മണിച്ചിത്രത്താഴിലെ അതിവൈകാരികമായ ആ ചിത്രീകരണ രംഗത്തിന് പിന്നില്‍...
പ്രേതബാധക്കു പേരുകേട്ട മാടമ്പള്ളിത്തറവാട്ടില്‍ താമസിക്കാനെത്തുന്ന നകുലന്റേയും (സുരേഷ് ഗോപി) ഭാര്യ ഗംഗയുടേയും (ശോഭന) ജീവിതത്തില്‍ കടന്നു വരുന്ന ചില അത്യപൂര്‍വ്വമായ സംഭവങ്ങളും അമേരിക്കയില്‍ നിന്നു വരുന്ന നകുലന്റെ സുഹൃത്ത് ഡോ.സണ്ണി ജോസഫ് (മോഹന്‍ ലാല്‍) ഈ അപൂര്‍വ്വ സംഭവങ്ങളുടെ ചുരുളഴിക്കുന്നതുമാണ് സിനിമയുടെ ഇതിവൃത്തം. ഈ ചിത്രത്തിന്റെ തകര്‍പ്പന്‍ ജയം പത്തുവര്‍ഷങ്ങള്‍ക്ക് ശേഷമാണെങ്കിലും ഇന്ത്യയിലെ വിവിധ ഭാഷകളില്‍ പുനര്‍നിര്‍മ്മിക്കുവാന്‍ കാരണമായി. ആപ്തമിത്ര (കന്നഡ) ചന്ദ്ര മുഖി (തമിഴ്) രാജ്‌മോഹോല്‍ (ബംഗാളി) ഭൂല്‍ ഭുലയ്യ (ഹിന്ദി) നാഗവല്ലി (തെലുങ്ക്) എന്നീ പേരുകളിലാണിവ ഇറങ്ങിയത്. എല്ലാ ചിത്രങ്ങളും വന്‍ വിജയമാണ് നേടിയത്.
എത്ര കണ്ടാലും കൊതിതീരാത്ത സിനിമയാണു മണിച്ചിത്രത്താഴ്. മലയാളത്തിലെ ഏറ്റവും പ്രശസ്തമായ ചിത്രങ്ങളിലൊന്നാണിത്. സംവിധായകന്‍ ഫാസിലിന്റെ മാസ്റ്റര്‍പീസ് ആയി ഇതു കണക്കാക്കപ്പെടുന്നു. 365 ദിവസത്തില്‍ കൂടുതല്‍ റിലീസിംഗ് സെന്ററില്‍ പ്രദര്‍ശിപ്പിച്ച മലയാളസിനിമകളില്‍ ഒന്നാണിത്. പത്തൊന്‍പതാം നൂറ്റാണ്ടില്‍ മധ്യതിരുവിതാംകൂറിലെ പ്രശസ്തമായ ആലുമൂട്ടില്‍ കൊട്ടാരത്തിലെ ഒരു ഈഴവ കുടുംബത്തില്‍ നടന്ന ദുരന്തസംഭവം ഈ കഥയെ സ്വാധീനിച്ചിട്ടുണ്ട്.
ശോഭന എന്ന നടിയുടെ കയ്യില്‍ ഭദ്രമായിരുന്നു ഗംഗ എന്ന നാഗവല്ലി. സൗമ്യയായ ഗംഗയായും രുദ്രയായ നാഗവല്ലിയായും മലയാളിയെ വല്ലാതെ ഭ്രമിപ്പിച്ചു അവര്‍. മാത്രമല്ല ഗംഗയില്‍ നിന്ന് നാഗവല്ലിയിലേയ്ക്കുള്ള മാറ്റം അതിശയാവഹമായ രീതിയിലാണ് അവര്‍ തിരശ്ശീലയില്‍ ആടിത്തീര്‍ത്തത്. ശോഭന എന്ന നടിയുടെ അനുഗ്രഹീതമായ അഭിനയ സിദ്ധി മനസ്സിലാകണമെങ്കില്‍ അന്യഭാഷയില്‍ മറ്റുനടിമാര്‍(ജ്യോതികയും വിദ്യാബാലനും മറ്റും) ഈ കഥാപാത്രത്തെ എങ്ങനെ ഉള്‍ക്കൊള്ളുകയും അവതരിപ്പിക്കുകയും ചെയ്തു എന്നറിയണം. സംഭ്രമത്തിനുപകരം പൊട്ടിച്ചിരിയാവും നമ്മില്‍ പലപ്പോഴും ഉണ്ടാവുക.
സിനിമ പ്രേമികള്‍ക്ക് ഏറ്റവും ഇഷ്ടപ്പെട്ട സീനുകളില്‍ ഒന്നാണു വിടമാട്ടെ.. ഉന്നേക്കൊന്ന് ഉന്‍ രക്തത്തെ കുടിപ്പേന്‍ എന്നു തുടങ്ങുന്ന നാഗവല്ലിയുടെ ഡയലോഗ് മലയാളി പ്രേക്ഷകരെ ഏറ്റവും ആവേശം കൊള്ളിച്ച സിനിമ ഡയലോഗ്. ഒറ്റകൈ കൊണ്ടു ശോഭന കട്ടില്‍ പൊക്കുന്ന രംഗങ്ങള്‍ അല്‍പ്പം ഞെട്ടലോടെ തന്നെയായിരുന്നു പ്രേക്ഷകര്‍ കണ്ടത്. മണിച്ചിത്രത്താഴും മറ്റ് ഓര്‍മ്മകളും എന്ന പുസ്തകത്തില്‍ ഈ രംഗത്തെക്കുറിച്ച് ഫാസില്‍ പറഞ്ഞത്
അതിവൈകാരികമായ ആ രംഗം ചിത്രീകരിക്കുമ്പോള്‍ ശോഭന വളരെ നേര്‍വസായിരുന്നു. കട്ടില്‍ ഉയര്‍ത്താനാകുമോ എന്ന ആശങ്ക വേറേയും. വളരെ ടെന്‍ഷനോടെ നിന്ന ശോഭന പല തവണ ആ സീന്‍ എന്നെ കൊണ്ടു വായിപ്പിച്ചു. ഇന്നേയ്ക്കു ദുര്‍ഗാഷ്ടമി എന്നു പറയുന്ന ഭാഗം എന്നെ കൊണ്ട് അഭിനയിപ്പിച്ചു കാണിക്കുകയും ചെയ്തു. തന്റെ ഓരോ ചലനങ്ങളും ശോഭന ഒപ്പിയെടുത്തു എന്നും പുസ്തകത്തില്‍ ഫാസില്‍ പറയുന്നു.
തനിക്ക് ഈ കട്ടില്‍ ഒറ്റയ്ക്കു പൊക്കാനാകില്ല എന്ന് അഭിനയത്തിനു മുന്നോടിയായി ശോഭന പറഞ്ഞിരുന്നു. നാഗവല്ലിയായി മാറിക്കഴിയുമ്പോള്‍ കാട്ടില്‍ താനേ പൊക്കിക്കൊളും എന്നു പറഞ്ഞപ്പോള്‍ എന്നെ ആകാംഷയോടെ നോക്കിയാണു ശോഭന ടച്ചപ്പിന് പോയത്. പിന്നീട് ഡയലോഗ് പറഞ്ഞു റിഹേഴ്‌സല്‍ നടത്തിയപ്പോള്‍ ഞാന്‍ ഒരു കൈ കൊണ്ടു കട്ടില്‍ പൊക്കുന്നതു കണ്ട് അമ്പരന്നു ശോഭന മറ്റുള്ളവരുടെ മുഖത്തേയ്ക്ക് നോക്കി.
ഒടുവില്‍ ശോഭന വന്നു കട്ടിലിനടയില്‍ നോക്കിയപ്പോഴാണു സെറ്റ് അസിസ്റ്റന്റായ അലിയെ കണ്ടത്. അലിയുടെ സഹായത്തോടെയായിരുന്നു ഒറ്റകൈ കൊണ്ട് ആ കട്ടില്‍ പൊക്കിയത്. പിന്നീട് താന്‍ നിര്‍ദേശം നല്‍കിയതിനേക്കാള്‍ വളരെ മനോഹരമായിട്ട് ശോഭന ആ രംഗത്തെ അനശ്വരമാക്കി.
https://www.facebook.com/Malayalivartha
