നടിയെ ആക്രമിച്ചതിന്റെ ഗൂഢാലോചനയില്‍ നടന്‍ ദിലീപിന് പങ്കുണ്ടെന്ന് സാഹചര്യത്തെളിവുകള്‍ ഉണ്ടെന്ന് ഹൈക്കോടതി വ്യക്തമാക്കിയതോടെ മലയാള സിനിമാ ലോകം സ്തംഭിച്ചിരിക്കുകയാണ്. ഇതുവരെ ദിലീപിനെ പ്രതിരോധിക്കാന്‍ പരസ്യമായും രഹസ്യമായും രംഗത്ത് വന്നവരെല്ലാം എന്ത് ചെയ്യണമെന്ന് അറിയാത്ത അങ്കലാപ്പിലാണ്.

അതേസമയം അമ്മയുടെ ജനറല്‍ബോഡിക്ക് ശേഷം നടന്ന വാര്‍ത്താസമ്മേളനത്തിലെ അതേ നിസംഗത മമ്മൂട്ടിയും മോഹന്‍ലാലും തുടരുകയാണ്. ഇത്രയും പ്രശ്‌നങ്ങള്‍ തന്റെ വിശ്വസ്ഥനായ ദിലീപിന് സംഭവിക്കുമ്പോഴും മമ്മൂട്ടി ഒരാഴ്ച സിംഗപ്പൂരിലായിരുന്നു. മാത്രമല്ല, തന്റെ ഷൂട്ടിംഗ് തിരക്കുകളും മറ്റും അദ്ദേഹം മാറ്റിവച്ചിട്ടുമില്ല.

അതേസമയം സിദ്ധിഖ്, സലിംകുമാര്‍, ഇടവേളബാബു, ഷാജോണ്‍ തുടങ്ങി ദിലീപുമായി അടുപ്പമുള്ള നിരവധി പേരും സംവിധായകരും സാങ്കേതിക പ്രവര്‍ത്തകരും താരത്തെ എങ്ങനെയും ജാമ്യത്തിലിറക്കാന്‍ ചെയ്യാവുന്ന സഹായങ്ങളെല്ലാം ചെയ്തു. മമ്മൂട്ടി കാര്യങ്ങള്‍ അപ്പപ്പോള്‍ അറിയുന്നുണ്ടെങ്കിലും ഒന്നിലും നേരിട്ട് ഇടപെടുന്നില്ല. മുകേഷിനോട് ഇക്കാര്യത്തില്‍ പരസ്യപ്രചരണം നടത്തുകയോ, ഇടപെടുകയോ ചെയ്യരുതെന്ന് സി.പി.എം കര്‍ശന നിര്‍ദ്ദേശം നല്‍കിയിട്ടുണ്ട്. മഞ്ജവാര്യരെ നായികയാക്കി അഭിനയിപ്പിച്ചത് കൊണ്ട് മോഹന്‍ലാല്‍ ഈ വിഷയത്തില്‍ തുടക്കം മുതലേ ഇടപെടുന്നില്ല.

അതേസമയം സുപ്രീംകോടതിയില്‍ ജാമ്യാപേക്ഷ നല്‍കാന്‍ ദിലീപിന്റെ സഹോദരന്‍ അനൂപും മറ്റും ആലോചിക്കുന്നതായി അറിയുന്നു. എന്നാല്‍ രാജ്യത്തെ തന്നെ അപൂര്‍വ്വങ്ങളില്‍ അപൂര്‍വ്വമായ ഈ കേസില്‍ ജാമ്യം ലഭിക്കുക ബുദ്ധിമുട്ടാണെന്ന് നിയമവിദഗ്ധര്‍ ചൂണ്ടിക്കാട്ടുന്നു. രാജ്യം മുഴുവന്‍ ചര്‍ച്ച ചെയ്യപ്പെട്ട കേസാണിത്. ഇനി ജാമ്യം കിട്ടി പുറത്ത് വന്നാലും ദിലീപിന് പഴയപോലെ സിനിമയില്‍ ചുവടുറപ്പിക്കാന്‍ ബുദ്ധിമുട്ടാണ്.