. ആധുനിക മനുഷ്യനെന്ന ഹോമോ സാപ്പിയനെക്കാള്‍ മസ്‌തിഷ്‌ക വലുപ്പവും ഭാഷാശേഷിയുമുണ്ടായിരുന്നവര്‍. ആയുധങ്ങള്‍ നിര്‍മിക്കുന്നതിലും ഉപയോഗിക്കുന്നതിലും മനുഷ്യനോളംതന്നെ കഴിവുണ്ടായിരുന്നവര്‍ ആയിരുന്നു അവർ എന്നാണ് മനസ്സിലാക്കിയിട്ടുള്ളത്.

2010 ല്‍ റഷ്യയിലെ സൈബീരിയയിലെ ഡെനിസോവ ഗുഹയില്‍ നിന്നും കണ്ടെത്തിയ പ്രാചീന മനുഷ്യന്റെ ചെറുവിരല്‍ എല്ലിന്റെ കഷ്ണത്തില്‍ നിന്നും പല്ലില്‍ നിന്നുമാണ് ഡെനിസോവന്‍സ് (Denisovan) എന്ന മനുഷ്യ വിഭാഗത്തെ ശാസ്ത്രലോകം കണ്ടെത്തുന്നത്. ദക്ഷിണേഷ്യയ്ക്ക് കുറുകെ സഞ്ചരിച്ച മനുഷ്യര്‍ വിവിധ ഡെനിസോവന്‍സ് വിഭാഗങ്ങളുമായും ശാരീരിക ബന്ധം പുലര്‍ത്തിയിട്ടുണ്ടെന്ന് ജേണല്‍ സെല്‍ പ്രസിദ്ധീകരിച്ച പുതിയ പഠനത്തില്‍ പറയുന്നു.

756,000 വര്‍ഷങ്ങള്‍ക്ക്മുൻപാണ് ആധുനിക മനുഷ്യരും നിയാണ്ടര്‍താല്‍ മനുഷ്യരും വെവ്വേറെ വിഭാഗങ്ങളായത്. അതിന്ശേഷം വേര്‍പിരിഞ്ഞ ഡെനിസോവന്‍സും നിയാണ്ടര്‍താലുകളും അടുത്ത ബന്ധമുള്ള മനുഷ്യനോട് ഏറെ സാമ്യമുള്ളവർ ആയിരുന്നു. പിന്നീട് ഇരുവിഭാഗങ്ങളും അപ്രത്യക്ഷമാവുകയും ചെയ്തു.

വാഷിങ്ടണ്‍ സര്‍വകലാശാലയിലെ ബയോ സ്റ്റാറ്റിസ്റ്റിഷ്യന്‍ ഷാരോണ്‍ ആര്‍. ബ്രൗണിങിന്റെ നേതൃത്വത്തിലുള്ള ഗവേഷകര്‍ നടത്തിയ പഠനം സെല്‍ ജേര്‍ണലിലാണ് പ്രസിദ്ധീകരിച്ചത് .

പ്രാചീന മനുഷ്യരുടെ ഡിഎന്‍എയുമായുള്ള സാമ്യത കണ്ടെത്തുന്നതിനായി യൂറോപ്പ്, ഏഷ്യ, ഓഷ്യാനിയ എന്നിവിടങ്ങളില്‍ നിന്നുള്ള 5,500 ഓളം ജനിതക ഘടനകളാണ് ഇവര്‍ പരിശോധകള്‍ക്ക് വിധേയമാക്കിയത്.

ബ്രിട്ടിഷുകാരിലും ബംഗാളികളിലും പെറുവില്‍ നിന്നുള്ളവരിലും തെക്കേഅമേരിക്കയിലെ പ്യൂര്‍ട്ടോറിക്കയില്‍ നിന്നുള്ളവരിലും നിയാണ്ടര്‍ത്താല്‍ മനുഷ്യരുടെ ജീനുകള്‍ കണ്ടെത്തി. കിഴക്കന്‍ ഏഷ്യയില്‍ നിന്നുള്ള ചിലരില്‍ നിയാണ്ടര്‍ത്താല്‍ ജീനുകള്‍ക്കൊപ്പം ഡെനിസോവന്‍സ് ജീനിന്റെ സാന്നിധ്യവും ശാസ്ത്രജ്ഞര്‍ തിരിച്ചറിഞ്ഞു.

എന്നാല്‍ നിയാണ്ടര്‍ത്താല്‍ ജീനുകളുടെ സാന്നിധ്യമില്ലാത്ത മറ്റൊരു വിഭാഗവും ശാസ്ത്രജ്ഞര്‍ തിരിച്ചറിഞ്ഞു. അത് ഡെനിസോവന്‍ ജീനുമായി മാത്രം സാമ്യമുള്ളതായിരുന്നു. ഇതുവഴിയാണ് മറ്റൊരു സങ്കരവിഭാഗത്തിന്റെ സാന്നിധ്യം ഗവേഷകര്‍ സ്ഥിരീകരിച്ചത്.

കിഴക്ക് ഭാഗത്തേക്ക് കുടിയേറിയ പ്രാചീന മനുഷ്യര്‍ രണ്ട് വ്യത്യസ്ത ഡെനിസോവന്‍ വിഭാഗങ്ങള്‍ക്കിടയിലേക്ക് വന്നിരിക്കാമെന്നാണ് ഗവേഷകരുടെ അനുമാനമെന്ന് ബ്രോണിങ് പറയുന്നു. അതില്‍ ഒന്ന് വടക്ക് ഭാഗത്ത് ചൈന, ജപ്പാന്‍, വിയറ്റ്നാം എന്നിവിടങ്ങളിലാണ് ഏഷ്യയുടെ തെക്ക് കിഴക്കന്‍ ഭാഗത്താണ് രണ്ടാമത്തേത്.

അതേസമയം ഡെനിസോവന്‍ വിഭാഗം മാത്രമല്ല യൂറേഷ്യന്‍ മേഖലയില്‍ വ്യത്യസ്തങ്ങളായ പ്രാചീന വിഭാഗങ്ങളുണ്ടായേക്കാമെന്നും,ഇതുപോലെ ഇനിയും സമിശ്ര ജീനുകള്‍ കണ്ടെത്താനും സാധ്യതകളുണ്ടെന്നു ശാസ്ത്രലോകം വിലയിരുത്തുന്നു