എന്റെ ജീവിതത്തില്‍ വലിയ വഴിത്തിരിവായിരുന്നു ആ ദിവസങ്ങള്‍ 'ഇടയ്ക്ക് ആരോഗ്യ പ്രശ്‌നങ്ങളുണ്ടായി. ഷൂട്ടിംഗ് തിരക്കുകള്‍ക്കിടയില്‍ ഞാന്‍ എന്റെ ആരോഗ്യത്തെ മറന്നു ആഹാരത്തില്‍ വേണ്ടുന്ന കരുതല്‍ ഞാന്‍ എടുത്തില്ല. നാലു ഭാഷയില്‍ ഒരേ സമയം ഓടി നടന്ന് അഭിനയിച്ചിരുന്ന കാലം ഉണ്ടായിരുന്നു. ആ ഓട്ടത്തിനിടയ്ക്ക് ശരീരത്തെക്കുറിച്ച് ആലോചിച്ചില്ല. ഒട്ടും ആരോഗ്യകരമല്ലാത്ത ഭക്ഷണരീതികളും വ്യായാമം ഇല്ലായ്മയും... ഇതൊന്നും ഞാന്‍ ശ്രദ്ധിക്കുന്നേ ഇല്ലായിരുന്നു. എണ്ണയില്‍ വറുത്ത വിഭവങ്ങളും മധുരപലഹാരങ്ങളും നിയന്ത്രണമില്ലാതെ കഴിച്ചു. ശരീരഭാരം 105 കിലോ ആയി,


യാത്രയില്‍ വിശക്കുമ്പോള്‍ ഭക്ഷണത്തിനു പകരം ഗ്ലൂക്കോസായി. ആദ്യം ഒന്നും രണ്ടും പാക്കറ്റുകളായിരുന്നത് പിന്നീട് വിശപ്പറിയാതിരിക്കാന്‍ അതിന്റെ എണ്ണം കൂടി. ഇത് ശരീരത്തെ വല്ലാതെ ബാധിച്ചു. തടി കൂടാന്‍ തുടങ്ങി. ഇടയ്ക്ക് ഹോര്‍മോണ്‍ വ്യത്യാസമുണ്ടായി. പോരെങ്കില്‍ ഡിപ്രഷനും. ഇതു രണ്ടും വലിയ കുഴപ്പങ്ങളുണ്ടാക്കി. എല്ലാം എന്റെ നിയന്ത്രണത്തില്‍ നിന്ന് മാറിപ്പോയതു പോലെ.

അതോടെ സിനിമയില്‍ നിന്ന് ഞാന്‍ മാറിനില്‍ക്കാന്‍ തുടങ്ങി. ഒന്നര വര്‍ഷം ഞാന്‍ ഒറ്റയ്ക്കായിരുന്നു. പുറത്തേക്കിറങ്ങിയില്ല. ഒരുപാടുപേര്‍ വിളിച്ചിരുന്ന എന്റെ ഫോണ്‍ പെട്ടെന്ന് നിശ്ശബ്ദമായി. എല്ലാവരും എന്നെ മറന്നതു പോലെ. ഞാന്‍ സിനിമകള്‍ കാണുന്നതു പോലും നിര്‍ത്തി. ഞാനഭിനയിച്ചിരുന്ന സിനിമകള്‍ വരുമ്പോള്‍ ടിവി ഓഫ് ചെയ്യുന്ന തരത്തിലായിരുന്നു എന്റെ അവസ്ഥയെന്ന് നന്ദിനി പറയുന്നു.