പ്രൊഡ്യൂസേഴ്‌സ് അസോസിയേഷൻ സംഘടനാ ഭാരവാഹി തിരഞ്ഞെടുപ്പുമായി ബന്ധപ്പെട്ട വിവാദങ്ങളിൽ സോഷ്യൽ മീഡിയയിലൂടെ പരസ്‌പരം പോരടിച്ച് സിനിമാ നിർമാതാക്കളായ സാന്ദ്രാ തോമസും വിജയ് ബാബുവും. കോടതിയിൽ നിന്ന് തിരിച്ചടി നേരിട്ട സാന്ദ്ര തോമസിനെ പരിഹസിച്ച് വിജയ് ബാബു പങ്കുവച്ച പ്രകോപനപരമായ പോസ്റ്റിന് അതേ നാണയത്തിൽ മറുപടിയുമായി സാന്ദ്ര.

പ്രൊഡ്യൂസേഴ്സ് അസോസിയേഷൻ തിരഞ്ഞെടുപ്പിൽ മത്സരിക്കാൻ സാന്ദ്ര തോമസ് നൽകിയ പത്രിക തള്ളിയിരുന്നു . ഇതിനെതിരെ കോടതിയെ സമീപിച്ചെങ്കിലും അനുകൂലമായ തീരുമാനം ഉണ്ടായില്ല. ഇതിനെ തുടർന്നാണ് സാന്ദ്രയെ പരസ്യമായി പരിഹസിച്ച് വിജയ് ബാബു രംഗത്തെത്തിയത്.

നിയമം പരിശോധിക്കുന്നത് വിജയ് ബാബുവിന്റെ സർട്ടിഫിക്കറ്റ് അല്ല, മറിച്ച് അസോസിയേഷന്റെ നിയമാവലിയിൽ പറഞ്ഞിരിക്കുന്ന കാര്യങ്ങൾ ആണ് എന്ന സാന്ദ്രയുടെ കുറിപ്പ് പങ്കുവച്ചതിനു ശേഷം ‘എനിക്കും അത്രയേ പറയാനുള്ളൂ സാന്ദ്ര’ എന്നാണ് വിജയ് ബാബു കുറിച്ചത്. തുടർന്ന് സാന്ദ്രയ്ക്ക് ഫ്രൈഡേ ഫിലിം ഹൗസുമായി ഒരു ബന്ധവുമില്ല എന്ന തന്റെ പഴയ കുറിപ്പും വിജയ് ബാബു വീണ്ടും പങ്കുവച്ചു. സമൂഹത്തിൽ വ്യക്തിമുദ്ര പതിപ്പിച്ചവരെ ഉപയോഗിച്ച് ജനശ്രദ്ധ നേടുന്നത് സൂക്ഷിച്ചുവേണം എന്ന് വിജയ് ബാബു പറഞ്ഞു. തന്നെ പ്രകോപിപ്പിക്കരുതെന്നും അങ്ങനെയുണ്ടായാൽ 2010 മുതലുള്ള ചാറ്റുകൾ പുറത്തുവിടുമെന്നും വിജയ് ബാബു പ്രതികരിച്ചിരുന്നു . മനുഷ്യരേക്കാൾ വിശ്വാസയോഗ്യമായതുകൊണ്ട് തനിക്ക് മൃഗങ്ങളെയാണ് ഇഷ്ടമെന്നും വിജയ്ബാബു തന്റെ സോഷ്യൽ മീഡിയ പോസ്റ്റിൽ കുറിച്ചു.

കുറുനരിയുടെ ചിത്രത്തിനൊപ്പമായിരുന്നു വിജയ് ബാബുവിന്റെ നീണ്ട കുറിപ്പ്. മറ്റൊരു പോസ്റ്റിൽ സാന്ദ്രയുമായുള്ള പാർട്ണർഷിപ്പ് അവസാനിപ്പിച്ചതിനു ശേഷം താനൊരു നായ്ക്കുട്ടിയെ വളർത്താൻ തുടങ്ങിയെന്നും വിജയ് ബാബു കുറിച്ചു. വീട്ടിലെ നായ്ക്കുട്ടിയുടെ ചിത്രത്തിനൊപ്പമായിരുന്നു രൂക്ഷമായ ഭാഷയിലെ പരിഹാസകുറിപ്പ്. ഇതിനു മറുപടി ആയാണ് സാന്ദ്ര പോസ്റ്റ് ഇട്ടത്.

തന്റെ ഫേസ്ബുക്ക് പേജിലൂടെയായിരുന്നു മറുപടി. വിജയ് ബാബുവിന് പട്ടിയെ വിശ്വസിക്കാമെന്നും എന്നാൽ പട്ടി വിജയ് ബാബുവിനെ വിശ്വസിക്കുമോയെന്നതിലേയുള്ളൂ പേടിയെന്നാണ് സാന്ദ്ര കുറിച്ചത്.

പിന്നാലെ ഇതിന് മറുപടിയുമായി വിജയ് ബാബുവും രംഗത്തെത്തി.

'നിങ്ങളുമായുള്ള പാർട്ണർഷിപ്പ് ഇല്ലാതായി. നിങ്ങൾക്ക് പകരം മറ്റാെരാളെ ഞാൻ എടുത്തു. നിങ്ങൾ പറഞ്ഞ കാര്യം ശരിയാണ് സാന്ദ്ര. അത് നിങ്ങളെക്കാളും വിശ്വസിക്കാൻ പറ്റുന്നതാണ്. സാന്ദ്രയുടെ പട്ടി ഷോയ്ക്ക് കൂടുതൽ ഉത്തരം പറയാൻ സമയമില്ല എനിക്ക് ഷൂട്ട് ഉണ്ട്. ബെെ' - എന്നാണ് വിജയ് ഫേസ്ബുക്കിൽ കുറിച്ചു. പോസ്റ്റിനൊപ്പം വീട്ടിലെ പട്ടിയുടെ ചിത്രവും വിജയ് പങ്കുവച്ചിട്ടുണ്ട്.