കുറുപ്പിന്റെ രണ്ടാം ഭാഗം ഉണ്ടാകുമെന്ന് സംവിധായകന്‍ ശ്രീനാഥ് രാജേന്ദ്രന്‍ നേരത്തെ പറഞ്ഞിരുന്നു. 'ലേറ്റ് ആയി വന്നാലും നല്ല രസമായി തന്നെ വരും', എന്നായിരുന്നു ശ്രീനാഥ് ഇതേക്കുറിച്ച്‌ പറഞ്ഞത്. എന്നാൽ ആരാധകരെ ആവേശത്തിലാക്കി കുറുപ്പിന്റെ രണ്ടാം ഭാഗം വരുന്നു. ദുല്‍ഖര്‍ സല്‍മാനാണ് മോഷന്‍ പോസ്റ്റര്‍ പുറത്തു വിട്ടത്.ദുല്‍ഖര്‍ അവതരിപ്പിക്കുന്ന അലക്സാണ്ടര്‍ എന്ന കഥാപാത്രത്തെ പരിചയപ്പെടുത്തിക്കൊണ്ടുള്ള മോഷന്‍ പോസ്റ്ററാണ് ഇപ്പോള്‍ പുറത്തു വന്നിരിക്കുന്നത്. താടി നീട്ടി വളർത്തി മുടി കെട്ടി വച്ച് കലിപ്പ് ലുക്കിൽ സിഗററ്റ് വലിച്ചു നിൽക്കുന്ന താരത്തിന്റെ പുതിയ ലുക്കും ആരാധകരെ ആവേശം കൊള്ളിക്കുന്നുണ്ട്.

80 കോടി കളക്ഷന്‍ നേടി കുറുപ്പ് തീയേറ്ററുകളില്‍ അഞ്ചാം വാരത്തിലും പ്രദര്‍ശനം തുടരുകയാണ്. കൊവിഡ് പ്രതിസന്ധിയിൽ അടഞ്ഞു കിടന്ന തീയേറ്ററുകളെ ആവേശം കൊള്ളിക്കുന്ന തരത്തിലായിരുന്നു 'കുറുപ്പി"ന്റെ വരവ്.പിടിക്കിട്ടാപ്പുള്ളി സുകുമാര കുറുപ്പിന്റെ ജീവിതം പറയുന്ന ചിത്രം ഒരുക്കിയത് ശ്രീനാഥ് രാജേന്ദ്രനാണ്.'കുറുപ്പ്" കണ്ടിറങ്ങിയവരെല്ലാം ചിത്രത്തിന്റെ അണിയറ പ്രവർത്തകരോട് ചോദിച്ച ചോദ്യവും രണ്ടാം ഭാഗം ഉണ്ടാകുമോ എന്നായിരുന്നു.എന്തായാലും അതുറപ്പിക്കുന്ന തരത്തിലുള്ള മോഷൻ പോസ്റ്ററാണ് ഇപ്പോൾ പുറത്തു വിട്ടിരിക്കുന്നത്.

അതേസമയം കുറുപ്പ്’ നെറ്റ്ഫ്ളിക്സിൽ എത്തിയിരിക്കുകയാണ്.ഡിസംബർ 17ന് ചിത്രം നെറ്റ്ഫ്ളിക്സിൽ റിലീസ് ചെയ്യുമെന്നായിരുന്നു മുൻപ് പ്രഖ്യാപിച്ചിരുന്നത്. എന്നാൽ 14-ാം തിയ്യതി​ അർദ്ധരാത്രിയോടെ തന്നെ ചിത്രം നെറ്റ്ഫ്ളിക്സിൽ റിലീസ് ചെയ്തിരിക്കുകയാണ്. നവംബർ 12ന് റിലീസിനെത്തിയ ചിത്രം ഇപ്പോഴും തിയേറ്ററുകളിൽ പ്രദർശനം തുടരുകയാണ്. അതിനിടയിലാണ് നെറ്റ്ഫ്ളിക്സിലും കുറുപ്പ് എത്തിയിരിക്കുന്നത്.

ദുൽഖർ സൽമാന്റെ ഉടമസ്ഥതയിലുള്ള വേഫറെർ ഫിലിംസും എം സ്റ്റാർ എന്റർടെയ്ൻമെൻറ്സും ചേർന്നാണ് ‘കുറുപ്പ്’ നിർമ്മിച്ചിരിക്കുന്നത്. ഏതാണ്ട് 35 കോടിയോളം മുടക്കിയാണ് ചിത്രം നിർമ്മിച്ചിരിക്കുന്നത്. ദുൽഖർ സൽമാന്റെ ആദ്യചിത്രമായ സെക്കൻഡ് ഷോ ഒരുക്കിയ ശ്രീനാഥ് രാജേന്ദ്രൻ തന്നെയാണ് കുറുപ്പും സംവിധാനം ചെയ്തിരിക്കുന്നത്. മൂത്തോൻ എന്ന ചിത്രത്തിലൂടെ മലയാളത്തിലേക്ക് അരങ്ങേറ്റം കുറിച്ച ശോഭിത ധുലിപാലയാണ് ചിത്രത്തിൽ നായിക. ഇന്ദ്രജിത് സുകുമാരൻ, സണ്ണി വെയ്ൻ, ഷൈൻ ടോം ചാക്കോ, വിജയരാഘവൻ, പി. ബാലചന്ദ്രൻ, സുരഭി ലക്ഷ്മി, ശിവജിത് പത്മനാഭൻ തുടങ്ങി വലിയ താരനിര തന്നെ ചിത്രത്തിനുണ്ട്.