സോപ്പുകളുടെയും പൗഡറിന്റെയും എണ്ണകളുടെയും പരസ്യങ്ങളിലഭിനയിച്ച് പുലിവാല് പിടിച്ചതോടെ താരങ്ങളെല്ലാം വലിച്ച് വാരി ആഡ്ഫിലിമുകളില്‍ അഭിനയിക്കുന്നത് നിര്‍ത്തി. പല ഉപഭോക്താക്കളും കേസുമായി കോടതി കയറിയതോടെയാണ് താരങ്ങള്‍ വെട്ടിലായത്. ഇന്ദുലേഖയുടെ സോപ്പ് തേച്ചിട്ട് വെളുത്തില്ലെന്ന് പറഞ്ഞ് മമ്മൂട്ടിക്കെതിരെ വയനാട് സ്വദേശി കേസ് കൊടുത്തതോടെയാണ് താരങ്ങള്‍ ഭയന്നത്.

ആ കേസ് പണം കൊടുത്ത് ഒത്തുതീര്‍പ്പാക്കുകയായിരുന്നു. മമ്മൂട്ടി സൗത്ത് ഇന്ത്യന്‍ ബാങ്ക്, പോത്തീസ് തുടങ്ങിയ ബ്രാന്‍ഡഡ് സ്ഥാപനങ്ങളുടെയും സാധനങ്ങളുടെയും പരസ്യങ്ങള്‍ മാത്രമാണ് ഇപ്പോള്‍ കമ്മിറ്റ് ചെയ്യുന്നത്.

ഹെഡ്ജിന്റെ പരസ്യത്തിലൂടെ മോഹന്‍ലാല്‍ പറഞ്ഞ കാര്യങ്ങള്‍ സത്യസന്ധമല്ലെന്ന് ആരോപിച്ച് കൊച്ചി സ്വദേശി കേസ് കൊടുത്തിരുന്നു. ഇതും താരങ്ങളെ ആശങ്കയിലാഴ്ത്തി. കണ്ണന്‍ദേവന്‍, ബ്രാന്‍ഡഡ് ഇലട്രോണിക്‌സ് ഉപകരണങ്ങള്‍, ആപ്പുകള്‍ എന്നിവയുടെ പരസ്യങ്ങളിലാണ് മോഹന്‍ലാല്‍ ഇപ്പോള്‍ അഭിനയിക്കുന്നത്.

ചില താരങ്ങള്‍ പ്രസിദ്ധമായ ഒരു എണ്ണയുടെ പരസ്യത്തില്‍ അഭിനയിക്കുന്നുണ്ടെങ്കിലും മുടി കിളിക്കാതെ വന്ന പലരും കോടതിയില്‍ കേസ് കൊടുത്തിട്ടുണ്ട്. താമസിക്കാതെ ഈ താരങ്ങളും വെട്ടിലാകും.

എന്നാല്‍ മുട്ട് വേദനയുടെയും ആസ്മയുടെയും ചുമയുടെയും മരുന്നുകളുടെ പരസ്യങ്ങളില്‍ നിന്ന് താരങ്ങളെ ഒഴിവാക്കി ഉപഭോക്താക്കളെ ഇറക്കി ചിലര്‍ പരസ്യം പടച്ചുവിടുന്നുണ്ട്. ഇതില്‍ പലരെയും കാശ് കൊടുത്ത് വിലയ്ക്ക് വാങ്ങിയതാണെന്ന് വ്യാപകമായ ആക്ഷേപമുണ്ട്.

മരുന്നുകള്‍ ഫലിക്കാതെ വന്നാല്‍ ആളുകള്‍ കോടതിയല്‍ പോകുമെന്ന് ഉറപ്പാണ്. ഇതോടെ പരസ്യങ്ങളില്‍ അഭിനയിച്ച ഉപഭോക്താക്കള്‍ കോടതി കയറേണ്ടിവരും. താരങ്ങള്‍ കരാര്‍ വയ്ക്കുമ്പോള്‍ കേസുകളും മറ്റും കമ്പനി തീര്‍പ്പാക്കണമെന്ന് ഉറപ്പിക്കാറുണ്ട്. പക്ഷെ, സാധാരണക്കാരന്റെ കാര്യം അങ്ങനെയല്ല.