മഹേഷിന്റെ ജിംസിയായി മലയാളികളുടെ മനസില്‍ ഇടംനേടിയ അപര്‍ണാ ബാലമുരളി, ഏറ്റവുമൊടുവില്‍ അഭിനയിച്ച തൃശ്ശിവപേരൂര്‍ ക്ലിപ്തം, സണ്‍ഡേ ഹോളിഡേ എന്നീ സിനിമകള്‍ തിയേറ്ററുകളില്‍ നിറഞ്ഞോടുകയാണ്. അഭിനേതാവ് മാത്രമല്ല, മികച്ചൊരു ഗായിക കൂടിയാണ് താനെന്ന് അപര്‍ണ തെളിയിച്ചിട്ടുണ്ട്. ഇപ്പോഴിതാ, തനിക്ക് പ്രിയങ്കരമായ മറ്റൊരു സംഭവം കൂടി അപര്‍ണ വെളിപ്പെടുത്തുന്നു. താനൊരു ഭക്ഷണപ്രിയ കൂടിയാണെന്നാണ് അപര്‍ണ പറയുന്നത്.

ഏതൊരു മലയാളിയെയും പോലെ പൊറോട്ടയ്ക്കും ബീഫിനും അടിമയാണ് താനെന്ന് അപര്‍ണ തന്നെ പറയുന്നു. ഭക്ഷണകാര്യത്തില്‍ ഫസ്റ്റ് ഓപ്ഷന്‍ എന്നും പൊറോട്ടയ്ക്കും ബീഫിനുമാണെന്ന് കൈരളി ടിവിയിലെ ജെബി ജംഗ്ഷന്‍ പരിപാടിയിലാണ് അപര്‍ണ വെളിപ്പെടുത്തുന്നത്. അപര്‍ണയ്ക്കൊപ്പം ആസിഫ് അലിയും സണ്‍ഡേ ഹോളിഡേ സംവിധായകന്‍ ജിസ് ജോയിയും ജെബി ജംഗ്ഷനില്‍ വിശേഷങ്ങള്‍ പങ്കുവയ്ക്കുന്നു.

ഇതിനിടയില്‍ അപര്‍ണയുടെ പൊറോട്ട-ബീഫ് സ്നേഹത്തെ ട്രോളാനും ആസിഫ് മറന്നില്ല. അപര്‍ണ ഒറ്റയടിക്ക് നാലു പൊറോട്ട വരെ കഴിക്കുമെന്ന് ആസിഫ് തമാശയോടെ പറയുന്നു. എന്നാല്‍ അത്രയ്ക്കൊന്നും തനിക്ക് പോകില്ലെന്നും എന്നാല്‍ ഏറ്റവും പ്രിയപ്പെട്ടതാണ് പൊറോട്ടയും ബീഫുമെന്ന് അപര്‍ണ കുസൃതിചിരിയോടെ സമ്മതിക്കുന്നു.

മലയാളം വിട്ട്, അപര്‍ണ മറ്റു ഭാഷചിത്രങ്ങളിലേക്ക് പോകാത്തതിന്റെ കാരണം ബീഫ് ആണെന്നും ആസിഫ് പറയുന്നു. മറ്റു സംസ്ഥാനങ്ങളില്‍ പോയി ബീഫ് സ്നേഹത്തെക്കുറിച്ച് പറഞ്ഞാല്‍, തല്ലു കൊള്ളുമെന്ന ഭയം കൊണ്ടാണ്, അപര്‍ണ മലയാള സിനിമയില്‍ മാത്രം അഭിനയിക്കുന്നതെന്നും ആസിഫ് ട്രോളുന്നു.