ഓക്‌സ്ഫഡ് വാക്‌സീന്‍ സ്വീകരിച്ചയാള്‍ക്ക് സുഷുമ്‌ന നാഡിയിലെ തന്തുക്കളെ സംരക്ഷിക്കുന്ന ആവരണമായ മൈലിനു വീക്കമുണ്ടാ കുന്ന'ട്രാന്‍വേഴ്‌സ് മൈലൈറ്റീസ് ' എന്ന് സൂചന
ഓക്‌സ്ഫഡ് വാക്‌സീന്‍ ഉല്‍പാദകരായ അസ്ട്രാസെനക ഇന്ത്യയിലെ പങ്കാളിയായ പുണെ സീറം ഇന്‍സ്റ്റിറ്റ്യൂട്ടിനു നല്‍കിയ വിവരങ്ങളില്‍, ഇതു സ്വീകരിച്ചവരിലൊരാള്‍ക്ക് 'ട്രാന്‍വേഴ്‌സ് മൈലൈറ്റീസ്' കണ്ടെത്തിയെന്ന് സൂചന നല്‍കി. വാക്‌സീന്‍ സ്വീകരിച്ചതുകൊണ്ടാണോ രോഗാവസ്ഥ എന്നതാണ് ഇനി വ്യക്തമാകേണ്ടത്.
ഓക്‌സ്ഫഡ് സാധ്യതാ വാക്‌സീന്‍ പരീക്ഷണം നിര്‍ത്തിവയ്ക്കാന്‍ ഇടയാക്കിയ ട്രാന്‍വേഴ്‌സ് മൈലൈറ്റീസ്, സുഷുമ്‌ന നാഡിയിലെ തന്തുക്കളെ സംരക്ഷിക്കുന്ന ആവരണമായ മൈലിനുണ്ടാകുന്ന വീക്കമാണ്. 3 കാരണങ്ങളാല്‍ ഇതു സംഭവിക്കാം. 1. വാക്‌സീന്‍ സ്വീകരിച്ചതു വഴി ശരീരത്തിലെ പ്രതിരോധ ശേഷിയിലുണ്ടായ മാറ്റം. 2. നിര്‍ജീവമായിരുന്ന വൈറസുകളേതെങ്കിലും സജീവമായത്. 3. രോഗപ്രതിരോധ സംവിധാനം സ്വന്തം ശരീരത്തെ തന്നെ ആക്രമിക്കുന്ന ഓട്ടോ ഇമ്യൂണ്‍.
ഏപ്രിലില്‍ ഓക്‌സ്ഫഡ് വാക്‌സീന്റെ ആദ്യ ഘട്ട പരീക്ഷണ സമയത്തും വൊളന്റിയര്‍മാരിലൊരാള്‍ക്കു വിപരീത ഫലമുണ്ടായി പരീക്ഷണം നിര്‍ത്തിയിരുന്നു. സാധ്യതാ വാക്‌സീന്റെ സുരക്ഷിതത്വവും പരീക്ഷണവിവരങ്ങളും ബ്രിട്ടനിലെ മെഡിസിന്‍സ് ആന്‍ഡ് ഹെല്‍ത്ത് കെയര്‍ പ്രോഡക്ട്‌സ് റഗുലേറ്ററി ഏജന്‍സി വീണ്ടും പരിശോധിക്കും. ഇതിന്റെ അടിസ്ഥാനത്തിലായിരിക്കും തീരുമാനം.
ഓക്‌സ്ഫഡ് സാധ്യതാ വാക്‌സീന്‍ സ്വീകരിച്ച മലയാളികളായ തിരുവല്ല ഓതറ സ്വദേശി റെജി, മൂവാറ്റുപുഴ സ്വദേശിയായ ഡോ. ജോജി കുര്യന്‍ എന്നിവര്‍ക്ക് ആരോഗ്യപ്രശ്‌നങ്ങളൊന്നുമില്ല. റെജിയാണ് ആദ്യം വാക്‌സീന്‍ സ്വീകരിച്ച ഇന്ത്യക്കാരന്‍. അടുത്ത ഘട്ടത്തില്‍ മൂവാറ്റുപുഴ സ്വദേശിയായ ഡോ. ജോജി കുര്യനും വാക്‌സീനെടുത്തു. ബൂസ്റ്റര്‍ ഡോസുകള്‍ അടക്കം എടുത്തിട്ടും ആരോഗ്യപ്രശ്‌നങ്ങളൊന്നുമില്ലെന്ന് ഇരുവരും പറഞ്ഞു.
തുടര്‍ന്നുള്ള ഘട്ടങ്ങളില്‍ 30,000 പേരാണു വാക്‌സീനെടുത്തത്. ഇതില്‍ മലയാളികളുമുണ്ട്. ആര്‍ക്കും ആരോഗ്യപ്രശ്‌നങ്ങളുള്ളതായി റിപ്പോര്‍ട്ടില്ല.
ഇന്ത്യയില്‍ പരീക്ഷണം നിര്‍ത്തിവച്ചിട്ടില്ലെന്നാണ് പുണെ സീറം ഇന്‍സ്റ്റിറ്റ്യൂട്ട് പ്രതികരിച്ചത്. ഓക്‌സ്ഫഡ് വാക്‌സീന്റെ ഇന്ത്യയിലെ പരീക്ഷണം തുടരുന്നത് ഡേറ്റ സേഫ്റ്റി ആന്‍ഡ് മോണിറ്ററിങ് ബോര്‍ഡിന്റെ (ഡിഎസ്എംബി) അവലോകന യോഗത്തിനു ശേഷമായിരിക്കും. 2 ദിവസത്തിനുള്ളില്‍ യോഗം ചേര്‍ന്നേക്കും.
https://www.facebook.com/Malayalivartha
