നീണ്ട എഴുപത്തിനാലു വര്‍ഷത്തെ ജീവിതത്തില്‍ സിനിമയും കുടുംബവും ഹൃദയത്തോടു ചേര്‍ത്തുപിടിച്ച അമിതാബ് ബച്ചന്‍ ഒടുവില്‍ ആ വിവരം തുറന്നു പറഞ്ഞു. തന്റെ മരണശേഷം സ്വത്തുക്കള്‍ ഭാഗംവെയ്ക്കുമ്പോള്‍ അത് ആര്‍ക്കായിരിക്കണം എന്നു തുറന്നു പറയുന്ന പ്ലക്കാര്‍ഡ് കൈയില്‍ പിടിച്ച ചിത്രം സമൂഹമാധ്യമങ്ങളില്‍ അപ്‌ലോഡ് ചെയ്തുകൊണ്ടാണ് ബിഗ്ബി ആ വിവരം പുറംലോകത്തോടു വിളിച്ചു പറഞ്ഞത്.

നമ്മളെല്ലാവരും തുല്യരാണ്. അതുകൊണ്ട് ലിംഗസമത്വത്തിലും ഞാന്‍ വിശ്വസിക്കുന്നു. ആയതിനാല്‍ ഞാന്‍ മരിക്കുമ്പോള്‍ എന്റെ സ്വത്തുക്കള്‍ എന്റെ രണ്ടുമക്കള്‍ക്കുമായി വീതിച്ചു നല്‍കണം. എനിക്കു രണ്ടു മക്കളാണുള്ളത് ശ്വേതയും അഭിഷേകും. അതുകൊണ്ട് മരണശേഷം എന്റെ സ്വത്തുക്കള്‍ ഇരുവര്‍ക്കും തുല്യമായി പങ്കുവെയ്ക്കാന്‍ ഞാന്‍ ആഗ്രഹിക്കുന്നു. ലിംഗസമത്വത്തിനു വേണ്ടിയും സ്ത്രീ സുരക്ഷയ്ക്കുവേണ്ടിയും എന്നും ശക്തമായി വാദിക്കുന്നയാളാണ് അമിതാബ് ബച്ചന്‍. സ്വന്തം തീരുമാനത്തിലുറച്ചു നില്‍ക്കുന്ന നല്ല വ്യക്തികളായി എങ്ങനെ വളരണം എന്ന സന്ദേശം ഒരു തുറന്ന കത്തിന്റെ രൂപത്തില്‍ കൊച്ചുമക്കളായ നവ്യനവേലിയ്ക്കും ആരാധ്യബച്ചനും വായിക്കുവാന്‍ വേണ്ടി ബിഗ്ബി എഴുതിയിരുന്നു. കഴിഞ്ഞവര്‍ഷമെഴുതിയ കത്ത് ഏറെ മാധ്യമശ്രദ്ധ നേടുകയും ചെയ്തിരുന്നു.

വിദേശയാത്രകഴിഞ്ഞെത്തിയ തനിക്കും മകന്‍ അഭിഷേകിനും ഭാര്യയ്ക്കും മകളൊരുക്കിയ സര്‍െ്രെപസിനെക്കുറിച്ചും ഈ അടുത്തിടെ ബിഗ്ബി എഴുതിയിരുന്നു. എന്നും മകളെയും കൊച്ചുമക്കളെയും അഭിമാനത്തോടെ ചേര്‍ത്തു പിടിക്കാനും കുടുംബത്തിലും സമൂഹത്തിലും അവരര്‍ഹിക്കുന്ന ബഹുമാനം നല്‍കാനും ബിഗ്ബി ശ്രദ്ധിച്ചിട്ടുണ്ട്. കഴിഞ്ഞ വര്‍ഷം ഏറെ ചര്‍ച്ചയായ പിങ്ക് എന്ന ചിത്രത്തിലും അമിതാബ്ബച്ചന്‍ പ്രധാനപ്പെട്ട ഒരു വേഷം ചെയ്തിരുന്നു. സ്ത്രീകളുടെ പ്രശ്‌നങ്ങള്‍ കൈകാര്യം ചെയ്ത സിനിമയുടെ ഭാഗമായി സ്ത്രീ സുരക്ഷയുടെ നല്ല സന്ദേശങ്ങള്‍ അദ്ദേഹം സമൂഹത്തിനു നല്‍കിയിരുന്നു.

മരുമകള്‍ ഐശ്വര്യയെക്കുറിച്ച് സമൂഹമാധ്യമങ്ങളില്‍ വരുന്ന വ്യാജവാര്‍ത്തകളോടും വിവാദങ്ങളോടും കടുത്തരീതിയില്‍ത്തന്നെയാണ് ബച്ചന്‍ എപ്പോഴും പ്രതികരിക്കാറുള്ളത്. തന്നെക്കുറിച്ചുള്ള വ്യാജവാര്‍ത്തകളേക്കാര്‍ ബച്ചനെ ഏറെ പ്രകോപിപ്പിക്കുന്നത് കുടുംബത്തിലെ സ്ത്രീകളെക്കുറിച്ചുള്ള വ്യാജവാര്‍ത്തകളാണ്. അത്തരം വാര്‍ത്തകള്‍ക്കെതിരെ ശക്തമായി പ്രതികരിക്കാനും ബച്ചന്‍ തയാറാവാറുണ്ട്.

സ്വത്തുക്കള്‍ ഭാഗം വയ്ക്കുന്നതിലെ തന്റെ നിലപാടു വ്യക്തമാക്കിയതോടെ സമൂഹമാധ്യമങ്ങളിലെ ലക്ഷക്കണക്കിന് ആരാധകരുടെ മനസ്സിനെയും പ്രചോദിപ്പിച്ചിരിക്കുകയാണ് ബിഗ്ബി. കുടുംബത്തില്‍ സ്ത്രീകള്‍ക്കുള്ള പരിഗണനയും കരുതലും അവകാശങ്ങളും ഈ തുറന്നു പറച്ചിലിലൂടെ വ്യക്തമാക്കുകയാണ് അമിതാബ് ബച്ചന്‍ എന്ന അച്ഛന്‍.