പുലിമുരുകന്‍ തരംഗത്തിനുമേല്‍ മുന്തിരിവള്ളികള്‍ തളിര്‍ക്കുന്നു
സിനിമാ സമരം കാരണം നീട്ടിവച്ചിരുന്ന 'മുന്തിരിവള്ളികള്‍ തളിര്‍ക്കുമ്പോള്‍' റിലീസ് ചെയ്തു. മോഹന്‍ലാലിന്റെ സൂപ്പര്‍ ഡ്യൂപ്പര്‍ ചിത്രമായ പുലിമുരുകന്‍ 150 കോടി ക്ലബില്‍ കയറ്റിയതിനുശേഷം തിയേറ്ററുകളിലെത്തിയ ചിത്രമായതുകൊണ്ടു തന്നെ മോഹന്‍ലാല്‍ ആരാധകര്‍ ഏറെ പ്രതീക്ഷയോടു കൂടിയാണ് വരവേറ്റത്. വെള്ളിമൂങ്ങയുടെ വിജയത്തിനുശേഷം ജിബു ജേക്കബ് ഒരുക്കിയ ചിത്രമാണ് 'മുന്തിരിവള്ളികള്‍ തളിര്‍ക്കുമ്പോള്‍' വി.ജെ. ജെയിംസിന്റെ ചെറുകഥയായ പ്രണയോപനിഷത്ത് എന്ന ചെറുകഥയെ ആധാരമാക്കി എം. സിന്ധുരാജ് തിരക്കഥയെഴുതിയ ചിത്രത്തിന് ആവറേജ് നിലവാരമേ കാണാന്‍ സാധിക്കുന്നുള്ളൂ.
ഒരു ഘട്ടം കഴിഞ്ഞാല്‍ വിരസമായി പോകുന്ന പല ദാമ്പത്യബന്ധങ്ങളിലും പ്രണയം വീണ്ടും മൊട്ടിടുകയാണെങ്കില്‍ അവിടെ മുന്തിരിവള്ളികള്‍ തളിരിടും. പല ദാമ്പത്യ ബന്ധങ്ങള്‍ക്കും പ്രണയം ഒരു പരിഹാരമാണെന്ന സന്ദേശം നല്‍കാന്‍ സംവിധായകന്‍ ശ്രമിക്കുന്നു. കുടുംബ പശ്ചാത്തലത്തില്‍ ഏറെ നര്‍മ്മ മുഹൂര്‍ത്തങ്ങള്‍ ഉള്‍ക്കൊള്ളിച്ചിരിക്കുന്ന ചിത്രമാണ് എന്നാല്‍പോലും കോമഡി നിലവാരം പുലര്‍ത്തിയില്ല. നിരവധി സിനിമകളില്‍ ഒരുമിച്ചഭിനയിച്ച മോഹന്‍ലാലും മീനയും വീണ്ടും സ്‌ക്രീനില്‍ ഒന്നിക്കുമ്പോള്‍ ആവര്‍ത്തന വിരസത ഉണ്ടാക്കാതെ രണ്ടുപേരും നല്ല രീതിയിലുള്ള അഭിനയം കാഴ്ചവച്ചിരിക്കുന്നു.
ആരാധകരെ കൈയ്യിലെടുത്ത ആക്ഷന്‍ ഹീറോ വേഷത്തില്‍ നിന്നും കുടുംബങ്ങള്‍ക്ക് പ്രിയപ്പെട്ട ഉലഹന്നന്‍ എന്ന കഥാപാത്രമായി മോഹന്‍ലാല്‍ എത്തുന്നു. 'മൈ ലൈഫ് ഈസ് മൈ വൈഫ്' എന്ന ടൈറ്റില്‍ ടാഗോടെ എത്തുന്ന ചിത്രം പൂര്‍ണമായും കുടുംബത്തിന് പ്രാധാന്യം നല്‍കുന്നു. അനൂപ്‌മേനോന്‍, ഐമ സെബാസ്റ്റ്യന്‍, സനൂപ് അലന്‍സിയ എന്നിവരാണ് മറ്റുതാരങ്ങള്‍. ചിത്രത്തിന്റെ നിര്‍മ്മാണവും വിതരണവും വീക്കെന്‍ഡ് ബ്ലോക്ബസ്റ്റര്‍ ആണ് നിര്‍വഹിച്ചിരിക്കുന്നത്. ബിജിബാല്‍, എം. ജയചന്ദ്രന്‍ എന്നിവര്‍ നിര്‍വഹിച്ച ചിത്രത്തിന്റെ സംഗീതം നല്ല നിലവാരം പുലര്‍ത്തുന്നു.
https://www.facebook.com/Malayalivartha
