പഠനം പൂര്‍ത്തിയാക്കി 28 വര്‍ഷത്തിന് ശേഷം ബോളിവുഡ് സൂപ്പര്‍ താരം ഷാരൂഖ് ഖാന്‍ ബിരുദ സര്‍ട്ടിഫിക്കറ്റ് വാങ്ങി. താന്‍ പഠിച്ച ഹന്‍സ്‌രാജ് കോളജില്‍ എത്തിയാണ് ഷാരൂഖ് ബിരുദ സര്‍ട്ടിഫിക്കറ്റ് വാങ്ങിയത്.
1988ല്‍ പഠിച്ചിറങ്ങിയ ശേഷം ആദ്യമായാണ് കോളജില്‍ എത്തുന്നത്. ഇത് തനിക്ക് ഏറെ സവിശേഷമായ മുഹൂര്‍ത്തമാണെന്ന് കിംഗ് ഖാന്‍ പറഞ്ഞു. കുട്ടികളെ കൂടെ കൊണ്ടു വരാനായില്ലെന്നത് മാത്രമാണ് ഏക ദുഃഖമെന്നും ഷാരൂഖ് പറഞ്ഞു. താന്‍ പഠിച്ച കോളജിന്റെ മുക്കും മൂലയും കുട്ടികളെ കാണിച്ചു കൊടുക്കണമെന്നുണ്ടായിരുന്നെന്നും സൂപ്പര്‍ താരം കൂട്ടിച്ചേര്‍ത്തു.
എ.ബി.വി.പി പ്രവര്‍ത്തകരുടെ പ്രതിഷേധത്തിനിടെയാണ് ഷാരൂഖ് കോളജില്‍ എത്തിയത്. അദ്ദേഹത്തിന്റെ കാറ് തടയാന്‍ ശ്രമിച്ച എ.ബി.വി.പി പ്രവര്‍ത്തകരെ പോലീസ് തടഞ്ഞു. ഷാരൂഖ് രാജ്യദ്രോഹിയാണെന്ന് മുദ്രാവാക്യം മുഴക്കിയാണ് എ.ബി.വി.പി പ്രവര്‍ത്തകര്‍ പ്രതിഷേധിച്ചത്.
ഷാരൂഖിന്റെ ഏറ്റവും പുതിയ ചിത്രമായ രായീസ് ഗുജറാത്തില്‍ ചിത്രീകരിക്കുന്നതിനെതിരെ കഴിഞ്ഞ ദിവസം വി.എച്ച്.പി പ്രതിഷേധിച്ചിരുന്നു. ഷൂട്ടിംഗിന് നല്‍കിയ അനുമതി പിന്‍വലിക്കണമെന്ന് ആവശ്യപ്പെട്ട് വി.എച്ച്.പി ജില്ലാ ഭരണകുടത്തിന് മെമ്മോറാണ്ടം നല്‍കുകയും ചെയ്തു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha