മലയാളികൾക്ക് ഏറെ സുപരിചിതനായ നടനാണ് മനോജ് കുമാർ. നടി ബീന ആൻറണിയുടെ ഭർത്താവ് കൂടിയാണ് മനോജ് കുമാർ. ഇരുവരും മലയാളികൾക്ക് ഏറെ സുപരിചിതരായ താര ദമ്പതികളാണ്. ഇരുവരും നിരവധി സീരിയലുകളിലും സിനിമകളിലും സാന്നിധ്യമറിയിച്ചിട്ടുണ്ട്. മാത്രമല്ല ഫേസ്ബുക്കിലൂടെയും യൂട്യൂബിലൂടെയും തങ്ങളുടെ അഭിപ്രായങ്ങൾ തുറന്നു പറയാനും താരദമ്പതികൾ എത്താറുണ്ട്.

പലപ്പോഴും ബിഗ് ബോസിനെ കുറിച്ച് വീഡിയോ ചെയ്താണ് ഇവർ ഫേസ്ബുക്കിലൂടെ വൈറലായിരുന്നത്. പിന്നീട് യൂ ട്യൂബിലൂടെയും തൻ്റെ അഭിപ്രായങ്ങൾ അദ്ദേഹം അറിയിക്കുകയും ചെയ്തു. ഇന്നലെ ആയിരുന്നു മനോജ് കുമാർ തനിക്കുണ്ടായ ഒരു അസുഖത്തെ കുറിച്ച് വീഡിയോ പങ്കു വെച്ചത്. നിരവധി ആരാധകർ ആശ്വാസവാക്കുമായി എത്തിയിരുന്നു. ഇപ്പോഴിതാ, പ്രിയപ്പെട്ടവന് നേരിടേണ്ടി വന്ന പരീക്ഷണത്തെക്കുറിച്ച് പ്രമുഖ മാധ്യമത്തിന് നൽകിയ അഭിമുഖത്തിൽ തുറന്നു പറയുകയാണ് ബീന ആന്റണി.

താരത്തിന്റെ വാക്കുകൾ ഇങ്ങനെ:

എന്റെ ലെഫ്റ്റ് മീശയുടെ ഭാഗത്ത് ചുണ്ടിന് അരികിലായി എന്തോ പ്രശ്‌നമുള്ളത് പോലെ തോന്നുന്നു എന്നായിരുന്നു മനു ആദ്യം പറഞ്ഞത്. എന്താണ് സംഭവിച്ചത് എന്ന് ചോദിച്ചപ്പോള്‍ അദ്ദേഹത്തിന് കൃത്യമായൊരു ഉത്തരം നല്‍കാനും പറ്റുന്നുണ്ടായിരുന്നില്ല. അത് സാരമില്ലെന്ന് പറഞ്ഞ് ആശ്വസിപ്പിച്ചാണ് അന്ന് ഉറങ്ങാന്‍ കിടന്നത്. പിറ്റേ ദിവസം രാവിലെ എഴുന്നേറ്റപ്പോഴൊന്നും അസ്വഭാവികമായി ഒന്നും തോന്നിയിരുന്നില്ല.

തലേദിവസത്തെ പ്രശ്‌നം രൂക്ഷമായെന്ന് പിറ്റേന്ന് മനോജ് പറഞ്ഞതായും ബീന ആന്റണി ഓര്‍ത്തെടുക്കുന്നു. സംഭവം കുറച്ച് സീരിയസായിരുന്നു. പല്ല് തേച്ച് വെള്ളം വായില്‍കൊണ്ട സമയത്ത് ഒരു സൈഡ് വഴി വെള്ളം ഒഴുകിപ്പോയെന്ന് മനു പറഞ്ഞിരുന്നു.

അപ്പോഴാണ് എനിക്ക് ടെന്‍ഷനായത്. അത് പുറമേ കാണിക്കാതെ മനുവിനെ ആശ്വസിപ്പിക്കുകയായിരുന്നു. നമുക്കൊന്ന് ആശുപത്രിയിലേക്ക് പോവാമെന്ന് പറഞ്ഞപ്പോഴാണ് ആ മുഖം ശ്രദ്ധിച്ചത്.

മനുവിന്റെ മുഖം ഒരുവശത്തേക്ക് കോടിയ അവസ്ഥയായിരുന്നു. അതിനിടയില്‍ മനുവിന്റെ അച്ഛന്റെ സഹോദരനേയും വിളിച്ച് ഇതേക്കുറിച്ച് ചോദിച്ചിരുന്നു. സ്‌ട്രോക്കായിരിക്കുമോ ഇതെന്നായിരുന്നു ഞങ്ങളുടെ ആശങ്ക.

വീഡിയോ കോളിലൂടെ കുഞ്ഞച്ഛന്‍ പരിശോധിച്ച് മനുവിനോട് ചിരിക്കാന്‍ പറഞ്ഞിരുന്നു. ഇത് സ്‌ട്രോക്കല്ല, ബെല്‍ പാള്‍സിയാണെന്ന് അദ്ദേഹം പറഞ്ഞിരുന്നു. അദ്ദേഹം നിര്‍ദേശിച്ചത് അനുസരിച്ചാണ് ആശുപത്രിയിലേക്ക് പോയത്.

ഞായറാഴ്ചയായിരുന്നു അന്ന്. അതിനാല്‍ത്തന്നെ പല ആശുപത്രികളിലും ഡോക്ടര്‍മാര്‍ കുറവായിരുന്നു. കുഞ്ഞച്ഛന്‍ പറഞ്ഞത് തന്ന ഡോക്ടര്‍മാരും ഉറപ്പിക്കുകയായിരുന്നു.

പേടിക്കാനില്ലെന്നും ചികിത്സിച്ച് മാറ്റിയെടുക്കാനുള്ള പ്രശ്‌നങ്ങളേയുള്ളൂവെന്നും പറഞ്ഞതോടെയാണ് ആശ്വാസമായതെന്നും ബീന ആന്റണി അഭിമുഖത്തില്‍ വ്യക്തമാക്കിയിരുന്നു.

പപ്പയ്ക്ക് എന്താണ് പറ്റിയതെന്നോര്‍ത്തായിരുന്നു ആരോമലിന്റെ സങ്കടം. മനുവിന്റെ മുന്നില്‍ ഞങ്ങള്‍ സങ്കടങ്ങളൊന്നും കാണിച്ചിരുന്നില്ല. ഞങ്ങള്‍ രണ്ടാളും മാത്രമുള്ള നിമിഷങ്ങളിലായിരുന്നു സങ്കടം പറയാറുള്ളത്.

ഫിസിയോതെറാപ്പി ഉള്‍പ്പടെയുള്ള ചികിത്സകള്‍ നടന്ന് വരികയാണ്. പഴയത് പോലെ മനു തിരികെ വരുമെന്നാണ് പ്രതീക്ഷ. എല്ലാവരും അതിനായി പ്രാര്‍ത്ഥിക്കണമെന്നുമായിരുന്നു ബീന ആന്റണി പറഞ്ഞവസാനിപ്പിച്ചത്.