നെഗറ്റീവ് കഥാപാത്രങ്ങളിലൂടെയായി പ്രേക്ഷക ശ്രദ്ധ പിടിച്ചുപറ്റിയ അഭിനേത്രിയാണ് അര്‍ച്ചന സുശീലന്‍. പാടാത്ത പൈങ്കിളിയില്‍ അഭിനയിച്ച് വരുന്നതിനിടയിലായിരുന്നു താരം ഇടവേളയെടുത്തത്. പുതുജീവിതത്തിലേക്ക് പ്രവേശിച്ചതിന്റെ സന്തോഷത്തിലാണ് താരം. വിവാഹശേഷമുള്ള അര്‍ച്ചനയുടെ പോസ്റ്റും ചിത്രങ്ങളും വീഡിയോയുമെല്ലാം വൈറലായിരുന്നു. ആനു നോബിയായിരുന്നു അര്‍ച്ചനയ്ക്കായി ലെഹങ്ക ഒരുക്കിയത്.

മാധ്യമത്തിന് നല്‍കിയ അഭിമുഖത്തിനിടയിലായിരുന്നു അനു നോബി അര്‍ച്ചനയ്ക്കായൊരുക്കിയ ലെഹങ്കയെക്കുറിച്ച് വാചാലയായത്.പ്രവീണ്‍ നായരും അര്‍ച്ചനയും തമ്മിലുള്ള വിവാഹത്തിന്റെ വിശേഷങ്ങള്‍ സോഷ്യല്‍ മീഡിയയിലൂടെ ശ്രദ്ധ നേടിയിരുന്നു.

അമേരിക്കയില്‍ വെച്ചായിരുന്നു വിവാഹം. അര്‍ച്ചനയ്ക്കും പ്രവീണിനും ആശംസ അറിയിച്ച് പ്രിയപ്പെട്ടവരെത്തിയിരുന്നു. പ്രവീണിനെ ജീവിതപങ്കാളിയായി ലഭിച്ചതില്‍ സന്തുഷ്ടവതിയാണ് താനെന്നും അര്‍ച്ചന കുറിച്ചിരുന്നു. ആനു നോബിയാണ് തനിക്ക് വെഡ്ഡിങ് ലെഹങ്ക ഡിസൈന്‍ ചെയ്തതെന്നും അര്‍ച്ചന പോസ്റ്റിലൂടെ വ്യക്തമാക്കിയിരുന്നു.

അര്‍ച്ചനയുടെ അടുത്ത സുഹൃത്ത് കൂടിയാണ് ഡിസൈനറായ ആനു നോബി. പേള്‍ പീച്ച് നിറത്തിലുള്ള ലെഹങ്കയായിരുന്നു അര്‍ച്ചനയ്ക്കായി ആനു ഒരുക്കിയത്.

അര്‍ച്ചന അമേരിക്കയിലായതിനാല്‍ ഓണ്‍ലൈനിലൂടെയായിരുന്നു അളവെടുക്കലും ഡിസൈനിംഗിനെക്കുറിച്ചുള്ള ചര്‍ച്ചകളും നടന്നത്. സ്‌കിന്‍ കളറിനോട് ചേര്‍ന്നു നില്‍ക്കുന്നതായിരിക്കണം ലെഹങ്കയിലെ കളര്‍ എന്നായിരുന്നു അര്‍ച്ചന ആനുവിനോട് പറഞ്ഞത്.

അധികം വര്‍ക്കുകളൊന്നുമില്ലാതെ സിംപിളായിരിക്കണം എന്ന് പറഞ്ഞതിനാല്‍ എംബ്രോയിഡറിക്ക് പ്രാധാന്യം നല്‍കുകയായിരുന്നു ആനു. അര്‍ച്ചന അമേരിക്കയിലായതിനാല്‍ സമയം പ്രശ്‌നമായിരുന്നു.

ഡിസൈന്‍ തയ്യാറാക്കി അയച്ചുകൊടുത്തതിന് ശേഷം വീഡിയോ കോളിലൂടെയായാണ് അളവെടുത്തത്. അര്‍ച്ചനയുമായി കാലങ്ങളായി സൗഹൃദമുണ്ടെങ്കിലും ഇതാദ്യമായാണ് വസ്ത്രം ഒരുക്കിയതെന്നും ആനു പറയുന്നു.

10 തൊഴിലാളികള്‍ ചേര്‍ന്ന് 45 ദിവസമെടുത്താണ് അര്‍ച്ചനയുടെ വെഡ്ഡിങ് ലെഹങ്ക ഒരുക്കിയത്. പ്രിയ കൂട്ടുകാരിക്ക് വിവാഹ വസ്ത്രം ഒരുക്കാനായതിന്റെ സന്തോഷവും ആനു പങ്കിട്ടിരുന്നു. ചാനല്‍ പരിപാടികള്‍ക്കും താരവിവാഹങ്ങള്‍ക്കുമെല്ലാം കോസ്റ്റിയൂം ഒരുക്കി ശ്രദ്ധ നേടിയിട്ടുണ്ട് ആനു നോബി. സെലിബ്രിറ്റികളുമായെല്ലാം അടുത്ത സൗഹൃദവും നിലനിര്‍ത്തുന്നുണ്ട് ആനു.

ബ്രൈഡൽ ലെഹംഗ നമ്മുടെ ഭാവനയുടെയും സർഗ്ഗാത്മകതയുടെയും ഒരു കരകൗശലമാണ്. അവളുടെ സ്കിൻ ടോണുമായി നന്നായി ചേരുന്ന ഒരു നിറമാണ് ഞാൻ തിരഞ്ഞെടുത്ത്. എംബ്രോയ്ഡറി എപ്പോഴും എന്റെ ഹൃദയത്തോട് ചേർന്നുനിൽക്കുന്നു.

എംബ്രോയ്ഡറി ചെയ്യുന്നതിന് മുൻപ് ഞങ്ങൾ ലൈറ്റ് പിങ്ക്, റാസ്ബെറി, ഇളം പച്ച, മെഹന്ദി പച്ച എന്നീ നിറങ്ങൾ തിരഞ്ഞെടുത്തു, കൂടാതെ സിൽവർ ക്രിസ്റ്റുകളും മുത്തുകളും ഉപയോഗിച്ച് കൈകൊണ്ട് വർക്ക് ചെയ്തു. അവളുടെ വിശേഷദിവസത്തിൽ വസ്ത്രം ഒരുക്കാനായി എന്നെ തിരഞ്ഞെടുത്തതിന് നന്ദി, അവൾക്ക് സന്തോഷകരമായ ദാമ്പത്യ ജീവിതം ആശംസിക്കുന്നു എന്നും ആനു ഇൻസ്റ്റഗ്രാമിൽ കുറിച്ചിരുന്നു.