നടി ആക്രമിക്കപ്പെട്ട കേസിൽ ഏറെയൊന്നും ചർച്ച ചെയ്യാത്ത പേരാണ് നടി ശ്രീതയുടേത്. നടി ആക്രമിക്കപ്പെട്ട ശേഷം രമ്യ നമ്പീശന്റെ വീട്ടിൽ നടി തങ്ങിയിരുന്നെന്നാണ് ആദ്യം വാർത്തകൾ പുറത്ത് വന്നിരുന്നത്. എന്നാൽ കേസ് അന്വേഷണം ശക്തമായി തുടരുന്നതിനിടയിലാണ് ശ്രീതയുടെ പേരും ഇതിലേയ്ക്ക് വന്നത്. മജിസ്‌ട്രേറ്റിന് മുന്നില്‍ മൊഴി കൊടുക്കാന്‍ വന്ന സമയത്താണ് നടി ശ്രീതയുടെ വീട്ടില്‍ തങ്ങിയത്. സംഭവം നടന്നതിന്റെ തൊട്ടടുത്ത ദിവസമായതിനാൽ ശ്രീതയോട് നടി കൂടുതൽ കാര്യങ്ങൾ പറഞ്ഞതായാണ് പോലീസ് കരുതുന്നത്.

അങ്ങനെയാണ് ശ്രീതയെ അന്വേഷണ സംഘം ചോദ്യം ചെയ്യാനായി വിളിച്ചു വരുത്തിയത്. ചോദ്യം ചെയ്യലിനിടെ ദിലീപും ശ്രീതയും തമ്മിലുള്ള ബന്ധത്തെപ്പറ്റിയും അന്വേഷണ സംഘം ചോദിച്ചു. എന്നാൽ ദിലീപുമായി യാതൊരു ബന്ധമില്ലെന്നും ആക്രമിക്കപ്പെട്ട നടി തന്റെ ആത്മ സുഹൃത്താണെന്നും പറഞ്ഞു. തന്റെ പ്രിയ കൂട്ടുകാരിയുടെ വേദനയിൽ താനും തകർന്നു പോയെന്ന് നിറകണ്ണുകളോടെ ശ്രീത മൊഴി നൽകി.

കൊച്ചിയിൽ നടി ആക്രമിക്കപ്പെട്ട സംഭവത്തിലാണ് നടി ശ്രീത ശിവദാസിനെ അന്വേഷണ സംഘം ചോദ്യം ചെയ്തത്. കഴിഞ്ഞ ദിവസം ഉളിയന്നൂരുള്ള വീട്ടിലെത്തിയാണ് ശ്രീതയുടെ മൊഴി എടുത്തത്. കേസിലെ ഗൂഢാലോചനകുറ്റത്തിന് അറസ്റ്റിലായ നടന്‍ ദിലീപുമായി തനിക്ക് യാതൊരു സൗഹൃദവും ഇല്ലെന്ന് ശ്രീത വ്യക്തമാക്കി. ദിലീപുമായി വിദേശയാത്ര നടത്തുകയോ ഷോകളില്‍ പങ്കെടുക്കുകയോ സിനിമയില്‍ അഭിനയിക്കുകയോ ചെയ്തിട്ടില്ലെന്നും നടി മൊഴി നല്‍കിയതായി റിപ്പോർട്ടുകൾ പുറത്തുവരുന്നുണ്ട്.

ആക്രമിക്കപ്പെട്ട നടിയും താനും അടുത്ത സുഹൃത്തുക്കളാണ്. തന്റെ വിവാഹത്തില്‍ നടി പങ്കെടുത്തിട്ടുണ്ട്. ആക്രമിക്കപ്പെട്ടശേഷം ഫോണില്‍ നിരവധി തവണ വിളിച്ചതായും ശ്രീത മൊഴി നല്‍കി. ആക്രമിക്കപ്പെട്ടതിന് ശേഷം നടി ഒരു ദിവസം ശ്രീതയുടെ വീട്ടില്‍ താമസിച്ചിരുന്നു. ഇതിന്റെ അടിസ്ഥാനത്തിലായിരുന്നു മൊഴിയെടുക്കല്‍. മജിസ്‌ട്രേറ്റിന് മുന്നില്‍ മൊഴി കൊടുക്കാന്‍ വന്ന സമയത്താണ് നടി ശ്രീതയുടെ വീട്ടില്‍ തങ്ങിയത്. കേസുമായി ബന്ധപ്പെട്ട് നടന്‍ സിദ്ദീഖിനെയും അന്വേഷണസംഘം കഴിഞ്ഞദിവസം ചോദ്യംചെയ്തിരുന്നു.

ദിലീപും നടിയും തമ്മിലുള്ള പ്രശ്‌നങ്ങള്‍ക്ക് താന്‍ സാക്ഷിയായിരുന്നെന്ന് സിദ്ദീഖ് മൊഴി നല്‍കി. 2013ലെ താരനിശയ്ക്കിടയില്‍ ദിലീപും നടിയും തമ്മില്‍ പ്രശ്‌നമുണ്ടായെന്നും അന്ന് ഇരുവരെയും പിടിച്ചു മാറ്റിയത് താനാണെന്നും സിദ്ദീഖ് മൊഴി നല്‍കിയതായാണ് റിപ്പോര്‍ട്ടുകള്‍. സംഭവത്തിന് ആരൊക്കെയായിരുന്നു സാക്ഷികളെന്നും പിടിച്ചു മാറ്റാന്‍ ആരൊക്കെയാണ് എത്തിയതെന്നും അന്വേഷണസംഘം ചോദിച്ചറിഞ്ഞു. ഇരുവരും തമ്മിലുള്ള വൈരാഗ്യത്തെക്കുറിച്ചും സിദ്ദീഖില്‍ നിന്ന് പൊലീസ് വിവരങ്ങള്‍ തേടി.

ദിലീപുമായുള്ള സാമ്പത്തിക ഇടപാടുകളെക്കുറിച്ചും പൊലീസ് സിദ്ദീഖിനോട് ചോദിച്ചു. നടി ആക്രമിക്കപ്പെടുന്ന കാര്യം മുന്‍കൂട്ടി അറിഞ്ഞിരുന്നോയെന്നും അന്വേഷണസംഘം ആരാഞ്ഞു. എന്നാല്‍ നടിയെ ആക്രമിച്ച സംഭവത്തെക്കുറിച്ച് തനിക്ക് ഒന്നും അറിയില്ലെന്നായിരുന്നു സിദ്ദീഖിന്റെ മറുപടി. അതേസമയം, ആവശ്യമെങ്കില്‍ വീണ്ടും സിദ്ദീഖിനെ ചോദ്യം ചെയ്യാനാണ് അന്വേഷണസംഘത്തിന്റെ തീരുമാനം. ഇക്കാര്യം താരത്തോട് പൊലീസ് സൂചിപ്പിക്കുകയും ചെയ്തിട്ടുണ്ട്.