ദിലീപും കാവ്യാ മാധവനും തമ്മിലുള്ള വിവാഹം ചെറിയ രീതിയിലൊന്നുമല്ല മലയാള സിനിമയും പ്രേക്ഷകരും ചര്‍ച്ച ചെയ്യ്തത്. എന്നാലും എന്തിനായിരിക്കും കാവ്യ മാധവന്‍ ദിലീപിനെ വിവാഹം കഴിച്ചിട്ടുണ്ടാകുക എന്ന ചോദ്യത്തിന് പലര്‍ക്കും ഉത്തരം ലഭിച്ചില്ല. ചിലരുടെ മനസ്സില്‍ മഞ്ജുവിന്റെ ജീവിതം തകര്‍ത്ത പെണ്ണാണ് കാവ്യ. മറ്റു ചിലരാകട്ടെ കാവ്യ ചെയ്തത് നല്ല കാര്യമാണെന്നും ഇത് നേരത്തേ നടക്കേണ്ടതായിരുന്നുവെന്നും പറയുന്നു. എന്നാല്‍ ദിലീപുമായി വിവാഹം നടക്കാനിടയായ കാരണം എന്തെന്ന് കാവ്യ തന്നെ വെളിപ്പെടുത്തുകയാണ്. സ്റ്റാര്‍ ആന്‍ഡ് സ്‌റ്റൈലിന് നല്‍കിയ അഭിമുഖത്തിലൂടെയാണ് കാവ്യ ആദ്യമായി പ്രതികരിക്കുന്നത്.

കാവ്യയുടെ വാക്കുകള്‍ ഇങ്ങനെ:

ഞാനും ദിലീപേട്ടനും ഒന്നിക്കണമെന്ന് ഞങ്ങളെക്കാള്‍ ആഗ്രഹിച്ചവരുണ്ട്. അത് ഞങ്ങളെ സ്‌നേഹിക്കുന്നവരായിരുന്നു. അതില്‍ കൊച്ചുകുട്ടികള്‍ മുതല്‍ മുത്തശ്ശിമാര്‍ വരെയുണ്ട്. വിവാഹത്തിന് ഒരാഴ്ച മുമ്ബാണ് ദീലീപിന്റെ ബന്ധുക്കള്‍ തന്നെ പെണ്ണുകാണാന്‍ എത്തിയത്. വിവാഹത്തിന്റെ തലേദിവസം മാത്രമാണ് അടുത്ത ബന്ധുക്കളെ പോലും വിവാഹത്തിന് ക്ഷണിച്ചത്.ദിലീപിന്റെ ബന്ധുക്കള്‍ പെണ്ണ് കാണാന്‍ വന്നതിന് പിന്നാലെ ജാതകം നോക്കി. നല്ല ചേര്‍ച്ചയായിരുന്നു. ജാതകം കൂടി ചേര്‍ന്നതോടെ പിന്നീട് എല്ലാ കാര്യങ്ങളും വേഗത്തിലായി. തന്റെയും ദിലീപിന്റെയും വിവാഹ വാര്‍ത്ത അറിഞ്ഞ് ആളുകള്‍ കൂടുമോ എന്ന പേടി കൊണ്ടാണ് ആളുകളെ ഒന്നും അറിയിക്കാതിരുന്നത്. എന്നാല്‍ തങ്ങള്‍ ക്ഷണിച്ചവരാരും ഈ വാര്‍ത്ത പുറത്ത് വിട്ടില്ല. പലരും പറയുന്നത് പോലെ തന്നെ, സിനിമയില്‍ അടുത്ത ചങ്ങാതിയായിരുന്നു ദീലീപ്. എന്ത് കാര്യവും മനസില്‍ സൂക്ഷിക്കാന്‍ കൊടുത്താല്‍ അതവിടെയുണ്ടാകും. സിനിമയെയും സിനിമാക്കാരെയും തിരിച്ചറിയുന്നവര്‍ക്കൊപ്പമായിരിക്കണം ഇനിയുള്ള ജീവിതം എന്ന് കാവ്യ തീരുമാനിച്ചിരുന്നു. അങ്ങനെയാണ് ദിലീപിലെത്തിയത്.

ദിലീപ് എന്ന നടനേക്കാള്‍ ദിലീപ് എന്ന വ്യക്തിയെ ആണ് കാവ്യ മാധവന്‍ ബഹുമാനിക്കുന്നത്. ബന്ധങ്ങള്‍ക്ക് വലിയ വില കൊടുക്കുന്ന ദിലീപുമായി ഒന്നിക്കാന്‍ കഴിഞ്ഞതില്‍ വലിയ സന്തോഷമുണ്ട്. താന്‍ വീണ്ടും വിവാഹം കഴിക്കണമെന്നത് അച്ഛന്റെയും അമ്മയുടെയും ആഗ്രഹമായിരുന്നു. അവരുടെ മനസമാധാനത്തിന് വേണ്ടി പല ആലോചനകളും നടന്നു. ആ ആലോചനയാണ് ദിലീപേട്ടനില്‍ എത്തിയത്. തന്നെ നന്നായി അറിയുന്ന ആള്‍ എന്നത് കൊണ്ട് തന്നെ ഈ ബന്ധത്തിന് ആരും എതിര് പറഞ്ഞതുമില്ല. പക്ഷേ അവസാന നിമിഷം വരെ തീരുമാനം രഹസ്യമാക്കി വെച്ചു. ഞങ്ങളെ ചേര്‍ത്ത് പണ്ടൊക്കെ ഒരുപാട് ഗോസിപ്പുകള്‍ പ്രചരിച്ചിരുന്നു. അതൊന്നും ഞങ്ങള്‍ കാര്യമായി എടുത്തില്ല. ഒരുമിച്ച് ജീവിക്കുക എന്ന കാര്യം ഞങ്ങള്‍ ആലോചിച്ച് പോലുമില്ല.

ദൈവ നിശ്ചയം ഒന്നുകൊണ്ട് മാത്രമാണ് തന്റെ ജീവിതം ഇവിടെ വരെ എത്തിയത് എന്ന് വിശ്വസിക്കുന്ന ആളാണ് ഞാന്‍. ഇത് വരെ സംഭവിച്ചതെല്ലാം അപ്രതീക്ഷിതമായിരുന്നു. അതുപോലെ തന്നെ ഇനിയുള്ള കാര്യങ്ങളും എന്താകുമെന്ന് പറയാന്‍ കഴിയില്ല. തനിക്ക് ശരിയാണ് എന്ന് തോന്നുന്നത് മാത്രം ചെയ്യും. തുടര്‍ന്നും അത് അങ്ങനെ തന്നെ ആയിരിക്കും. സ്റ്റാര്‍ ആന്‍ഡ് സ്‌റ്റൈലിനോട് കാവ്യ പറയുന്നു...