സൈറ എന്ന ശക്തമായ സ്ത്രീ കഥാപാത്രത്തെയാണ് ശ്വേത മേനോന്‍ അവതരിപ്പിയ്ക്കുന്നത്. പ്രയാഗ മാര്‍ട്ടിന്‍ അവതരിപ്പിയ്ക്കുന്ന മുംതാസ് എന്ന കഥാപാത്രത്തിന്റെ അമ്മയുമാണ്. ജീവിതത്തോട് പൊരുതുന്ന കഥാപാത്രമാണ് സൈറ.

മുംബൈ ലഹളയെ തുടര്‍ന്ന് വടക്കന്‍ കേരളത്തില്‍ എത്തിപ്പെടുന്ന അമ്മയും മകളുമാണ് സൈറയും മുംതാസും. മുംബൈയില്‍ നിന്ന് രക്ഷപെടുമ്പോള്‍ ശ്വേത മന്‍സൂര്‍ എന്ന ചെറുപ്പക്കാരനെയും അയാളുടെ അമ്മ ഫാത്തിബിയെയും കൂടെ കൂട്ടുന്നു. ഇവരുടെ രക്ഷകയാണ് സൈറ.

മകള്‍ക്കൊരു നല്ല വരനെ കിട്ടാന്‍ വേണ്ടി കാത്തിരിയ്ക്കുകയാണ് സൈറ. അപ്പോഴാണ് കാന്‍സര്‍ എന്ന വിപത്ത് തന്നെ പിടിപെട്ട കാര്യം അറിയുന്നത്. തുടര്‍ന്നുള്ള കഥയാണ് സിനിമ എന്ന് സംവിധായകന്‍ പറഞ്ഞു.

ആനന്ദം എന്ന ചിത്രത്തിലൂടെ ശ്രദ്ധേയനായ റോഷന്‍ മാത്യുവാണ് ടൈറ്റില്‍ കഥാപാത്രമായ മന്‍സൂറിനെ അവതരിപ്പിയ്ക്കുന്നത്. ഫാത്തിബി എന്ന അമ്മ വേഷത്തില്‍ ഗൗതമി അഭിനയിക്കുന്നു. 13 വര്‍ഷത്തിന് ശേഷം ഗൗതമി മലയാളത്തിലേക്ക് തിരിച്ചെത്തുന്ന ചിത്രമെന്ന പ്രത്യേകതയുമുണ്ട്.

ഫെബ്രുവരി അവസാന ആഴ്ച ചിത്രത്തിന്റെ ചിത്രീകരണം കണ്ണൂരില്‍ ആരംഭിയ്ക്കും എന്ന് സംവിധായന്‍ പി ടി കുഞ്ഞു മുഹമ്മദ് അറിയിച്ചു.